［愛情甜故前傳--無糖純愛］曾經嘅我地，都係兩條平行線⋯: 13. 要留下好印象才可以

「哈～欠…」我打咗一個大大嘅喊露，琴晚溫書溫到好夜先瞓，今朝7點15就比鬧鐘催我起身啦，想懶下床都唔得

行喺路上嘅基本上唔係學生就係上班族，畢竟呢個鐘數嘛～7點幾，係學生同上班族出門，迎接新一天嘅開始

個個嘅臉上都倦意盡顯，明顯都就係冇教好瞓…有仔女嘅大人就真係冇教好瞓啦～

做爸媽其實真係唔容易，正所謂「養兒一百歲，長憂九十九」，由仔女啱啱出生嗰陣開始就晚晚冇覺好瞓，到佢上幼稚園又要送佢去番學，上到中小學又要擔心佢嘅成績好唔好，由對仔女嘅身教到學業真係冇一樣嘢可以放得下心

所以將來我先唔會生小朋友啦～咁樣先係聰明嘅選擇～



「喂！」我剛打完喊露嘅時候同時有人嗌我，並且一手拉住咗我嘅手肘

我呆咗一呆，然後回頭望向拉住我嘅嗰個人

「你都要撞落條柱度啦～」佢對住我微笑着道

「阿恆係你呀…」我微微一笑，然後帶着暗示地用眼睛瞄咗一瞄我嘅手肘

佢似乎知道我暗示緊啲咩，默默咁放開捉住我嘅手



「一大清早就冇精神啦？」佢笑着問道

「嗯，瞓唔夠，唔夠精神呀～」 我望向前面，視線冇再落喺周樂恆嘅身上

「你又溫書溫到好晏先瞓呀？」一向了解我嘅佢一下子就知道我夜瞓嘅原因

「嗯，係呀。」我尷尬咁笑咗一笑，點一點頭

我冇特別在意周樂恆，因為我更在意會唔會有一個我覺得重要嘅人突然經過



我一直盡量唔太明顯咁東張西望，心中不自覺地好想撞到葉子朗，但偏偏呢個時候我真係唔想撞到佢…

「你望緊咩呀？」周樂恆有啲疑惑咁望向我望緊嘅方向

「冇呀…」我下意識否認，然後又假裝冇事咁望番前面繼續行，周樂恆亦冇再追問落去

番到學校之後，我唔想同周樂恆一行番到上去課室，所以想借意同佢分開行

「我去小食部買個早餐。」我自然地微微一笑

「哦好呀。」周樂恆點一點頭就轉彎上咗樓梯

我行去小食部，做戲做全套嘛～不過既然都嚟到小食部，都係買包嘢飲先番上去啦

「我真係好聰明～」我喺心中讚自己



正當我仍然沾沾自喜咁讚緊自己好叻嘅時候，我見到葉子朗坐喺小食部中央靠住籃球場嗰邊，正耷低頭唔知睇緊咩

明明佢係背住我坐，我理應唔會知道佢係邊個先啱，但我宜家竟然一望到就知道係佢

就算只係見到佢嘅背影，心跳都瞬間漏一拍似的，愛情嘅感覺真係話嚟就嚟

我即刻整理一下儀容，拉一拉好條校裙，要比一個好跑印象佢，雖然可能會都未必會見到我，不過都要做好啲先得㗎嘛～

整理好之後我就邁步走向小食部，行向放喺最近籃球場，同時最近佢嘅嗰一部飲品機

我行到差唔多同佢嘅位置平排時先見到原來佢喺度做緊功課，佢竟然會喺度做功課

我假裝自然咁行向飲品機，心裏緊張得要命



行到飲品機前時先偷偷鬆咗一口氣，然後喺裙袋中拎出硬幣投入

本來想偷望佢一眼，豈料我偷望嘅時候見到佢咁啱望向我呢邊，可能因為比投硬幣嘅聲音吸引咗，所以望到過嚟嘅同時同我剛好對上了線線

我見到同佢嘅視線對上，心臟唔止漏一拍，但我唔可以比佢睇得出有咩異樣，所以我宜家首要嘅係…

自然咁微笑一下！

佢見到我嘅禮貌微笑後，完全無笑意地「微笑」咗一下

葉子朗對人真係冷淡到極至，連假意笑容都唔想比

人微笑嘅時候，眼睛會微微眯起，但佢完全冇，明顯冇，不過佢有呢個「微笑」總好過當我透明嘅

我都心滿意足㗎啦～我心情舒暢地繼續入硬幣繼續揀嘢飲，心情靚靚～



「撞到佢真係好…」我喺心中獨自歡喜，「今日真係好彩呀～」

我覺得我對葉子朗嘅感覺莫名其妙地又好似上升咗啲，好感又好似大咗

會唔會有一日我都會想同葉子朗表白呢…唔知呢一日會唔會嚟…




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link