「嗰日我地日頭出街玩,去到夜晚我地先入粉嶺,佢地話嗰度有個日治時候嘅舊軍營好猛鬼入到去一定見到鬼、會好刺激,我當然都好撚興奮咁跟住佢地。」

「我地去到嗰陣,周圍都好黑,我地就淨係拎住手機電筒照路,嗰度好陰深好靜,我地好驚但又覺得好刺激,我地好小心咁係軍營每一層遊走。」

原來佢全日同fd玩,夜晚就全程拎手機電筒係軍營度探靈,咁就解釋到點解佢接近8點嘅時候wts就冇再上過線。

「我地係走廊觀察緊每一間房嘅時候,突然走廊盡頭傳黎一聲呼喝,我地望過去好清楚見到幾個日本皇軍,之後佢地好似癲撚左咁拎起把刀衝過黎想劈我地。」

「我心諗呢度點會冇啦啦有皇軍出現,佢地好大機會就係鬼魂,我就知道原來呢個世界真係好有鬼。」





「我地見到咁緊係即刻走,我地由頂層一直跑到底層,落到2樓嘅時候,樓梯隔離突然出現左個皇軍抓住我個fd劈左佢手一刀、啲血係咁流。」

「我地見狀即刻大力扯開個fd然後繼續走,嗰陣我地已經驚到想走,而係我驚慌失措嘅時候就即刻send左個位置俾你想搵你求救,因為見你對呢方面好似有啲認識。」

「我地落到地下後想走,點知又見到前面操場有幾個皇軍衝緊過黎,我地俾佢地前後夾攻,之後我地見到仲有條路,就係繼續向下走,然後我地就係咁落左地牢。」

「落左去之後,嗰度真係好恐怖,有好多死左嘅囚犯係牢房、好多血…而後面就越黎越多皇軍追住我地,我地好快咁係個地牢度不斷向前跑,根本就冇時間理呢啲囚犯,雖然我地唔知向前跑係通去邊度。」

「跑到某個位佢地話隱約見到前面盡頭有條樓梯可以上返去,但我就偏偏係呢個時候先黎拗柴仆街,佢地見我行唔得快會拖累佢地就將我掉左入去隔離間冇人嘅牢房閂埋門叫我避一避,跟住佢地走先。」





「我嗰刻真係好驚,我就算點樣叫佢地唔好掉低我但佢地都冇理我繼續走左、佢地賣低左我…嗰陣我就知我嘅朋友都只會大難臨頭各自飛。」

「我唔知點算好,眼見皇軍逐步迫近,我驚到喊左出黎,我覺得自己好撚冇用,冇左朋友幫助嘅我就只係識得喊。」

「之後我見到隔離有張床,就唯有係捐入床底避一避,呢個時候我想打俾你,但嗰陣先發現地牢度根本冇訊號打唔通俾你,連向外界求救嘅唯一希望都冇埋,我真係好驚,我已經打定晒輸數心諗睇怕今晚我要死係度…」

原來佢最後向我求救俾位置我嘅位係外面之後先落左地牢,唔怪得佢向我求救後我再都聯絡唔到佢,好彩佢有早啲向我求救,否則我可能真係會就此永遠失去佢。

「就係我匿係床底期間,部分皇軍停低左係牢房出面似係視察咁樣,一陣之後佢地就開始散去,而嘈吵聲都慢慢消失,出面開始靜返落黎。」





「又過左一陣,正當我以為安全可以出返黎嗰陣,牢房入面突然多左個囚犯係度大聲辱罵左一陣,我嚇左嚇,跟住就有個皇軍開門入左黎。」

「下一刻就見到個囚犯俾人一刀斬左個頭落黎、地下周圍都係血,跌左落地下嘅頭仲要死唔眼閉望住我,佢個眼神好恐怖…真係好恐怖、係死人嘅眼神。」

「我當場嚇到差啲叫撚左出黎,好彩我用手黯住左個嘴,亦都合埋眼唔敢直視,然後皇軍就行走左。」

「再過左唔知幾耐就聽到你叫我,我真係好感動,估唔到你會黎救我,你真係好好,然後你就救走左我。」

Chole姐將成個過程講晒俾我聽,唔怪得我見到佢嗰陣佢會咁驚,原來佢經歷左咁多野,仲要親眼睇住一個人俾人斬頭,正常人睇到啲咁殘忍嘅畫面,一定已經有陰影。

「原來你經歷左咁多野,好彩我及時救左你出去,要你受左咁耐驚真係辛苦晒,最緊要依家平安返返黎,你就當今晚發左場惡夢啦,唔好再諗住頭先啲野。」

「你講就容易,邊會咁易忘記到,我見到佢俾人斬頭嗰下真係歷歷在目…」

「你依家知道呢啲地方有幾得人驚啦,等你以後仲敢唔敢去埋啲咁猛嘅地方探靈。」





「唔敢啦,見過鬼仲唔怕黑咩,估唔到啲鬼係咁凶殘咁恐怖。」

並唔係所有鬼都壞,好似阿盈咁咪就係好經常幫我。

「但我真係好廢好冇用,做咩事都係靠朋友,冇朋友幫助嘅我根本咩都做唔到,就算有朋友,佢地都只係識得賣鳩我,根本冇一個係真心…」

「同埋我之前同你講我多朋友係呃你,我根本就冇咩朋友…佢地唔係走晒就係得返啲唔重視我嘅朋友。」

講起朋友,Chole姐又再次喊出黎,今晚嘅佢同平時惡死嘅佢好唔同,我第一次見到佢咁自卑咁自責咁驚,可能今次嘅經歷確實令佢太衝擊了,幾堅強嘅人都會有懦弱嘅一面。

「你邊度冇用邊度廢,你不知幾堅強,如果你係廢係冇用又點會識一個人匿係床下底、仲要見到啲咁殘忍嘅畫面你都好堅強咁面對忍住冇叫到出聲。」

「直至等到我黎救你,你可以生存到落去都係因為你夠堅強,一啲都唔廢囉!」





「你仲要好勇敢好有義氣,雖然你好驚,但你見我孭住你嘅時候仆街,為左唔拖累我竟然提出叫我走先你自己再匿埋,試問一個冇用嘅人會做得出呢啲事咩?」

見到Chole姐咁灰咁自卑,我即刻將頭先嘅所見所聞留意到嘅優點講返俾佢聽以安慰返佢。

「同埋我咪係你真心嘅朋友,就算你其他朋友離棄晒你都好,我都仲會留係你身邊陪住你。」

聽完後Chole姐心情睇落悄為平復。

「其實你點解要對我咁好?我平時對你咁衰,淨係識鬧你、點你做野、幫我手、仲成日問你借錢洗你錢,照計你唔係應該好憎我架咩?點解你仲會同我做朋友,我根本唔值得有你呢個咁好嘅朋友…」

「係架,我係唔鍾意你咁衰…初頭;但慢慢我接受到你呢啲性格,我仲越黎越鍾意你鬧我打我,證明你份人唔假夠真性情,你唔覺得我對你好特別架咩?」

問到點解對佢咁好呢方面,我控制唔到地講左少少內心感受俾佢聽,我心跳亦慢慢加速,因為我暗戀緊你啊傻妹。

「點解要對我咁特別?你變態架?」





「我唔係變態,係因為…因為我鍾意你!」
已有 0 人追稿