［愛情甜故前傳--無糖純愛］曾經嘅我地，都係兩條平行線⋯: 18. 說不出的奇怪

「哦、哦！好呀，我知道啦…」望住佢面無表情咁，我啲尷尬咁點一點頭

葉子朗幫Miss Yiu傳完話之後就行番轉頭，然後行去前面小食部買嘢食

「佢咁冇禮貌嘅…」悠悠輕輕皺着眉頭

「算啦，佢係咁㗎啦～」我無奈咁笑道，然後將餐具放入空空嘅飯盒中再蓋上飯蓋，「Miss Yiu搵我，我上去教員室先啦～」

「好呀～」悠悠佢地三人異口同聲地講道



我拎埋個飯盒企起身

經過小食部門口嗰陣順手地將飯盒掉入飯盒收集箱中，仲以為葉子朗係特登嚟搵我話我知Miss Yiu搵我，原來只係落嚟買嘢食，咁啱見到我就順路過嚟話我知

「嘻…」諗到啱啱葉子朗嗌我個名，我就冇辦法忍住笑意

啱啱係第一次聽到葉子朗叫我個名，一直我都冇聽過葉子朗叫我個名，原來佢叫我個名嘅時候，都幾好聽～我個名都變得格外動聽

行咗一層樓梯上到嚟教員室所在嘅樓層，我行到去教員室門口，㩒咪叫Miss Yiu



我企喺教員室門口等咗一陣，Miss Yiu推開教員室嘅木門行出嚟

「Venus？」Miss Yiu見到我之後行嚟我面前

「Miss Yiu你搵我有事？」我禮貌地問道

「哦係呀，Vincent冇同你講咩事？我叫咗Vincent同你講㗎。」Miss Yiu對於我唔知佢搵我嘅原因感到有點訝異

Miss Yiu口中嘅Vincent係葉子朗，佢話佢叫咗葉子朗講埋我搵佢嘅原因



「佢淨係講咗話Miss Yiu你搵我有事…」我講道，啱啱喺小食部嘅時候葉子朗的確係咁講

「唉…Vincent真係呀…」Miss Yiu細細聲咁講道，從Miss Yiu嘅語氣中我聽得出佢嘅無奈，「我想問今日疊通告係咪仲喺你度？定係你已經比咗我？」

「今朝喺完咗班主任時間嘅時候我交咗比你，你親手接咗。」我回想起今朝早交疊通告比Miss Yiu嗰陣嘅情況

「哦，係呀…可能我個位太亂啦～都唔知放咗去邊。」Miss Yiu笑道，「唔該你呀Venus。我再番去搵下先。」

Miss Yiu講完之後就轉身拉開木門入去教員室，我都行去樓梯上番去課室，我比較習慣行前梯，因為前梯比較近我班課室，所以我行番去前面嘅樓梯上去

上樓梯嘅時候剛好見到葉子朗喺下面行上嚟，我有意無意地將腳步放慢，想有機會同佢並排而行

葉子朗行得好快，好快就行到我身邊而且經過咗，行到我前面

「我真係好想搵個機會同佢講嘢…」「啪！」



正當我咁樣諗嘅時候，突然有嘢喺葉子朗嘅身上跌咗出嚟，葉子朗彷佛都感覺到自己跌咗嘢一樣停落嚟回頭望，我聽到聲之後都望向前面兩級嘅梯級上

「嘩～簡直就係天跌落嚟嘅餡餅呀！」我心諗：「啱啱先諗完想搵個機會同佢講嘢，宜家係機會呀！」

我彎腰想將佢嘅銀包執起同時，葉子朗同我同一個動作，佢行落咗兩級然後彎腰

我嘅手指尖掂到銀包嘅同時，葉子朗嘅手指尖輕輕觸碰到我嘅手指，我頓時感覺到一種觸電似的感覺喺我身體中流動着

我不禁失了魂似的，但我仍然提醒自己要反應過嚟，我嘅手指一縮，手一合上，然後企番好…我全身嘅神經線都顫動着，連我嘅瞳孔都一同顫動着

葉子朗將銀包執起放番入褲袋，我感覺到葉子朗嘅視線落喺我身上兩秒，本來耷低頭嘅我稍微抬頭望佢

葉子朗一直定睛望住我，我有啲愕然，於是我以微微一笑，側一側頭嚟掩飾我嘅小激動



佢望住我嘅腰神，彷彿要將我睇穿一樣，我有啲心虛咁吞咗一啖口水同時稍微移開視線一下，但好快又望向佢

「唔該。」良久，葉子朗先開口講咗句

總覺得佢好似察覺到啲咩一樣…心中有啲不安，但不安嘅感覺原因難以言喻

「唔洗。」我微微一笑講道，葉子朗嘅目光並未有移開，定睛望住我同時眉頭輕皺咗一下

但葉子朗冇多講啲咩，只係默默地轉身繼續踏上梯級，總覺得…有啲唔自在…佢會唔會係睇穿咗我對佢嘅小心思？

總覺得佢好似察覺到啲咩一樣…可能只係我多心啦，但心中總覺得葉子朗剛才望我嘅眼神怪怪地咁…






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link