「阿伯你冷靜啲先,佢細路女唔識世界架姐,你俾次機會放過佢啦。」

「你死開,呢度唔關你事!」

阿盈客氣地說服佢,估唔到竟然俾個阿伯一野推開撞左埋牆繼續怒氣沖沖咁行埋黎,睇黎佢力氣都唔少,

但阿盈只釋出左少量嘅煙,可見實力懸殊,個阿伯仲未知自己得罪左邊個。

「你條死老坑我叫你放過佢地啊,聽!唔!聽!到!?」





「你夠薑掂佢地一條頭髮,我即刻打到你煙銷魂散!」

說罷阿盈突然發威從後抓住佢胸口位然後黎個270度轉身將佢大力地撞左埋牆再用另一隻手好似白骨爪咁爪住佢成塊臉,顯然呢下衝擊佢釋出左好多煙,佢露出痛苦嘅表情,阿盈靈力高左好多。

然後將聲線同個樣變到極度兇狠地對住阿伯叫佢放過我地,同頭先客氣嘅佢180度改變,既然佢軟嗰套唔受就俾套硬嘅佢受,

我第一次見到阿盈咁兇狠地對付一個鬼魂,我呢一刻頓時覺得好有安全感,多得有阿盈係度我地先唔會受到傷害;

但另一方面亦有少許感到自己無能,覺得咩都要靠阿盈幫手先得,自己就咩都做唔到,就好似大雄成日都要搵多拉A夢幫手一樣。





「聽…聽到,我唔再搞佢地,你放過我啦…啊…好痛…」

「知驚啦係咪?見你有悔意,今日就放過你。」

說罷阿盈就抓住佢胸口同爪住佢塊臉抬高轉身掉左佢入後巷裡。

而係佢地搏鬥期間,Chole姐只感到周圍好大風咁吹住佢、咩都見唔到。

「點解啲風一直吹住我地,仲越吹越大?」





「你一定係得罪左隻鬼佢好嬲你咪咁大風囉。」

我求其作個大話避開佢,唔通周你講阿盈已經幫我地打低左佢啦咩。

說罷後巷裡突然傳出眾多嘅鬼魂聲,我地見到後巷深處有好多鬼魂湧緊出黎。

「阿洋快啲走,唔好再企係度食花生,一定係頭先我搏鬥太大動作挑起左其他鬼魂嘅怨氣,我地快啲走。」

「我地快啲走,隻鬼追出黎殺你架啦。」

然後我地3個立即拔足逃跑,期間我不自覺地拖住Chole姐隻手跑,跑左一段距離後,鬼魂已經冇追過黎,但Chole姐顯然為佢今日終於見到嘅少少動靜而感到興奮,

佢之後仲因為我地跑走而質疑我係感受到佢地存在先咁緊張,我當然唔認啦,我淨係知佢自呢日起又再進一步地對靈異野提高興趣、亦開始相信有鬼嘅存在…

時間黎到兩個禮拜後嘅今日,依家Chole姐已經放緊暑假,自從佢放暑假之後,佢每日就更加早就出去,但佢仍然唔肯講佢出去做咩,到依家都係一個迷。





今日係星期日,平時嘅星期日佢會搵我出去玩,但今日竟然一啲動靜都冇,有啲奇怪,我有試過主動去佢門口搵佢,但㩒門鐘冇人開門。

但佢wts係有keep住上線,即係佢冇事啦,究竟佢今日搞咩?我好是著緊佢,好想佢會同我報備,可惜我並冇呢個權去管佢…

算啦唔好亂咁多啦,佢應該係同啲fd去玩架姐,同fd出去玩又點會成日上線、又點會仲留係屋企…

時間到黎夜晚差唔多11點,我同阿盈好似以前咁食完飯做左陣運動跟住就係度睇電視,

我再睇一睇Chole姐嘅wts,佢最後上線時間:7:52分,即係都有成3個鐘冇上線,佢今日究竟去左邊一啲音訊都冇?

正當我擺低手機嗰下,手機突然響起傳來一個訊息,係Chole姐wts我。

「救命」





Chole姐send左個位置過黎示意救命,就只有呢兩個字,冇其他野,呢一個呼救令我立即緊張起黎。

「做咩事?你出左事?」

我嘗試覆返佢,但就只顯示單tick,即佢wts完我救命佢就斷左網…

然後我嘗試打埋俾佢,都係冇人聽,呢次同叫我出旺角嗰次唔同,呢次係向我求救,之後就冇左音訊,直覺話我知一定唔會係手機冇電咁簡單。

「阿盈,Chole姐佢唔知出左咩事同我講救命,我要即刻去搵佢。」

「我打唔通俾佢,再wts佢都係單tick,佢一定出左大事。」

我好慌張地立即換衫執野準備出門。

「冷靜啲先,佢出左事?你知佢係邊咩?」





「佢send左個位置俾我,係粉嶺嗰邊啲村屋。」

「佢冇啦啦去粉嶺嗰邊咁遠做咩?嗰邊冇咩行架喎。」

「唔知,我淨係知佢呢刻搵得我求救一定要大件事,好大可能會危及性命。」

「既然係咁我同你一齊去啦,多個保障嘛。」

「…又要勞煩你黎幫我,我覺得自己真係好冇用,自己鐘意嘅人出左事都唔可以靠我自己黎守護。」

「傻嘅,你係我阿哥黎嘛,話過有咩事都一齊面對,你依家去做啲有危險嘅野我又點可以俾你一個面對,人命好單薄架咋,出左事就係咁,我唔可以再睇到你有咩三長兩短。」

「況且你唔係一啲用都冇囉,你唔記得你教佢功課令到佢成績有進步啦咩?你有學識;你接佢放學夠膽幫佢趕走班女仔,你有膽量;」





「仲有一樣就係你識驅鬼,唔知你仲記唔記得,嗰陣我地合力消滅左隻厲鬼,我相信日後就算萬一我唔係度你都可以好似我係後巷嗰日咁驅鬼。」

「驅鬼?嗰陣我只係唔知點解會識驅架咋,我真係一啲驅鬼知識都冇,同埋你點會唔係度,你以後都會陪住我架嘛。」

「我話萬一姐,驅鬼有機會係你本能,危急起上黎自然用得著。」

「總之你要信你自己,但依家唔係自卑嘅時候,我地要快啲去搵到佢。」

「係喎,我地快啲出發!」

今晚阿盈點醒我先知原來自己都仲有啲用處,未至於咩用都冇,如果我呢一晚救唔到Chole姐就真係冇用啦。
已有 0 人追稿