［愛情甜故前傳--無糖純愛］曾經嘅我地，都係兩條平行線⋯: 19. 被過去影響着

我上到四樓嘅時候，周樂恆突然喺我面前出現，我都冇留意到佢幾時喺度

「做咩心不在焉咁呀？」周樂恆微笑着，溫柔地問道

「冇咩…」我搖一搖頭，然後禮貌上都微笑一個

「芷諾呀，我地真係冇機會啦？」周樂恆嘅笑容忽然塌咗落嚟，我聽到佢咁講嘅時候抬頭望一望佢，或者因為佢見到我冇答佢，所以又開口講道，「我知道我喺呢個時候問你唔太合適，但係…」

「冇機會啦。」我果斷地回答道，曾經嘅我可能會猶疑，但係宜家我唔會，因為係佢先對我唔住



我嘅臉上仍然掛住微笑，周樂恆嘅嘴角微微的上揚着，但喺佢嘅微笑之中卻藏着一份其他人睇唔出嘅失落

我同周樂恆中一已經同班，再加上我同佢一齊咗大概兩年，對佢都有番咁上下了解，佢嘅微表情其他人可能睇唔出，但我一定睇得出

我同周樂恆冇再講過任何嘢，我行到課室門口時，微微耷低頭就番入去

周樂恆教識咗我一件事…有時候必須要狠心，咁樣係對自己同對對方嘅尊重

我知道我嘅狠心會令人難受，但係我必須要狠心…除咗係因為佢出軌外，我要留番一啲尊嚴比自己



周樂恆再溫柔都好，我同佢都已經冇可能…就算佢再想同番我一齊，我都唔會答應佢，因為我唔想令自己變得咁卑微，縱使我為佢「保守秘密」，保住咗佢嘅面子，不過我都要為自己考慮一下…

我將上半日嘅堂嘅書喺櫃桶拎出嚟，然後行去locker前面，我就咁擰開咗個鎖 ，因為我冇將個鎖鎖實，只係扣住喺個locker上面

我將個鎖抽咗出嚟，打開locker嘅木門然後將啲書整齊咁放番入去，我嘅locker一直都好整齊㗎～

我開閂上locker嘅門，偶然抬頭望向課室外面嘅走廊時，一個女仔從外面望入嚟，望向坐喺課室嘅某一個人似的

呢個女仔叫洛天恩，以我所知佢讀隔離班，我只知道佢個名，但我唔識佢



呢啲情況喺中學嚟講都好常見啫，總會有一兩個你知佢叫咩名但同佢唔熟什至唔識嘅人

我心中有啲好奇佢望緊咩，於是循住佢嘅視線望向佢望緊嘅嘢

「葉子朗…？」我跟住佢嘅視線望過去，卻發現佢望緊嘅人係葉子朗

我見到之後心中不是味兒，唔通佢都中意葉子朗？佢同葉子朗熟唔熟？佢點解中意葉子朗？葉子朗又識唔識佢，中唔中意佢呢？

我心中百感交集，但總結一句嚟講就係「不是味兒」，原來除咗我之外，仲有人中意葉子朗…我會唔會輸…？

縱使我由一開始就冇表白嘅打算，但係會唔會喺呢場「遊戲」中，我一早就輸咗啦？葉除朗會唔會其實已經有中意嘅人？

偶爾我都會希望奇蹟係會發生，希望其實葉子朗都會中意我，但係我知道…世上並冇奇蹟…

佢唔中意我就係唔中意我，唔會突然間又中意我，所以我知道葉子朗唔會有中意我嘅一日…



我冇打算表白，只係…偶爾都會有幻想嘅存在，雖然只係幻想，但係我都已經好心足，我真係冇勇氣去表白同時，亦冇勇氣去開一段新嘅戀情…

過去，始終會對自己有影響，特別係唔開心嘅事…就算我再睇得開，對嗰段記憶都難以忘懷，因為佢代表住我嘅失敗…

我有啲失落咁稍微耷一耷低頭，抬眼嘅瞬間我見到葉子朗嘅視線聚焦喺我身上，我再一次同佢嘅目光對上

我以九秒九嘅速度迴避佢嘅目光，然後裝着若無其事咁行番埋位坐低，伏喺枱上，將頭埋喺雙臂之中

滿腦子都係剛才見到洛天恩望向葉子朗嘅畫面，佢中意葉子朗？我唔知道…只知道我唔中意有其他女仔望向葉子朗…

或者洛天恩只係偶爾望到葉子朗，或者洛天恩真係中意葉子朗…呢個並唔係喺我控制範圍之內嘅事，所以心中有啲不安

但啱啱葉子朗望我嘅時候，我莫名其妙地有啲心虛，總覺得葉子朗好似察覺到啲咩一樣，總覺得有啲奇怪…或者只係我嘅錯覺啫



可能葉子朗只係偶然望向我同時我又望向佢，所以視線先會剛好對上

「叮噹叮噹…叮噹叮噹～」

上堂嘅鐘聲響起，午膳時間結束，又開始上堂，希望今日下午嘅堂會好上啲，精神啲啦～

我見到老師入嚟嘅時候自動地挺直腰板坐好起嚟，但手仍然托住下巴，雙眼其實放空着，腦海中海海的

老師叫起立嘅時候企起身，叫坐低嘅時候坐低，靈魂好似唔知去咗邊度挽一樣，呢堂仲要係上數學堂，真係完全提唔起幹勁…




IG Link: https://www.instagram.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link