我呢個時候再次大膽咁向樂兒表白希望可以一齊,作為一個兵仔其實已經越晒界,亦好似我拆散人將人地拉埋同我一齊,但呢個渣男就唔能夠相題並論啦。

「我好矛盾…雖然我認清我自己鐘意嗰個係你,但…但我唔可以同你一齊,我係一個壞左嘅人、我好污糟,俾好多人搞過,我唔值得你去愛…」

「唔緊要架,我鐘意得你就唔會介意呢啲野,我係鐘意你個人、你個心,唔係淨係鐘意你身體,佢俾我睇嘅片我可以忘記晒佢,就當一個新開始。」

我真係好愛樂兒,為左佢就算佢之前做過啲咩、經歷過啲我都可以排除萬難克服佢,佢係第一個令我愛得咁深嘅女仔、亦依然係我心目中嘅女神。

「況且你之前會俾咁多人搞都係為左條仔咋嘛,依家之後你就唔會再俾其他人搞,因為有我係度,我會盡力保護你。」





「佢亦都唔會再返黎搵你借錢,因為佢啲相已經del晒,佢冇得再攞呢樣野黎威脅你。」

話就話盡力保護樂兒,但到最後都要搵阿盈幫手。

「阿洋你真係真係好傻,明明我咁污糟又卑微咁冇用你都仲要鐘意我,仲要我以前對你咁衰…」

「自從嗰晚同你搞左,我就鐘意得你更加深、更加認定你,嗰陣我同自己講無論發生咩事都好我都要你做我女朋友,只係之後聽你講話有男朋友我先絕望左…」

「但到左依家我啲希望就返返晒黎,我只係想你答應我做我女朋友,我愛你,就等我取替個渣男以後由我對你好、痛錫你好唔好?」





說罷樂兒就再次對我流下眼淚。

「點解你可以咁好咩都唔介意,連呢啲咁羞辱嘅事你都肯接受,正常人一定唔會仲要我呢啲咁嘅女仔,你唔正常呀。」

「但你以後真係會對我好、痛錫我,唔會呃我?」

「嗯,我應承你,唔會反口。」

「咁…咁以後你要買更加多野俾我架喎,又要陪我去迪士尼玩又陪我行街周圍去又要教我做功課,你會好忙架喎。」





樂兒開始面露返啲笑容,係咪意味住我即將成功?

「唔洗講,你想買咩我都買俾你;你想去邊我都會陪住你,同你一齊我只會覺得開心,唔會覺得忙。」

「咁你係咪即係答應做我女朋友...?」

「嗯,我就睇下你係咪真係對我咁好,如果俾我發現你對我唔好我即刻唔要你架。」

Yeahs!樂兒答應左我,我表白終於成功左啦!我感到十分興奮。

「好耶!我終於可以同到你一齊!多謝你肯俾機會我,我保證你以後日子都一定會幸福,孔樂兒我愛你!」

說罷我興奮到攬住佢瞓左落黎我度,然後我仲同佢嘴對嘴kiss埋,佢笑得好開心,係佢真情流露嘅笑容,

呢一刻我終於可以真正得到你嘅愛、真正做到你嘅大將軍、係一個攞正牌嘅男朋友,唔再係你身邊嘅一隻‘萬能兵’、只能夠唯命是從,從此亦都有資格去問你野,唔再驚你瞞住我。





「樂兒,你以後唔好再有野瞞住我好唔好?有咩都同我講,唔理有咩事我都一定會幫你。」

「嗯嗯,我有個咁愛我嘅男朋友唔搵你仲搵邊個,我緊係第一時間搵你。」

「抵錫。」

說罷我又錫左佢一陣。

「係呢阿洋,但你係點知浩正唔會再返黎搵我?同埋你又點知佢手機啲相已經del晒?」

「嗰晚其實發生咩事,點解佢識自己升左起身?係咪…係咪關靈異野事?」

我地再錫左一陣之後,樂兒突然一輪嘴問起關於嗰晚啲野,睇黎睇唔到阿盈嘅佢對嗰晚真係好疑惑,





既然佢嘅野我都已經知道晒、亦都成為左我女朋友,我應該都係時候講俾佢聽,我估阿盈應該都唔會介意。

「樂兒你冷靜啲先,其實嗰晚的確有啲野發生左嘅,係你見唔到嘅野…」

「哦,你頭先先叫我有野唔好瞞住你,原來依家你仲有野瞞住我嘅。」

然後樂兒笑住指住我抓我錯處,講返頭先我講嘅野,我眼角望左望企係床尾嘅阿盈,佢向我點點頭,即佢允許我講出黎。

「唔…唔係架,呢樣野我唔可以隨便講出黎,同埋呢樣野一直都有發生先啱,其實我有個阿妹默默咁守護住我,後巷同軍營嗰次都係靠佢幫我地先走得甩。」

「我冇聽過你有阿妹嘅?你指嘅阿妹係…?」

「佢唔係我親生阿妹,係一個死後我認嘅阿妹,佢原本係我嘅中學同學,佢同我以前一樣都係俾人恰嗰啲人,生前因為我幫過佢所以熟絡左。」

「而死後我咁啱搬左入佢生前住嘅地方,就係咁我地重新走埋一齊,經歷左啲事之後我地就正式相認左做兄妹,之後我地就相依為命互相幫助。」





「仲記唔記得我地第一次見面你黎我門口屌我嗰次,嗰陣我第一眼就認定你係mk妹。」

「都話叫你唔好再叫我mk妹。」

我一講佢mk妹三個字,佢就扮嬲咁輕輕打左我一下。

「我一直都唔明點解你咁抗拒mk妹呢三個字?都係講下架姐,係咪又有啲咩隱情?」

「唉,其實我唔想變到咁霸道咁爛口咁衰,我好對唔住我啲朋友,雖然我表面係mk格,但我並唔想咁、我接受唔到我係人地眼中係壞透嘅mk妹,一切都係因為我俾晒啲錢俾浩正。」

「我冇錢但又衰要面同唔想咁寂寞,覺得唔可以俾人睇死,所以先扮到一個大家姐款同埋好高貴周圍買名牌野嘅假象俾人睇、所以先唔想俾人話我mk妹。」
已有 0 人追稿