【真人真事改篇】《有一種距離，是HKU和IVE仔的距離。》/《初戀2000天》: 第八章上 「我不會講你知 其實是第幾次 和他相見 應否叫作外遇」 〈告白〉

第八章上 
         「不如我地去試下佐敦新開嘅壽司店囉？」James牽著Jessie的手問。
         James知道佐敦剛開了間壽司店，愛吃壽司的Jessie想吃好久了。
         「你有訂位咩？」Jessie張大眼睛，期待地看James。
         「無喎，要訂位先入得架？」
         「咁又唔係⋯⋯但好多人喎，無訂位要排成兩個鐘！」沒耐性的Jessie只要想到要等兩小時就怕。
         「今日平日可能唔洗呢！」
         「係咪架，唔好啦，我已經好肚餓，一陣仲要排隊嘅話，我驚我會爆炸。」Jessie搖頭說。


         「試下啦，要排隊就食第二間，有車啦，上車啦！」Jessie還未來得及說不，就被James拉了上車，只能暗暗希望不用排隊。
 
         靠著Jessie帶路，終於來到壽司店門口。
         電梯門剛打開，滿滿的人潮堪比維園年宵。
         Jessie本來白晳的臉瞬間披上層灰，當走到門口準備按制取票時，發現還要等二百位才到自己時，Jessie的臉更是像炭一樣黑。
         「都話咗架好多人架啦，你又唔預約，次次都係咁。」Jessie嘟起嘴巴，眼睛看著地下，交叉著手抱怨起來。
         「又估唔到佢真係咁好生意喎，都唔知係咪真係咁好食嘅，下次我帶你去日本食仲好食呀。」James嘗試哄回黑面的Jessie。
         都唔知係唔係嘅⋯⋯Jessie掙開James的手，徑自往電梯門走去。
         「去邊呀？」James連忙追上去。
 


         回到馬路旁的行人路，Jessie依然沉默不語，害James不知如何是好。
         「你有無其他野想食？」James再次牽起Jessie的手，卻被Jessie掙脫。
         剛巧，他們經過一間珍珠奶茶店，James跑了進去。
         「唔該要杯珍珠鮮奶茶，加珍珠、芋圓、小丸子、布丁、仙草同奶蓋。」James看著餐牌說，決定把所有Jessie愛吃的東西都加進這杯珍珠鮮奶茶。
         「先生，你確定要加晒咁多野落去？」店員懷疑地看眼前這個傻子。
         「係呀，仲有常溫微甜呀，唔該。」James想起不嗜甜的Jessie在來M不可以喝有冰的飲料，連忙補充道。
         過了約十分鐘，飲料終於好了，James把粗吸管插入後，遞到Jessie面前。
         雖然Jessie還在不爽，但還是馬上接過飲料，和一般港女一樣，Jessie拿上手的第一件事不是喝進肚裏，而是先孝敬手機，一連拍了好幾張照，才一口氣喝下去，嘴巴瞬間擠滿配料。
         「哇，依杯野真係⋯⋯好豐富，唔單止口感，味道都係。」Jessie終於願意說話了。
         「等我試下，」James喝了一口，「味道好似⋯⋯唔止豐富，仲有D怪。算啦，唔好飲啦。」James皺起眉頭，開始後悔沒聽店員說的話。


         「咁又唔好，D芋圓同小丸子都幾好食呀，唔好晒咗佢！」Jessie說完又喝了一大口，臉上的炭一樣黑的臉好像逐漸被手上特製的珍珠鮮奶茶沖淡。
         「算啦，食依間啦，睇落好似幾吸引。」經過一間日式料理店，Jessie提議道。
         「好！就依間啦。」James沒有看餐牌和價錢就進去了。
 
         「我要食三文魚壽司、炙燒左口邊壽司、海膽壽司、中拖羅壽司、刺身拼盤，仲要炸蝦天婦羅、炸芝士波⋯⋯」Jessie被餐牌上的圖片吸引得不禁咽起口水來，「會唔會食唔晒架？」
         「想食就嗌啦，食唔晒就慢慢食。」儘管James知道Jessie每次都是眼闊肚窄，還是鼓勵她點自己喜歡的。
         「咁你呢？你食咩？」
         「我要個鰻魚飯得啦。」James餐牌都沒打開過。
         因為James根本不喜歡吃海鮮，尤其是刺身、壽司這些，但只要Jessie喜歡，James都願意陪她吃。
         點完餐，James忙著替Jessie倒醬油、芥辣和抹茶粉，Jessie則忙著把剛才拍的珍珠奶茶上傳到Instagram的story。
 
         約十五分鐘後，美食終於陸續來了。
         拍照後，Jessie馬上把肥美的三文魚送進口裏。
         「嗯，好好味呀！」三文魚融化在舌頭的瞬間，口腔充滿三文魚香滑的油脂，滿滿的幸福感在Jessie口中化開，Jessie忍不住捏緊拳頭，嘴角向上揚，臉上掛起滿足的笑容，眼睛都忍不住閉起來，好好享受這場與三文魚的甜美約會。
         James最愛看Jessie吃美食時的樣子，那天真無邪的幸福樣子，讓他忍不住告訴自己，要帶她吃遍這世界的美食，要繼續寵溺她，甚至一度欺騙了他動了想要吃海鮮的心，可怕腥的James最後還是忍不住吐了出來，抱怨Jessie欺騙了自己的感情。


         「要唔要試下我碗鰻魚飯？」James把饅魚飯放到勺子上，然後小心翼翼地送到Jessie的嘴裏。
         「好食呀！」Jessie眼前一亮地看著James的鰻魚飯。
         「好食呢，食多啖呀。」James繼續把自己本來就不多的鰻魚飯送到Jessie口中。
         「你唔肚餓咩？」Jessie雖然口裏說著擔心James會餓肚子，可嘴巴卻很誠實，把鰻魚飯一口吃了進去。
         「我唔肚餓呀，黎之前我食咗華御結嘅飯糰。」James接著把一口鰻魚飯送到自己口裏。
         「好味咩？」
         「麻麻啦。」James搖搖頭說。
         「咁你又食？」Jessie又把一塊中拖羅放到口裏。
         「好嘅留比你食，我食D普通野就夠架啦。」說完，James又把鰻魚飯餵進Jessie口裏。
         Jessie忍不住盯著James來看，身體感受到一股幸福的暖流正在流過。
 
         「多謝你六百一十九蚊。」侍應把賬單遞到James面前。
         James掏出兩張五百元鈔票放到帳單上。
         「多謝。」
         大快朵頤的Jessie看著帳單忍不住瞪大了眼睛，說：「乜我地食咗咁貴？」


         「唔貴，你食得開心就唔貴。」James抓著Jessie放在桌上的手，寵溺地看著Jessie說。
         「開心唔一定要食咁貴嘅，」Jessie心疼起James的錢包來，要知道這幾乎是James上兩天Part-time才賺到的數字，「記得中學放學嗰陣，我地都係食M記、譚仔，但都係咁開心。下次都係食返平D啦。」
         「你鍾意啦，最緊要你開心。」James看著Jessie寵溺地說。
 
         「我要去補習啦。」Jessie在車站旁說。
         「好啦，咁你加油啦。」
         「唔滯，我唔想去補習，我想癡住你。」Jessie緊抱James，靠在James的胸膛上說，大概是剛被美食沖暈了頭腦。
         「唔得，我地講好咗要一齊努力架嘛！乖啦，最多我今晚同你Facetime？」James愛惜地摸著Jessie的頭髮說。
         「唔得呀，我今晚返去仲要睇埋張愛玲D書，聽日要Present。張愛玲D小說真係好狗血，睇到我直程想Dum咗本書佢。」
         「係咩？」James一本張愛玲的書都沒看過，也沒興趣看。
         「葛薇龍真係好傻，明明咁靚女，偏偏要同個廢到得返個樣嘅喬琪喬一齊⋯⋯」Jessie的話飄進了James的耳朵，好像聽到了，卻又好像沒聽到。
         「你有無聽到我講野架？」Jessie見James沒反應，忍不住從他的懷裏跳出來問。
         剛巧，巴士來了，James內心鬆了口氣。
         「緊係有！快D上車啦，唔係遲到啦。」Jessie瞇起眼看James，一臉「我才不相信你」的樣子，準備上車。
         Jessie快要上車之際，James突然把她拉到自己跟前，捧著她的腦勺子，再把自己的嘴巴貼上，用力地親了Jessie一口。


         雖然已經五年多了，但Jessie還是心跳不已。
         「好啦，拜拜啦。」
         「好啦，要掛住我呀！」Jessie終於不忍地踏上巴士。
         「知道啦，傻瓜。」儘管Jessie已上了車，James還是站在車站看著Jessie，直至巴士已遠得看不見踪影他才離開。
 
         James拿出手機，都是Kay傳來的信息。最後一則是一小時傳來的，寫著：「我今日係IG見到佢同新女朋友嘅合照，我好唔開心。你可唔可以陪我？」