［愛情甜故前傳--無糖純愛］曾經嘅我地，都係兩條平行線⋯: 10. 你推門走進我心

「咩呀～」我無奈地笑起嚟，心中突然諗起葉子朗：「唔知今日佢會唔會喺樓下打波呢～」

一諗起葉子朗，我嘅腦海中開始自動咁就諗起葉子朗嘅身影；一諗起葉子朗，心臟又開始唔聽話

「咩呀～」靜愉學我咁講嘢，博頭仲要郁咗兩郁，「但唔好話我打沉你，葉子朗呢啲男仔肯定唔容易受女仔溝。」

「唔緊要啦～我都唔知會唔會中意得耐，而且我都冇打算話要表白之類～」我聳聳肩，「我都知佢好cool…」

諗起葉子朗平時講嘢都係一句起兩句止，都唔知佢係cool慣咗定係唔想開口講嘢



我都預咗我同佢其實點都好，都唔會有結果…我應該中意一段短時間就會放棄㗎啦～畢竟佢都只係我生命中嘅過客啫

「其實我都唔知佢有咩咁吸引…」我雙眼望住前方，不自覺地開口講咗句

「但你唔係中意佢咩？」靜愉聽到之後有啲疑惑亦有啲訝異地反問道

「好感囉…」我微微耷低頭，嘴角微微地揚起一點，細聲地道，「又唔係話好中意好中意嗰種…」

「咁佢同周樂恆比，邊個比較好？」靜愉突然提起周樂恆



聽到呢個熟悉又陌生嘅名子，我早就已經唔再躲避，亦唔會再有動心嘅感覺

但我仍然會自然地靜咗落嚟，默默地停低咗步伐企喺梯級上，靜愉冇留意到便繼續行落去，行咗幾級先發現我唔喺隔離，轉身抬頭望向我

「周樂恆呀當然，但我決定咗要放低啦！都半年啦，係時候要完全放低㗎啦～」我輕鬆咁講道，「琴日我終於將隻手鐲收起咗啦～所以過去嘅事就隨佢過去啦～」

我同周樂恆，係過去、係回憶、係情竇初開嘅戀愛…但全部都已經過咗去，佢地只不過係我人生中一小部分

方芷諾嘅人生仲有一段好長嘅時間，冇人知道未來嘅事



可能你會反問「咁你點解咁肯定周樂恆只係一個過客？」，我會答你一句「一次不忠，百次不容」，我諗我就算再愛嗰個人都好，佢出軌的話我就會放手，唔會再比第二次機會

無論對邊個，都一樣…

「你真係放低啦？唔再中意周樂恆啦？」靜愉又再追問道，「佢有咩差過佢啫？」

「嗯！唔再中意啦！分手之後就唔再中意落去啦！」我久違地開朗地笑，然後邁步行向靜愉，「阿恆佢冇嘢差過佢呀～佢咩都好。」

我同靜愉行到出去學校外面，雖然喺學校出面嘅圍牆擋住咗無法望入去學校嘅內部，但係籃球拍到地上再反彈嘅聲音好嘹亮

明明只係聽到「噠、噠、噠」嘅聲音，但係喺我嘅腦海中已經不由自主地諗到葉子朗打緊波嘅情境，由拍球嘅動作到投球射籃，葉子朗嘅身影都投射喺方芷諾嘅腦海中

一諗起佢，心臟又不自覺地加快咗跳動嘅速度同強度，我可以感覺到自己嘅胸口一直頻密地起伏着

心臟跳動嘅聲音強烈得一直喺身體中迴盪着，全身上下嘅每一條神經線都突突地跳動，什至傳到去耳中都聽到心跳嘅聲音，步伐都似乎因為心臟強烈嘅跳動而變得有少許不穩



我不禁低頭一笑，睇嚟點都好，我都冇辦法去否定自己嘅心

「笑咩呀？」靜愉見到我偷笑，一臉好奇地望向我

「冇呀～」我抬起頭望向前方，笑着搖搖頭

睇嚟喺我真正咁放低咗周樂恆之後，又有另一個人走進我嘅心房，有另一個人又再次推開我心房嘅門走進去

今日嘅微風特別柔和，天空因為夕陽嘅餘暉染成了橙紅色，我伸手將被風吹亂嘅髮絲繞到耳背後

總覺得今日嘅風比起平日嘅風更溫柔，睇嚟佢對於我有新嘅發展感到開心

「你呀，到底笑咩啫～」靜愉眯起眼望我



「冇呀！」我笑了笑，但閉口不談

「方芷諾你唔好厄我呀！」靜愉偷偷將手放喺我腰上掐咗一下

「哈哈！喂呀～」我覺得癢癢的，便避開然後小跑起嚟

「喂呀！話我知啦！」靜愉見我跑起嚟，頓時又追上嚟

「冇嘢呀！」我轉身捉住靜愉嘅手

「先唔信你呀！」靜愉又偷偷掐我嘅腰

「喂！哈哈哈哈…喂呀！」我忍唔住笑起嚟，然後鬆開靜愉嘅手又跑起嚟

睇嚟…喺上高中嘅前一年，我遇上咗我中意嘅人…



呢一刻嘅我並唔知道，呢個男仔會對我有深遠嘅影響，什至…會係陪伴我一生嘅人…


IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link