［愛情甜故前傳--無糖純愛］曾經嘅我地，都係兩條平行線⋯: 09. 一想到他，心如鹿撞

「係？」我回神過嚟望向靜愉，「做咩呀？係咪有邊度唔識？」

「你呆咗咁做咩呀？」靜愉輕皺起眉頭望向門口，「啱啱望緊咩呀？」

「冇、冇咩…」我瞬間微笑道，然後望向靜愉嘅功課簿，「有邊度唔明呀？」

「有古怪…」靜愉眯起眼睛望住我，「我嘅直覺話我知你一定有啲咩…」

「冇呀，你嘅直覺出現錯誤啦！」我連忙搖搖頭，露出笑容，掩飾自己啱啱「發呆」嘅事



「做咩啫～你一定有啲咩嘅…」靜愉眯起眼睛，似乎唔太相信我講嘅嘢，「快啲講！你有咩瞞住我？」

「冇呀～」我當然先是否認，因為靜愉一知道嘅話，一定會即刻叫我放膽去追之類

「你一定有啲嘢嘅～」靜愉伸手指住我嘅鼻尖講道

「遲啲先話你知～」我笑了笑，故意賣個關子，雖然我心中覺得靜愉咁了解我應該大概都會估到

「咁神秘？」靜愉一臉疑惑，手摸摸下巴，突然靜咗落嚟



靜咗兩秒之後，靜愉突然揚起嘴角笑起嚟，睇嚟靜愉已經估到咩事，我頓時移開了視線，低頭望功課簿

「我估到啦！」靜愉突然大聲嗌出嚟，我比靜愉突然講嘅嚇咗一跳，抬頭望向靜愉，只見靜愉再眯起眼笑道，「你係咪有新對象？」

靜愉嘅說話一擊即中，直到紅心，我有啲心虛咁微微耷低頭

「我講中咗呀真係？」靜愉一臉興奮同好奇，「邊個啫邊個啫？我地班㗎？」

我感覺到我嘅臉頰瞬間紅起嚟，唔知比咩反應好



「邊個呀？」靜愉再三追問，「講我知啦～邊個啫？」

「唔講你知住呀！你做埋份功課先講你知！」我沒好氣咁講，亦知拗唔過靜愉，最後都係屈服

「你話㗎！」靜愉瞬間對功課充滿幹勁同熱誠，「快啲教我做啦！」

過咗半個鐘之後，靜愉終於將份數學做晒

「做完～」靜愉一下子將功課簿合上，然後一臉期待咁望向執緊嘢嘅我，「到底邊個啫？係咪我地班㗎啫？」

「係呀，係我地班㗎…」我細聲地回答道

「會係邊個呢…」靜愉一邊放嘢入書包，一邊努力咁諗喺班上面有咩男仔，「讀書得唔得㗎？」

聽到靜愉嘅問題，我不禁笑了笑，搖一搖頭，呢個回答頓時就將範圍縮小咗好多



「坐你附近㗎？」靜愉又問道

「都…」我諗咗一陣，葉子朗都算坐喺我附近嘅，「算係嘅…」

其實我同葉子朗個位唔係真係隔得好遠，我個位同葉子朗坐嗰行都係中間隔咗靜愉嗰一行，咁都算係附近嘅

「坐你附近嘅話，咁即係都算係坐我附近啦～」靜愉將範圍收窄到坐喺課室後排嘅人，然後開始諗我剛才比嘅提示，「坐我地附近…唔讀得書嘅…今日有冇老師嗌過佢名？」

「呢個咩問題嚟㗎？」我無奈咁望向靜愉，然後企起身孭書包，整番好校裙，「有呀…」

「今日老師有嗌過嘅…」靜愉正接近嘅正確答案，「今日都唔係嗌過好多男仔啫…唔讀得書嘅話一定唔係男班長啦～咁即係…」

靜愉靜咗兩秒，然後靈機一動，佢已經打開咗答案嘅盒子



「哦！葉子朗！」「噓…！」

靜愉一聲大叫，嚇得我即刻行到靜愉面前，緊張地將食指抵喺唇前

「我未係好肯定我係咪中意佢㗎！」我細聲咁講，一臉羞澀地捉住靜愉嘅手腕，「只係有啲留意佢，有啲在意佢咋…」

「你咁都唔係中意佢？」靜愉一臉愕然

「未肯定啦未肯定！」我鼓起兩泡腮，「只係對佢有啲好感囉…」

「但佢有咩咁吸引你呀？」靜愉轉身邁步行，一臉疑惑咁望向跟喺身後嘅我

「咪就係琴日比賽嗰陣，突然望到佢嘅時候就心跳加速啦…」我微微耷低頭，嘴角不自覺地帶着半點笑意

腦海中又浮現出琴日佢比賽嗰陣嘅模樣，就係一個瞬間，只係一個瞬間，頓時就將我嘅目光吸引住



「就係咁？」由靜愉嘅表情中可以知道，佢仍然唔太理解，到底我中意藏子朗啲咩，「到底你中意佢啲咩呀…佢讀書又唔係好，個人又唔係好…」

「咁成績唔可以代表嗰個人嘅好壞㗎嘛～」我隨口講咗一句，靜愉頓時就對我反咗一個白眼

「你洗唔洗一嚟就幫住人講好說話呀…」靜愉無奈地望向行咗喺佢隔離嘅我

睇嚟宜家呢一刻，我講咩都好，喺靜愉嘅耳中都係幫緊葉子朗講好說話




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link