【真人真事改篇】《有一種距離，是HKU和IVE仔的距離。》/《初戀2000天》: 第八章下 「我不會講你知 其實是第幾次 和他相見 應否叫作外遇」 〈告白〉

https://www.youtube.com/watch?v=wlY0VC-7OMg
第八章下 
         James拿出手機，都是Kay傳來的信息。最後一則是一小時傳來的，寫著：「我今日係IG見到佢同新女朋友嘅合照，我好唔開心。你可唔可以陪我？」
         自那天起，Kay和James每天都會WhatsApp，有時是Kay找James尋求安慰，有時是James忍不住主動關心她。
         誰也沒提過那天的那個吻，就像甚麼也沒發生似的。
         James想起Kay哭的樣子，是那樣楚楚可憐。
         「好，你想去邊？」James回覆。
         「九龍灣等？」Kay回覆。


         「好。」
 
         來到九龍灣，James馬上從人群中認出粉紅色頭髮的Kay。
         「咁快到咗嘅你，我地去邊？」James走到Kay面前。
         「唔知呀，其實我無邊到想去，只係好唔開心，想搵人陪。」Kay悶悶不樂地說。
         這天的Kay雖然心情不好，但還是悉心打扮過，化上了久違的妝容。眼蓋塗上略帶橘紅的啡色眼影，本來已經潔白無瑕的臉頰抹上淡淡的胭脂，嘴唇也塗上了粉紅色的唇彩。
         James想起，Jessie不開心的時候，最喜歡吃美食。
         「你食咗野未？」James問。
         「未呀，無胃口。」Kay看著人來人往的地板，目光呆滯。
         「跟我行。」James走在Kay前面。


         也許是下班時間，人特別多，走著走著，Kay幾乎看不見James的身影。
         「太多人啦，我爭D跟甩你。」Kay好不容易追上James的步伐，拉著James的手臂說。
         「一係你拖住我衫尾行啦。」James提議。
         Kay點點頭，捉著James的衣角，穿過隧道，旁邊是一排賣小食的街邊檔。
         「哇，嗰檔好香！」Kay用力聞了一下，便跑去了一檔生意不俗的串燒檔前。
         小小的爐裏放滿炭，炭上放了張小小的鐵絲網，上面佈滿幾肉串。小販在變了色的肉串上撒了點孜然粉，受刺激的炭火燒得更旺盛，不時濺起微弱的火花，味道更香，考驗路人的耐力。
         「你想食呀？想食邊隻？」James跟著Kay走到早已圍滿人的攤檔前。
         「雞肉！」
         「唔該要一串牛肉，一串雞肉。」細心的James想起Kay不吃辣，馬上補了句：「走辣，唔該。」然後掏出錢包，拿出錢包內所餘不多的百元鈔票，放到小販戴著手套的手上。
         過了約十五分鐘，小販把一袋油膩膩的紙袋放到James手上。


         James抽出一串雞肉串，遞到Kay手上，然後拿出自己的豬肉串。
         Kay張開櫻桃小嘴，咬了一大口，咀嚼了幾下，馬上露出一個甜滋滋的笑容說：「好好味呀，你都試下。」把雞肉串遞到James嘴前。
         James沒想太多，咬了一口。
         「係喎，好滑，仲好想炭燒味！你要唔要都試下我嗰串？」James把未咬過的豬肉串遞到Kay面前，Kay又咬了一大口。
         「喂！你咬咁大啖架，比你食晒啦。」
         「咩喎，小氣鬼！」Kay邊忙著咀嚼口裏的豬肉串邊說。
         「講笑咋，」James笑著看Kay，「你鍾意食我咪買多幾串囉，難得你大小姐肯食野。仲有無咩想食呀？」
         Kay環視了一周，又發現了新獵物，拖著James的手又跑了過去。
         James看著被Kay拖緊的手，有一種奇怪的感覺湧進心頭。
         「我想食芋圓仙草呀！」Kay小孩似的看著透明玻璃兜裏的芋圓，剛才的鬱鬱不歡彷彿不曾存在，「仲有隔離檔葱油餅好似都好好食。」
         果然女仔都係鍾意食依D，James心想。
         「好好好，你食埋串串燒先，只要你笑返，你想我陪你食咩都得。」James對Kay說。
         黃昏的太陽雖無害，但還是那樣耀眼，灑在Kay身上，像是為她鍍了層薄金似的，在James眼中好不閃耀。
 
         吃過街邊檔後，James陪Kay在附近的MegaBox逛了好一段時間，把Kay送回家後，再回到自己的家已是晚上十一時多。


         這時手機響起Jessie的FaceTime Call。
         James馬上按了接聽。
         「又話今晚唔FaceTime？」James坐在沙發上說。
         「掛住你呀嘛，為咗你我搭車都拎出黎睇，睇晒啦！係咪好叻？想唔想聽我分享下本書嘅內容呢？」Jessie興奮地說。
         手機裏的Jessie大概剛洗好澡不久，頭髮還有點濕。
         「我想睇你多D。」口甜舌滑的James說。
         「姐係唔想聽啦？」Jessie對此卻完全不收貨，一眼識破James的內心想法。
         「邊係呢，你講啦，我洗耳恭聽！」James一臉真誠地說。
         「呀！！」Jessie那邊突然傳來尖叫聲。
         「邊個咁夜仲係到叫？」James奇怪地問。
         「唔知喎，聽聲好似係天台傳黎，可能壓力太大掛？大學真係好多癡線佬，試過凌晨三、四點有人係下面踢波踢到嘭嘭聲，訓都訓唔到。」Jessie 埋怨道，發現疲累的James好有像有點心不在焉。
         「你個樣咁攰嘅，啱啱去咗邊嚟？」Jessie知道James根本不想聽，已沒心思再和他分享。
         「無呀，啱啱同班兄弟去咗食飯咋嘛。」James面不改容地說。
         「你之前無講過嘅？」
         「係咩？係咪你太忙唔記得咗咋？」


         「有咩？可能啦⋯⋯」Jessie努力回憶James說過的話。
         「我今日出咗汗好唔舒服，我出個涼再打比你？」James說。
         「好啦，拜拜。」Jessie不捨地掛了線。
 
         洗澡後，回到床上的James拿出手機，看到他的好兄弟傳來的誘惑。
         「打機？」這是只有三個人的群組，裏面只有James和相識多年的中同Lemon和K 哥。
         「不了，聽日八半。」James想起今天對Jessie的承諾。
         「一鋪OK？有野想講。」Lemon嘗試游說James。
         女人喜歡High著Tea說是非，男人則是打著機說瞎話。
         James想起自己也有說話想說。
         「K哥呢？」James問。
         「98！」K哥回覆。
         「屌！」看著自己的角色死去，James氣得直拍鍵盤。
         「死咗咪好囉，專心聽我講野。」Lemon見James死了，馬上也隨之而去。
         「洗耳恭聽！」James嘴裏這樣說，可眼睛仍忍不住盯著遊戲畫面。


         「話說，我條女嬲咗我，我可以點氹返佢？」Lemon對著耳機問道。
         「你無頭無尾點答你？」James說。
         「琴晚咪阿仙奴對曼聯嘅，佢係咁打黎話肚餓要我陪佢出去食宵夜，我屌！我明明一早講咗琴晚要睇波，然後佢話姐係睇波緊要D啦？就嬲撚咗我。」Lemon愈說愈激動。
         「佢平時食唔食宵夜架？」K哥問。
         「食撚咩，佢成日話要減肥！」Lemon生氣地說。
         「你知唔知你輸咩？」K哥問。
         「咩？」Lemon問。
         「你依D咪輸經驗囉！」K哥說，「條女就係知你要睇波先突登打黎嘈你，就好似呀媽跌落海同佢跌落海，你救邊個先一樣，想陰9你咋傻仔！」
         「係咪呀？講到咁了解女人，又唔見你依個A0仔溝返條女返黎我睇下！」Lemon懷疑地說。
         「我只係唔想好似你D傻仔咁要比女奴役，哥不愁沒有女，OK？」K哥故作自信地說。
         「話時話，如果你地遇到個女仔，啱啱分手，好傷心，成日係到喊，Lemon會點做？」沉默不語多時昨James終於說話了。
         「我？我見到咪安慰下囉，你問得姐係你遇到啦！」Lemon說。
         「我最近係IVE識到個女仔，啱啱比仔飛，好似好慘，飯又唔食，成日喊，我咪陪佢食飯囉。」James說。
         「我覺得食飯都OK嘅，最弊D女唔係咁諗，自己睇路啦你！」Lemon想起女友生氣的臉不禁搖搖頭。
         「佢問得一定唔止食飯，一定大鑊野！」看通世事的K哥說，「唔洗問，一定錫咗啦！」


         K歌猜中了James的心事，James沉默了。
         「唔撚係掛，你傻撚咗呀？」Lemon難以置信地說。
         「屌，Jessie對你咁好，佢都未Come On你，你竟然搶先一步Come On Jessie！」K哥也忍不住罵他。
         「誤會姐，我無諗過要Come On Jessie，我仲係好愛佢，我只係唔想嗰個女仔唔開心。」James努力澄清。
         「收啦，咁多年兄弟，又唔見我唔開心你即刻安慰我！Jessie咁好，好心你咪撚Hurt人，到時日日喊嗰個就到佢。」K哥激動地說。
         身為中學同學的Lemon和K哥馬上替Jessie感生氣。
         「我只係唔小心錫咗一次，之後已經無啦，我同佢Frd黎咋。Frd有難唔通唔幫咩？」James堅持自己沒有變心。
         「你依家未有野姐，繼續落去好難講，我唔該你醒少少，即刻疏遠嗰個女人！」K哥說。
         「你口密D添呀，千祈唔好比Jessie知道你D衰野，唔係死緊，我唔係話你呀，我係話Jessie實傷心死！」Lemon警告James。
         「得啦得啦，聽朝八半，訓先。」引來一陣謾罵的James馬上下了線。
         「鈴鈴鈴！」當James準備睡覺時，手機響起了。
         是Kay的頭像。
         Lemon和K哥的聲音浮現在James的腦海。
         James搖了搖頭。