[靈異] [愛情] [我同條女敦倫外傳]我屋企養左隻女鬼...: 營救行動(上)

「司機，我要去粉嶺XXX村。」

「哇，嗰度好偏僻好少人住架咋喎，多數都係啲荒廢房屋，估唔到依家仲有人去嗰度。」

「係啊，人命關天。」

我地好快出門由屋企飛的到粉嶺啲村屋嗰個位，聽完司機咁講，我更加奇怪Chole姐去嗰度做咩，照計BBQ都唔會去到咁僻啦。

沿途我地經龍翔道入大老山出到沙田大埔嗰邊，最後到達粉嶺再開入一啲少車行嘅道路轉入村屋，由本身繁囂嘅市區慢慢地入到一個人煙稀少且寧靜嘅郊外，



開往村屋嘅道路上顯得周圍都格外陰深，只有兩旁泛黃嘅街燈照住條道路；沿路亦毫無人煙，只得間中一兩架車駛過、仿佛方圓幾里內一個人都冇，佢點會黎埋啲咁荒無嘅地方？

大約一個鐘車程，我地終於去到Chole姐位置所示嘅地方附近，因為前面部車已經駛唔入去，需要我地徒步行入去，我俾左幾舊水司機就落左車開始行入去。

呢度周圍真係好陰深，的士走後就淨低我一個…同阿盈係度，前方有一排排3層高嘅村屋，有啲仲要係瓦屋，而每排之間只隔著一條好窄嘅通道，

可能依家已經凌晨，每一間屋都唔見有燈著住，係每一間都冇燈！一啲人煙都冇，就算凌晨、村屋嘅人早瞓都好，但照計呢度咁多間屋點都有一間係著住燈掛…？

唔通真係如司機所講好多都廢置嘅？咁就解釋到點解會每一間屋都係冇燈。



因為冇燈嘅關係，除左馬路嘅位置入面基本上一盞燈都冇，十分陰深恐怖，唔似得其他有人煙嘅村屋村內點都會有啲照明設施，所以我係需要開啟手機照明。

我順便睇下wts，Chole姐到依家仲係單tick，佢一句我嘅訊息都收唔到，我亦嘗試打俾佢亦都打唔通，呢刻嘅佢猶如失左蹤一樣。

我心中嘅疑問又再浮現出黎，究竟佢黎呢度做咩？簡單啲講呢度根本就係廢墟；呢度咁多間屋究竟佢係邊間屋？究竟佢發生咩事？

我地沿住啲四通八達嘅通道向住Chole姐嘅位置前進，沿途見到啲遊魂野鬼，有男有女，睇黎都係以前住係呢度嘅居民。

「阿盈，其實我好驚。」



「唔洗驚喎，周圍嗰啲遊魂野鬼黎姐，我係度佢地唔敢搞你。」

「我唔係驚鬼，我係驚有怪物，你都見呢度人都冇個，真係咩奇珍異獸都有機會有。」

「哈哈傻嘅放心啦，有咩攻擊我地我都幫你擋走佢～」

有佢呢句就放心，呢個時候有阿盈係度真係特別有安全感，周圍冇人、但仲有我身邊呢個「人」陪住我…

慢慢地我地黎到一個空礦嘅地方，前面有道大鐵閘打開左，而Chole姐所示嘅位置就係前面呢棟建築物。

前面呢棟建築物好大，並唔係一般村屋，而係好似一間學校咁，前面一個操場，操場周圍係一層層走廊，好似我地依家啲中學，因為太黑我並睇唔清有幾多層，睇落個地方好殘舊，似荒廢左嘅學校。

我同阿盈繼續小心咁行入去，行到入去操場，呢度咁大點樣搵佢…？成間學校咁大每一層又咁多間房唔通真係要每一間房去搵？

「Cho…」



正當我想大叫Chole姐嗰陣，阿盈突然㩒住左我口。

「Shu…有軍人係附近巡緊，我地靜靜地行。」

我見到係建築物嘅地下，有幾個著黃色衫、戴住頂軍帽嘅軍人拎住盞燈正係度行緊，似係巡更。

「佢地係鬼魂黎，係日本皇家軍。」

「日本皇家軍？唔通…唔通呢度係軍營？」

「睇個建築似，你快啲睇下位置啦。」

說罷我再次拎起手機睇，發現呢度訊號好差，得返一格，但我勉強仲睇到位置嘅，佢係左側嗰邊建築物。



「佢係左邊嗰棟建築物，但呢度訊號好差，我得返一格。」

「我地去睇下，可能呢度太過僻，同埋係殺氣重嘅地方。」

「殺氣重？」

「嗯，呢度以前應該死左好多人，我feel到呢度周圍啲建築都散發出一種好重嘅殺氣。」

「咁你會唔會唔夠佢地打？畢竟佢地已經死左咁耐。」

「唔會，因為呢度人煙稀少，佢地就算死去多年但所吸收到嘅陽氣係極少，加上佢地只係遊魂野鬼，佢地唔會係我對手。」

「放心喎，依家你阿妹我靈力咁勁冇咁易俾啲小鬼抽低。」

「咁就放心。」



「不過…」

「不過？」

「如果佢地數量太多嘅就唔係咁講，佢地數量多嘅以我一己之力都好難抵擋得晒，所以嗰日係後巷成班鬼魂湧出黎我先叫你地要走。」

「咁我地要盡量保持低調唔好俾佢地知我地存在，我估入面應該都會幾多皇軍。」

然後我地小心翼翼咁避過皇軍走到左側間建築物，我地已經行到Chole姐所示嘅位置。

但呢度有條樓梯，有上有落究竟行邊邊好？但呢度已經係地下仲有得落？唔通有地牢？

我再諗返既然Chole姐所在位置係冇訊號嘅，地牢係大機會收唔到訊號，相反樓上會冇訊號嘅機會就冇咁大，始終可以對住個窗，因為咁我地決定往下走。



我地沿住昏暗嘅樓梯一直落，呢條樓梯都幾深，落左大約3層樓嘅位置先落到底，當我再攞手機出黎睇啲時候，呢度的確完全冇左訊號，我有預感呢度就係Chole姐嘅所在地。