[靈異] [愛情] [我同條女敦倫外傳]我屋企養左隻女鬼...: 現身

呢一刻我終於知道點解佢唔想人地叫佢做mk妹，原來係因為自己本身唔係啲咁嘅人接受唔到呢個稱號，

我覺得仲有一部分係跟條仔有關連，就係近朱者赤、近墨者黑，佢接觸得多佢自然都學左佢啲衰野，就算冇學都因為受虐積住好多壓力需要抒發出黎，

否則我以前都唔會係咁俾佢地同俾佢點，應該唔多唔少都關事，除非唔係。

「對唔住，我以前仲有意無意咁叫你mk妹。」

「算啦唔緊要，咁我自認都真係衰嘅，又串嘴又爛口，我已經冇以前咁接受唔到。」



「講返先，你頭先係講你屋企夜晚好嘈搞到我瞓唔到我過黎屌你嗰次？」

樂兒佢言歸正傳。

「冇錯就係嗰次，嗰次啲聲其實都係我阿妹發出，因為我hurt親佢佢沉睡左，沉睡緊嘅佢發出嘅聲屋內聽唔到，但屋外係好應聲。」

「仲有個香爐，其實都係為佢而設，我嗰陣見有人裝左香以為係你搞，你仲噴到我成塊臉都係口水有陣煙味。」

「Er…其實我嗰排壓力大食左少少煙，跟住我都冇再食過架啦。」



「不過神主位？聲？即係我嗰陣聽到嘅其實係鬼喊聲…？」

樂兒聽到後頓時感到毛骨悚然。

「嗯，可以咁講，一開頭我仲以為你唔信邪所以都冇同你解釋，但你唔洗咁驚架…佢唔會害你，佢係我阿妹黎。」

「開頭我係唔信，但見到你接我放學嗰陣好似識召喚啲野出黎我就慢慢開始信。」

「同埋我點會唔驚，你唔記得軍營嗰次啲皇軍幾恐怖啦咩，成班追住我地，仲要我親眼見到有個人俾個皇軍斬頭。」



唉，一切都係因為我開左個頭俾樂兒見到先令佢之後咁著迷。

「傻豬黎，鬼都有分級數架，啲皇軍個level太低係唔會有意識，只係識得去打，我妹佢高lv啲有意識唔會好似佢地咁淨係識打，同埋嗰晚俾皇軍斬頭嗰個都係鬼黎，佢好快會復活返一直loop。」

「但佢始終都係鬼，係另一邊世界嘅野…」

「放心啦，鬼都有分好同唔好，而我妹佢係好架，仲有軍營嗰次都係靠佢殿後同啲皇軍打鬥我地先可以走得甩。」

「嗰次你唔俾我望後面就係唔想知有佢嘅存在？」

「嗯，其一啦，其二就係唔想嚇親你嘛，仲有後巷嗰次有一大堆靈體衝出黎都係靠佢殿後救左我地。」

聽完咁多阿盈救左我地嘅事迹後，樂兒都開始有少少平復落黎冇咁驚。

「照咁講你係可以見到晒佢地？因為後巷嗰次我咩都見唔到…」



「嗯我見到晒，對唔住我一直瞞住你冇同你講，其實我有陰陽眼，任何鬼怪我都可以睇到，我已經習慣左。」

「而嗰晚其實係有個靈體係度，你講左啲唔好嘅說話之後佢想襲擊你，最後靠阿妹搞掂左佢。」

「原來嗰晚佢地搏鬥緊，唔怪得會有陣風吹埋黎我度。」

「不過你連陰陽眼都有？難怪你可以召喚啲野出黎，唔通你召喚出黎嘅都係佢黎？」

「係啊，就連教你做生物嗰次我都有召喚佢出黎教我教你做功課。」

「哦，原來你出古惑搵人請槍嘅，我仲以為你講得頭頭是道咁真係咁勁，我就諗點解你講到成個機械人咁。」

「咁…咁我想得到你歡心嘛，我點都要扮到自己好勁，我生物唔識姐，但我中史係真係有料架，我真係靠我自己吹出黎。」



「車，不過你生物啲功勞都係屬於你妹架姐。」

「咁佢以前修生物又的確有啲料到嘅。」

「咁其實你平時見到佢實體係點嘅樣？嗰晚浩正升起究竟係發生咩事？我見佢個樣好難受咁，我好好奇。」

果然樂兒對嗰晚嘅事念念不忘，佢又再問返嗰晚嘅野。

「乜你真係好想見到我咩？嗰晚都係由我救左大家，係阿洋叫我出黎，一出到黎我就即刻捏住佢條頸將成個人升起唔俾佢郁，因為邊個夠膽同阿洋作對就即係同我作對。」

「哇鬼呀！」

阿盈突然係床尾現身就將樂兒嚇倒。

「阿盈你做咩冇啦啦現身，你嚇親樂兒啦。」



「唔洗咁驚喎，我又唔會食左你，你好！我就係佢身邊嘅阿妹，我叫周雪盈，你可以叫我阿盈。」

「你…你就係佢阿妹？乜原來你一直都係度架…」

「嗯，我跟埋一齊入醫院架嘛。」

「你真係鬼黎…？點解同人冇分別嘅？」

「我唔單止同人冇分別，仲可以穿牆、上身、入人地夢添，因為我靈力夠高。」

「上身？你唔會上我身架呵，聽講上身可以奪走人地個靈魂。」

「咁又唔係你講到咁危險嘅，上身只係暫時操控人地個身體，不過你又唔洗咁驚訝，因為我已經上過你身。」



「你上過我身？幾時嘅事、點解我唔知？」

「咪就係你打左你前男友都唔知嗰次，我上左你身你會失去意識所以你冇印象係正常。」

「好彩嗰陣我上左你身幫你出頭咋，我真係睇唔慣佢對你咁衰，你已經冇錢借俾佢佢仲要打你鬧你格硬要你俾錢仲搜你身。」

「原來嗰晚你上左我身，我就奇怪點解嗰晚醒左會係屋企，跟住浩正搵我先知發生咩事，我仲即刻同佢道歉。」

「雖然嗰晚你搞到我斷左片事後又俾佢算帳，但都多謝你幫左我一把，因為嗰晚我真係冇晒錢，佢會係咁毒打我。」

「洗咩多謝，大家女人就係要互相照料，嗰晚原本跟蹤你就係睇下你有咩秘物，點知就俾我見到個渣男對你咁衰我都忍唔住出手。」