呢刻嘅阿盈正苦苦地抵抗住呢一班數量龐大嘅皇軍、孤軍作戰,佢地嘅數量之多已經掩蓋成條走廊,目測起碼有數百個皇軍。

雖則佢地只係一班嘍囉,但因為數量多嘅關係,阿盈已經俾佢地用刀劈左幾下,可謂積少成多,呢個一刀嗰個一刀,阿盈嘅煙亦開始不斷散發出黎。

至於我就一直孭住Chole姐向前跑,好彩佢唔算太重,所以我唔算太辛苦,佢雙手撓住我條頸撓到實一實、甚至將頭挨埋落我度,我深深感受到佢嘅體溫。

「點解後面會咁嘈,係咪班皇軍就黎追到上黎?定係有人幫緊我地?」

佢知皇軍嘅事?即佢都見到過呢班皇軍?





「你唔好理啦,我地依家最緊要快啲離開呢度,同埋唔好望後面,你一望佢地就可以即刻上你身。」

我特登講個大話嚇下佢好等佢唔好向後望。

「咁得人驚?我唔會向後望,我唔想佢地上我呢副身軀。」

「不過真係多謝你今晚捨命過黎相救,我以為今晚我會死係呢度…」

「傻嘅唔好咁咒自己,有咩出到去先講,你係我朋友、亦係我一個好重要嘅人,我點可以唔黎救你。」





說罷我繼續用盡全力向前跑,然後去到樓梯口我用力撐上樓梯,呢個時候先係最辛苦,猶如一個負重訓練,但我要繼續撐上去,

我一定要帶Chole姐離開呢度,我唔可以辜負阿盈係後面幫我苦苦抵抗嘅心機,阿盈佢依家一定已經俾班皇軍劈左無數刀、傷痕累累…

當我撐到上地面後,我雙腳一軟連埋Chole姐一齊跌左落地下。

「方伯,如果你唔得嘅話,不如…不如你走先啦,你帶埋我走我會累左你…」

「唔得!要走一齊走,我唔會掉低你係度,我今晚一定要帶到你返出去。」





「方伯…但咁樣…」

說罷Chole姐再次眼濕濕咁望住我,佢應該覺得感動。

「唔好講咁多,快啲跳多次上黎,佢地殺到過黎架啦!」

好快我企返起身叫佢再跳上黎我背脊孭佢出去。

「巴架呀路,朵媽劣…」

當我孭起阿盈繼續向前跑後,係地面側邊嘅皇軍見狀都衝埋過黎想抓住我地。

「阿洋頂住呀,你出左呢個門口佢地就唔會追黎!」

阿盈亦跟隨我殺到上地面,我聽到佢咁講後,我再加快腳步向前衝,





此時此刻地面嘅皇軍都加入埋戰場,可謂四面受敵,雖然數量較少,但唔多唔少都會加重左佢負擔,我一定要快啲出到去!

我望住個門口,越黎越接近、終點在望,就黎到啦,要堅持住,好快就出到去。

「20米…」

「10米…」

「5米…」

好快我走到門前,我推開度門、左腳向前踏出一步,我地終於走出左呢個門口,

而阿盈一出黎後隨即閂埋門,皇軍立即停止了攻擊,我地正式‘封印’返呢個地方,標誌住呢場戰爭終於結束。





我回頭一望,見到皇軍早已擠滿整個操場,數量之多不敢相信,真係估唔到呢度會有咁多皇軍嘅亡魂。

阿盈呢個時候亦隨即露出疲態垂低腰咁鬆左一口氣,我微笑著向佢俾左個眼神點點頭,示意今晚辛苦晒佢,而佢亦都擺擺手向我示意繼續向前走。

「我地終於出左黎,皇軍唔會再追黎架啦,你落返黎我慢慢扶你返去啦。」

「今晚真係...真係多謝晒你,好彩有你呢個朋友係度,我好驚…我真係好驚…」

放返佢落黎後佢突然就喊住攬過黎,呢一刻我覺得世界好似停止左,除左孭佢我第一次同佢有咁親密嘅接觸,有佢係度我成個人都感到好溫暖。

「你真係好好,點解你要對我咁好,得你一個咁撚傻咁危險都黎救我…」

點解我咁傻?咪就係因為我愛你、我著緊你,我唔想你呢個mk妹從我嘅世界中消失,我寧願你以後繼續屌我、打我我都唔想你從此消失,冇左你嘅話我會好唔習慣。

「唔…唔講住啦,我地快啲返屋企,時間都唔早,你傷左架,有咩我地返到去再講啦。」





我因為唔識點答佢唯有轉移話題冀望快啲返去先,加上佢真係傷左要快啲返去搞搞佢,此地不宜久留。

然後我地搭住大家膊頭慢慢咁行出去,經過一排排漆黑且陰深嘅村屋,好快我地就出到馬路截的士返去…

話咁快時間已經深夜3點半,我地終於返到去,我略帶一絲倦意地扶Chole姐返入佢屋企坐低休息。

「今晚真係要多謝晒你,冇你嘅話我依家可能唔會有命坐係度。」

「得啦你今晚講左好多次多謝,我聽到耳仔都起枕。」

「話說點解你今晚會去左個軍營架?嗰度咁僻咁陰森又周圍都冇人,同埋又點解你會困左係個地牢度?究竟你今晚發生咩事?」

對今晚所發生嘅事我腦海中產生無數個疑問等唔切去問清楚Chole姐。





「唉,件事係咁…」

說罷佢就準備一五一十咁講返晒俾我聽。

「其實自從上次同你係後巷遇到嘅怪事之後,我對靈異野增加左唔少興趣。

「再加上你又古古怪怪咁,又唔撚肯講俾我聽你點解有種特殊嘅力量,我就諗你一定識召喚某啲野出黎、係一啲我見唔撚到嘅野,嗰陣開始我就相信係有靈體嘅存在。」

估唔到Chole姐咁聰明,只係見過兩次我叫阿盈出黎幫手佢就睇穿我識召喚,仲信埋有鬼嘅存在,其實你同我一樣都係鍾意尋根到底嘅人。

「正因為咁有一次我出面有幾個fd發起去探靈,佢問我join唔join埋我緊係話join,係一個大好機會俾我去見識下。」

「諗住有人帶住我應該會安全、唔洗驚,點知最後俾幾條仆街賣鳩左我…」

講到呢度,Chole姐突然一陣激動喊左出黎,都係我衰,如果唔係俾你見到我召喚,你就唔會對靈體有興趣、就唔會遇難…

「你慢慢講,佢地賣鳩你?」
已有 0 人追稿