［愛情甜故前傳--無糖純愛］曾經嘅我地，都係兩條平行線⋯: 22. Oh My God！是福利！

我好少理有冇人回應，因為我都已經提醒咗大家聽日有默書，佢地溫唔溫係另一回事，反正我有溫書就得啦～

「呀！我都要溫多兩次先得！」我鎖上手機嘅螢幕，將手機放墊一邊，喺書包中拎咗筆記簿出嚟

我平日習慣將默書嘅範圍抄寫一次喺筆記簿上，因為咁樣就唔洗帶書番屋企溫啦～好方便啦～而且抄落筆記嘅同時又記咗一次，可以加快溫書嘅速度

…

「今日PE堂做咩呀？」靜愉細聲咁問我



「今日考體能…」我講嘅時候都不禁嘆咗一口氣

考體能嘅項目有9分鐘跑、Sit-up同埋掌上壓，三樣都係我唔太想做嘅項目…特別係跑9分鐘，跑到想喊出嚟

「分好組就坐低。」PE老師講道

我同靜愉即刻坐低，因為我同靜愉一定係一組，我地唔會分開㗎～

今日因為係考體能，所以男女夾埋一齊上體育堂，平日都係男女分開



「今日男女夾埋真好～」我細細聲咁喺靜愉耳邊講咗一句，然後扮四周張望，其實搵緊葉子朗嘅身影

「真係救命…」靜愉反咗一個大大嘅白眼，「你睇下你個花痴樣出晒嚟啦…」

「陣間我跑9分鐘呢～我唔想同佢跑同一轉…」我誠懇咁望向靜愉

「陣間你睇下佢跑第一轉定佢個friend跑第一轉囉…」靜愉一副無言以對嘅表情，「你唔好睇到唔記得咗幫我數圈呀…」

「唔會啦～我一定會記得幫你數圈！」我拍晒心口咁講道，「我辦事，你放心！」



「最好係啦…」靜愉望咗我一眼，眼神係幾咁無奈，靜愉靠近我耳邊講道，「你唔好掛住望葉子朗先好呀…」

「唔會囉！」我嘟起小嘴，微微低頭，抬眼望靜愉

我地行到出去，坐喺操場，操場放咗幾個雪糕筒

老師叫跑第一轉嘅人出去等，我頓時望向男仔嗰邊

「葉子朗呢？」我喺心中疑惑咁問道，但為咗唔好望得咁明顯，所以我特登又望一望女仔呢邊，然後又望一望向男仔嗰邊

「我跑先…」靜愉講完就先行咗出去，靜愉企喺出面嘅時候望向我，我朝佢送咗一個飛吻仲要比咗個手指心佢

靜愉反咗一個大大嘅白眼，然後一臉無言地搖搖頭

我望向男仔嗰邊，葉子朗企中間，嘻嘻…我幫靜愉數圈同時就可以光明正大咁望葉子朗啦～我真係好聰明～



咦？葉子朗呢？突然間唔見咗嘅？我即刻專注咁搵葉子朗嘅身影，搵到啦～原來葉子朗蹲低咗，將鞋帶綁實啲

「嗶～」老師一吹響哨子就開跑，我要幫靜愉數圈，同時望葉子朗

葉子朗跑喺靜愉前面，靜愉一開始先係慢跑，要留力去之後衝圈

葉子朗跑起嚟嘅時候，前面嘅瀏海微微飄起，佢一跑快啲，又變咗all back，不過都係咁好睇就係啦～佢跑步跑動作好利落，手起手落都一樣，腳跟提起同時腳尖又輕輕踩到地上

對男仔嚟講，體育呢一科好似真係好簡單就可以拎到好成績一樣，我成日都覺得男仔天生就係比較識做運動咁

葉子朗跑起嚟嘅時候，運動衫嘅衣角微微飄起

我嘅視線自動自覺地鎖定咗喺葉子朗嘅身上，我嘅雙眼一直跟住葉子朗而動



或者中意一個人嘅感覺就係咁樣啦～無論佢做啲咩都好，都可以將你嘅目光牢牢地鎖住，明明以前都唔覺佢有咩魅力，但一發現咗佢嘅魅力之後就再也無法將視線由佢身上移開

「方芷諾！」我突然聽到靜愉大聲咁嗌咗我一聲，我即刻回神過來望向聲音來源，靜愉嘅聲音就嚟自我左邊

我望向靜愉，然後即刻舉一舉手，話佢知佢已經跑咗幾多個圈

「睇到入晒神添…」我心中講道，我望住靜愉吐一吐舌，一臉抱歉咁笑咗一笑，靜愉沒好氣咁望咗我一眼，然後繼續跑

「最後一分鐘！」老師大聲咁講道，葉子朗頓時加快咗跑嘅速度

因為我坐喺最前，所以佢跑過嘅時候，快到完全係有一陣風吹過，髮絲都要貼到臉上一樣

葉子朗嘅邁步都比剛才大步咗好多，跑都跑得快咗好多；靜愉聽到最後一分鐘跑時候都跑得快咗，要喺最後嘅時候加多一兩個圈數

「嗶！嗶～」哨子聲再次響起，大家都停咗落嚟，然後慢慢行



葉子朗抽起運動衫嘅衣領，當毛巾一樣，蓋到上鼻子隨便抹咗兩抹，佢抽起衣領嘅時候，可以見到佢嘅小腹

天呀～係福利呀！我坐嗰個位可以睇得好清楚先係重點！Oh my god…！




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link