女朋友自殺死左，但事情似乎唔係咁簡單: 一

生死無命。

守一從來都冇唸過自己會有女朋友。

更何況佢一直以來都係班上面最普通既人，係每一個青春校園故事入面連名都唔會有既茄哩啡，永遠都係佈景板入面最唔起眼嗰個。但事情有時就係咁令人驚訝，就好似點解陳帆咁靚仔就係都要禿頭髮。

如果守一有女朋友令人驚訝的話，嗰位「她」既身份一定會更令人費解，或者沮喪——至少大多數認識守一既人都係咁唸。

思竺，特別既名，人更特別，係佢嗰級係出曬名既靚女。而同佢精致高冷既樣唔同既係，思竺真係活躍又好人，同班幾乎冇人唔中意佢，班男仔仲要好想屌佢添。





至於守一，佢從來冇咁唸過。唔係唔敢唸，而係......

點會係我啊......守一成日都咁唸。

邊有咁多童話故事啊？雖然每個人既身邊總會有幾個，但永遠都唔會發生係自己身上。

就算嗰晚，思竺要求守一送佢返屋企——BBQ完，天色夜，佢兩個又住得近，順理成章啊。冇人起哄，亦都冇人覺得有任何問題，包括守一，但唔包括思竺。

「陳守一，你以後都送我返屋企好唔好？」





十字路口咁岩轉燈，兩架巴士踩油加速，爭先恐後。

「下？你講咩？」

「我話......陳守一，你以後都送我返屋企好唔好啊！？」思竺聲量提高左兩個level，前面一個染綠色頭髮既男仔差啲噴出口入面所有既珍珠奶茶，擰轉頭望左望守一再望左望思竺，隻眼突到好似就來彈射出窗。思竺紅都面埋。

「可...可以啊。點解無啦啦咁講既？」

佢get唔到。





所有人都咁唸，好似有數道嘆氣聲圍住思竺同守一轉。

啫係...思竺擰轉頭唸左唸，突然伸出手拖住左守一既右手。

「啫係呢個意思啊！使唔使我講到咁白啊on9！」

守一明白了。佢好明白了。

佢係遲鈍啲，但絕對唔係傻，佢初中參加解謎比賽攞左獎添。愛情咪啫係解迷？定唔同？我唔係好知，總之守一係咁講。

思竺隻手掂到守一嗰刻，守一成個身好似觸左電，大腦霎時好似一張白紙咁。而白紙既中央有一行好細好細既字，要攞放大鏡先睇到：

點會係我啊......

冇人知。





二個月後，都係冇人知。

照理來講，同思竺好friend既嗰幾個女仔應該知，但竟然連佢地都唔知。

思竺冇同任何人講，除左守一。

「因為我中意你。」

「哦...好...」每次守一聽到都唔知比咩反應好，紅住面凹頭，頭皮損曬都唔知講咩好。

「多謝你。」

有咩好多謝呢？守一講完都覺得好on9，好想搵個窿捐入去。





「哈～」思竺會覺得咁樣既守一好可愛，銀鈴般既笑聲不絕。

笑緊既佢好靚啊。

守一心入面默念。

點解佢會咁靚？守一從來都唔覺，但自從佢地兩個近距離相處既時候，守一第一次仔細看清楚思竺既樣，連思竺既耳仔紅曬都被佢睇得一清二楚。

守一覺得好開心。

「你情人節送咩比我？」

「errrr…會直接問對方送咩架咩？」

「哈哈～我就係中意問啊！」





「......唔話你知，留返啲驚喜比你。」

「點解wo…...聽日都係啦！我想知啊！」

思竺翹住守一既手臂撒嬌，守一心唸仆街有少少扯旗添...

思竺見到守一微微彎腰面露難色，兩隻大眼眨了兩下，露出恍然大悟既樣。

「陳守一，你唔會係唔記得買禮物比我啊嘛？」

「點會呢？」守一見思竺好似有啲誤會，即刻擺手澄清到。

「我真係想留啲驚喜比你啊。」





思竺瞇眼，面露質疑既眼神。隨即佢好似唸到啲咩，係書包入面攞左個細盒出來。細盒打開，係兩個皮革手鈪。

「我自己整架，整得靚唔靚啊？」

守一呆了一呆。

「靚啊。」

呢句係真心既。

思竺都唔得閒理佢係真心定敷衍，佢攞其中一個戴左係思竺既左手腕，跟住拎起另一個戴係自己既右手腕度。

「嗱，情人節禮物。比左你先，咁你就一定會送返比我。」

「多謝你啊。但點解你會咁唸既？」

「陳守一，你一定會！」思竺用好肯定既語氣強調：「唔係既話你一定會愧疚到死。我仲唔了解你？」

講完佢就跑開，守一追左上去，冇留意到佢耳仔又紅曬。

我點會冇準備禮物比你啊。守一望住思竺消失係佢屋企既大門口，心入面默念。

情人節唔係公衆假期，高中生都係要上堂。守一特登早起身去搵思竺，然後一起返學。其實守一每日都會係巴士站等思竺，今日特登去佢屋企樓下等。思竺住村屋，同守一屋企相隔唔遠。

守一右手拎住準備既禮物，手鈪戴係左手手腕上。佢望左望手鈪，微微一笑。

「真係好有象徵意義。」佢自言自語道。

行入村口，好快就見到熟悉既嗰棟村屋。

有架白車同架警車係門外。

守一個腦「嗡」左一聲。

幾個急救員簇擁住一副擔架。

「方太你冷靜啲先！」

有個女人都係跟係擔架後面。好似喊緊。佢係思竺阿媽，守一係家長日見過。

所有人好快入左去白車。

守一戴左隱形眼鏡，思竺兩個星期前教佢既。

守一來唔切望清楚氧氣罩後面既樣，但佢睇到嗰個人既右手。

皮製手鈪。

守一既頭嗡嗡作響，差啲一嘢暈左過去。

（未完待續）