我終於控制唔住冒住一個可能會變為陌路人嘅風險講出左我一直埋藏在心裡已久嘅心底話,然後下一刻嘅空氣都陷入了靜止狀態。

「你話…你鐘意我…?唔好講笑啦。」

「我唔係講笑,我係真心鐘意你!我唔想再呃自己。」

「由唔知幾時開始我就已經俾你吸引住,你真係好靚、好有氣質…初初我以為係錯覺,我以為我對你咁多付出咁著緊你係因為我hurt左你、我內疚,又或者係我毒撚耐冇同女仔相處;」

「我以為時間耐左呢啲感覺會消失,但並唔係,時間越耐我反而越鐘意同你相處同著緊你,你每次痴近我我都會好心動,我就知道原來呢一切都係因為我鐘意你、已經超出左朋友嘅關係…」





「孔樂兒,我真係好鐘意你!我鐘意陪住你嘅每一分每一刻;我鐘意見到你每一張面孔;我鐘意你嘅惡死、你嘅霸道、打我鬧我串我;

「我鐘意你痴近我、對我做出微細嘅舉動、溫柔咁嗲我…總之只要見到你我都好鐘意你,其實你好嗰陣真係好可愛架,一啲都唔惡死。」

「你知唔知我第一次接你放學嗰日,我嗰啲並唔係演技、我唔係扮,而係出自我真心,我真係當左我自己係你男朋友,拖住你嗰下我個心都溶化晒,我一直心諗如果我真係做到你男朋友就好。」

「不過其實嗰陣我都滿足架啦,我每日接你放學都可以做到你個幾鐘嘅‘男朋友’,所以我每日都好期待可以接你放學、享受呢個短暫嘅身份。」

「但慢慢咁我潛意識已經當左我自己真係你男朋友…我好想你咩都同我講、冇野瞞我,我想你有咩困難我都同你一齊渡過,我真係好鐘意你…」





我終於抒發晒我一直埋藏心入面已久嘅感受,內心舒服左好多,我唔洗再收埋收埋、亦俾佢知道我嘅感受、我嘅愛意,我覺得我今晚好勇敢,但換黎嘅代價唔知會唔會我地就此變成陌路人…

「…」

「方伯洋,你真係好好,但...但我唔配擁有你咁好嘅男朋友…」

Chole姐沉默一陣後講出一啲類似想拒絕我嘅說話,呢啲係咪就叫做‘派好人卡’?

「你點會唔配,你又靚又可愛,雖然你平時惡死,但你好嗰陣會對我貼心,其實你肯係我面前將你嘅真性情表露無遺已經好好,證明你信任我、對我毫無戒心。」





「嗯多謝你,其實我唔應該對你咁衰,又洗你錢又打你又鬧你又點你做野又剩,你係一個好人、我咁衰你都肯冒住生命危險都肯黎救我,要內疚嗰個應該係我、要講對唔住嗰個都應該係我,對唔住…」

呢刻嘅Chole姐垂低頭露出一個懺悔嘅表情,佢竟然會為佢以前做嘅事道歉,但我唔需要佢道歉,呢個根本唔係佢黎…佢咁講係咪代表住之後佢真係會當我做陌路人…?

「你唔衰、唔洗對唔住,呢一切都係我自願付出,因為我愛你所以先咁著緊你,所以…」

「嗯,我明架啦。」

我未講完之際佢突然就好決絕咁截停左我講野,且同平時嘅佢好唔同,唔通我地真係要變回陌路人?

「你之後都係叫我樂兒啦,我唔想再聽到姐前姐後,我根本冇你想像中咁堅強…」

佢冇啦啦好認真叫我改叫佢做樂兒,我未見過佢咁認真嘅一面,而改左個名就猶如一個新開始。

「樂兒…」





「同埋呢你後日可唔可再陪我去多次迪士尼?我想去散散心。」

佢呢一次約我去迪迪尼冇再好似第一次咁雀躍,我覺得一切已經開始變冷淡左。

「去迪士尼?但你隻腳…」

「我對腳嘅野你唔洗擔心,我只係輕輕咁拗左拗唔算好痛,後日應該好得七七八八,我淨係想你後日陪我。」

「好啦,既然你咁堅持,我後日就陪你去玩下散散心,但你呢兩日都要小心啲行路。」

「嗯我會小心,嗰日見啦。」

「時間都唔早,你快啲返去先啦,呢度我自己搞掂就得。」





說罷我就返左去自己屋企,平時睇落豪放嘅佢,呢一下竟然會變得咁矜持、一句起兩句止。

自從今晚表白後,Chole姐對我冷淡左,冇左表白前嘅咁多野講,佢亦冇俾答覆我,只有類似想拒絕我嘅說話,其實我今晚係咪唔應該咁衝動講左出黎…?

「返黎啦阿洋?佢點樣、有冇大礙?」

返到屋企後,阿阻盈即刻走上前八卦。

「佢就冇咩事嘅,後日仲約我去迪士尼,唉…」

「冇事咪好囉,佢仲約你去迪士尼,但點解你好似好愁咁,你唔係應該開心咩?」

「衰就衰在我同佢表白左,佢冇俾答覆我,家下仲對我冷淡左,都唔知仲做唔做得成朋友。」

「你唔好咁灰住啦,佢冇俾答覆你但仲會約你去玩即都仲有機嘅,你俾啲時間佢考慮。」





「嗯唯有係咁。」

「都係嗰句啦,我覺得佢係對你唔好,痴埋黎就只係攞著數同當你係兵,唔好放咁多心機落佢度啦。」

「唔會、一定唔會,今晚件事之後佢成個人同平時唔同晒,佢俾我見到左佢脆弱一面、仲成個人變得好自卑,我覺得佢一定有野收埋、佢一定唔會咁衰!」

「怕左你,我嘅說話你完全聽唔入耳,就睇下佢係咪如你眼中咁好啦。」

「但有一樣野好奇怪,明明之前後巷佢咩都見唔到,點解今次佢會見到晒班皇軍?」
已有 0 人追稿