［愛情甜故前傳--無糖純愛］曾經嘅我地，都係兩條平行線⋯: 08. 維護着，說好話，澄清

翌日朝早嘅班主任時間，Miss Yiu一大清早就好似想噴火鬧人咁

「葉子朗你同我企起身！我唔係叫你交作文㗎咩？作文呢？」Miss Yiu嘅目標又係葉子朗

本來我仲托住頭喺度發緊呆，但聽到Miss Yiu嗌葉子朗嘅時候，莫名其妙地回了神，然後望向葉子朗

「我交咗啦。」葉子朗緩緩企起身，一臉不耐煩，「交咗喺你簿櫃。」

其實呢一刻我想幫佢講好說話㗎…因為琴日我親眼見到葉子朗份功課的確喺簿櫃入面，自己仲幫佢放好咗



唔通係因為我放咗喺側邊，所以Miss Yiu見唔到？

正當我想直接企起身開口幫葉子朗講好說話嘅時候，Miss Yiu望向我

「Venus！」Miss Yiu望向我，雖然臉上仍然掛着少許不悅，但語氣明顯地柔和咗好多，「琴日葉子朗有冇留喺課室做份作文？」

「嗯，有呀。」我肯定地點點頭，心中希望Miss Yiu唔好再責備葉子朗，因為佢的確係交咗功課

「佢係咪做完先走？」Miss Yiu又問道



「嗯。」我再點點頭，「我釘好筆記之後再放落去你簿櫃嘅時候，都見佢份作文喺你簿櫃入面。」

「我咪話咗我交咗囉…佢都見到我份嘢…」葉子朗一臉不悅，輕皺起眉頭

「Miss Yiu，佢真係交咗喺你簿櫃。」我見Miss Yiu有啲猶疑咁，就即刻開口又講道

「咁我陣間再落去check多次啦，坐低啦。」Miss Yiu對葉子朗講道

葉子朗仍然板着臉，但咩都冇再講就坐低



我望向葉子朗，見到葉子朗被冤枉，心中有啲在意，因為佢的確係交咗，但Miss Yiu唔信之餘仲要一入嚟就開火鬧佢

「明明就係Miss Yiu自己睇唔到…」我喺心中默默為葉子朗抱不平，「鬧人之前都問清楚先嘛…」

葉子朗面無表情咁望住前方，又耷低頭撥一撥頭髮

我留意到葉子朗嘅表情，見佢無辜被鬧，做便默默咁耷低頭

因為我好似冇幫到佢啲咩咁，明明佢真係交咗㗎嘛…不過其實我都做咗我可以做到嘅事

英文堂嘅時間終於過咗一半，大家睇落都已經有啲攰，畢竟第一堂就上英文堂，的確又係真係慘啲嘅

我將頭側去左邊然後又側向右邊，拉一拉筋，挺一挺直坐

「Let’s take a 15 minutes break.」Miss Yiu似乎都留意到大家都已經冇心機聽書，便主動提出放個小休比大家



Miss Yiu行咗出課室，我估應該就係打算再落簿櫃睇下葉子朗份功課喺唔喺度

「芷諾，今日放學教我功課呀～」靜愉細聲咁同我講

「可以呀～」我比咗個Okay手勢，然後就伏低喺枱面，心中細聲講道：「如果可以搵個機會同佢講嘢就好…」

莫名其妙地心中有啲想同佢搭話，我都唔知點解心中會突然冒出咁樣嘅諗法，不過我對佢好似又有啲好奇

平日要搵機會同佢搭話真係冇咩可能嘅事，因為佢真係好靜，而且好難行近佢，你都未行到佢隔離，佢好似已經要處處提防你，驚你會做啲咩傷害佢咁

琴日同佢講到別完全係偶然，如果唔係佢冇嗰張紙，佢都唔會問我借；課室冇人嘅話，可能佢會直接走，連做都唔做，咁今朝Miss Yiu就真係會鬧到佢飛起…

我微微側着頭伏着，眼睛卻不自覺地偷偷地瞄向葉子朗，嗰種心動嘅感覺又嚟啦…



「噗噗、噗噗、噗噗！」心臟跳動嘅聲音，強到我自己都聽得見

心臟嘅跳動快到好似要心臟病發一樣，完全冇放緩嘅意思，一直強而有力地跳着

「方芷諾！冷靜啲！」我合起雙眼喺心中同自己講道，想自己嘅再次平靜落嚟，「方芷諾！冷靜…冷靜…冷靜啲…」

心跳嘅感覺真係不得了，我已經好耐都冇試過有呢種感覺，對上一次有心動嘅感覺，已經係啱啱情竇初開，中意周樂恆嗰陣…

「係唔係…唔承認都唔得啦…」我有啲羞澀地低頭，臉頰都泛起淡淡嘅紅霞

去到放學嘅時候，因為要教靜愉做功課，所以我同靜愉留喺課室

葉子朗企喺位執緊嘢，靜愉將自己張枱移過嚟我張枱隔離拍埋，方便我教佢

葉子朗一直喺度，我一直冇辦法靜下心來，成個腦海都係空白一片，什至連靜愉嗌我都唔知



「芷諾，呢度要點計呀？」靜愉遇到唔明嘅地方，便問道，「芷諾？」

我一直偷用眼尾嘅餘光偷瞄葉子朗，直至葉子朗從坐位行向課室門口，我先稍微抬頭望葉子朗嘅背影

「芷諾！」靜愉捉住我嘅手臂搖咗兩下，我嗰下先醒過嚟




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link