［愛情甜故前傳--無糖純愛］曾經嘅我地，都係兩條平行線⋯: 12. 把我冷了的心再次點燃

我拎住居家服喺房行出嚟，行向廁所，打算去沖涼

「芷諾，飲咗湯先去沖涼啦～」媽媽望向我，微笑道

「哦…」 我望向媽媽，答咗一句之後行到高枱前站着

媽媽喺鍋中舀了一碗湯，然後放喺枱面上，擺喺我面前

「啱飲㗎啦～」媽媽講道



我拎起碗湯咕嚕咕嚕咁飲，湯嘅暖意沿住我嘅喉嚨往下流，暖意走遍了全身

「最近讀書點呀？跟得上嗎？」我媽開口問道

一問又係問成績，我係為咗成績先要存活喺世上㗎咩？我對你嚟講係得同成績先有關係？你關心嘅唔係我，而係我嘅成績？

有無數次我都好想咁樣問，但我始終冇…算啦…都唔係咩大不了嘅事…

「嗯，跟得上。」我將碗放低嘅同時回答道，「我沖涼先。」



我講完之後就走向廁所，我冇再回頭望向媽媽嘅表情

望住水喺花灑中灑出嚟，我將花灑掛喺牆上嘅勾中，本以為沖涼係清靜一下嘅好時光，但我嘅腦海中完全冇空白起嚟…

到底係由幾時開始，我喺屋企就冇真正咁開心笑過？我都唔知道…係上咗中學之後定係開始讀書之後？我都記唔清楚啦…

點解佢地關心嘅大多數都只有成績？我已經好耐都冇同我爸媽開心咁傾過計…每一次無論講咩話題都好，最後都係會講到成績…我唔中意咁…但我每次都會答知道…其實我一直都好努力讀書…

我想將來搵一個…會對我好、會明白我包容我、無論如何都會考慮到我感受，同埋真係愛我嘅人…



我冇諗過我爸媽有幾錫我呢個問題，因為呢個問題早就唔再重要…我諗我唔再在意呢個問題嘅答案…

我沖完涼之後冇留喺廳，反而入咗房閂上門，灘喺床上拎住手機睇

我突然喺IG嘅搜尋器上打咗葉子朗嘅IG名，心血來潮想要stalk一下佢嘅IG，點解我會記得佢IG名係咩…算啦唔重要，重要嘅係搜尋結果嘅第一項就係葉子朗嘅profile

我滿心期待咁㩒入去，結果嚟一個大落空

「搞錯呀…冇po文…」我不滿地嘟一嘟嘴，但明明前嗰排佢先po過嘢嚟，我記得我有見過佢po嘢㗎最近

我唔係講緊story，係講緊佢出嘅帖文，不過睇嚟葉子朗係一個會定期刪po嘅人

既然stalk唔到葉子朗嘅IG，咁唯有就咁睇下IG啦消磨下時間

我習慣咗一打開IG就會睇story，睇下大家做緊啲咩，share啲咩咁



一個偶然睇到周樂恆po嘅story，我㩒住咗手機嘅螢幕，好讓story嘅播放時間暫時停一停，不過佢嘅story並唔係吸引到我嘅原因，我㩒停嚟睇嘅原因係我望到喺背景中有一樣熟眼嘅嘢入咗鏡

係嗰隻手鐲

「佢仲放喺枱上面呀…」我不禁開口平淡地講咗一句

不過就算佢再放喺枱上面又點？都已經同我冇咩關係，我亦唔在乎佢做嘅嘢

要講在乎嘅話，我以前已經在乎過，只不過佢唔珍惜，而且佢背叛我，咁所以唔好話我唔同佢復合係我狠心，只不過係佢不仁我不義啫

我閂咗個story，然後繼續睇IG，睇下其他人今日po啲咩帖，睇下啲語錄咁

「唉…好悶呀…」我鎖上手機嘅螢幕，將電話放喺側邊，我望住天花板發呆



葉子朗…心動嘅感覺格外甜蜜，本來早已經冷落嚟嘅心又再次熱起嚟

當遇到一個自己中意嘅人嘅時候，一切都格外美好

「其實我都係想同佢講句嘢…」我望住天花板，因為講出口都覺得有啲難為情，所以拎起手機擋住咗自己嘅臉

葉子朗佢好似都係住喺呢度附近，唔知道聽日番學嘅時候會唔會有機會撞到佢呢～如果撞到佢就好啦～

咁樣諗一諗都已經覺得好開心啦～如果真係撞到佢就更好啦！

「叩叩…」突然有人敲我門，應該係媽媽，「食得飯啦！」

原來已經食得飯啦…我都好耐冇食過住家飯啦，畢竟媽媽成日都環開OT嘛，每一晚成9點幾分點先番嚟，根本就冇時間煮飯

「嗯，宜家出嚟。」我答咗一句之後就坐起身，拎埋手機落床行去開門



好！出去食飯！




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link