［愛情甜故前傳--無糖純愛］曾經嘅我地，都係兩條平行線⋯: 21. 壞心眼

「冇點算㗎～唔通叫你去做第三者拆散佢地咩～」靜愉笑住咁講

「唔要呀…唔中意第三者…」我扁起嘴講道，因為第三者真係好討厭，破壞人地感情

「咁咪係囉～緣分天註定，我又唔會幫到啲咩。」靜愉繼續講道，「係你嘅走咗嘅都會番嚟，唔係你嘅就算你困住佢，佢都會走。」

「靜愉你係咪我好朋友嚟㗎…講埋啲咁嘅嘢…」我嘅微笑都無法掩蓋我嘅無奈，「都唔幫我嘅…」

「我唔係唔幫你，而係因為呢啲上天先有資格決定嘅嘢我都冇辦法插手。」靜愉講道，「我有邊次唔幫你出頭先？我有邊次唔企你嗰邊先？」





我靜咗落嚟冇出聲，諗番起又好似係，每一次有咩我比人恰、講閒言閒語嘅時候，都係靜愉幫我出頭；我唔開心，想搵人呻嘅時候，喺我身邊嘅都係靜愉

每次都係靜愉企喺我嗰邊，都係佢陪住我，有一個咁樣肯為自己出頭嘅朋友，的確係人生中嘅小確幸嚟

「知你對我最好啦…」我莞爾而笑，識到靜愉係我最幸運嘅事

收咗線之後，我拎埋手機落床行去書枱前，拉開張櫈坐低做功課，不過喺做功課之前都係再睇一下IG之後先做

我托住頭，手機放抬面，頹廢咁樣睇手機





「葉子朗有冇follow我IG呢？」我睇睇下嘅時候突然諗到呢個問題，然後我就喺搜尋度打咗葉子朗個IG名，搵到佢嘅profile

正當我打算㩒入去嘅時候，我諗起葉子朗最近刪晒IG嘅帖子，上次想stalk佢IG嘅時候見到佢刪晒

下方突然彈咗個通知，話有人request follow我，因為我嘅IG設定咗做private account，所以其他人要follow我嘅時候都要request，等我confirm咗就可以follow到我，睇到我嘅帖文

我㩒咗入去通知嗰度睇，見到係葉子朗嘅icon，佢request要follow我呀！？我心中頓時覺得超興奮！唔通佢對我有少少興趣？

見到葉子朗嘅request，我諗都冇諗就㩒咗confirm，葉子朗follow我係咪代表佢對我有少少興趣？





我又㩒番入去葉子朗嘅IG profile入面，想睇下佢有follow啲咩人

「咦？」我望到其中一個佢有follow嘅人嘅時候有啲愕然，而且心中嗰種莫名其妙嘅不安感又出現，「佢有follow洛天恩？」

我心中有啲唔好受，因為佢有follow中意佢嗰個女仔，佢連洛天恩都一早有follow，但竟然宜家先follow我…

唔通葉子朗其實都知道洛天恩中意佢，而佢都中意洛天恩？

「唔通佢中意洛天恩？」我托住頭喃喃自語道，「但照計葉子朗咁嘅性格，點會同女仔熟？」

我伏低喺枱上，腦海中浮出嘅畫面全是今日洛天恩望住葉子朗嗰陣，我完全冇辦法阻止自己唔諗，因為嗰啲畫面自動咁飄出嚟

「唉…點解中意一個人會搞到咁神經質…？」我側住頭伏喺枱上，臉頰墊喺手臂上

暗戀一個人係甜蜜同時亦係折磨…佢嘅一舉一動都可以牽動到你嘅情感，見到佢笑，你都會不自覺地笑起嚟；見到佢唔開心，你都會唔開心；見到佢比人鬧比人罰，你都會覺得心疼…明明同你完全冇直接嘅關係，但你仍然會感到難受，什至比起本人更難受





見到其他人要接近佢，心中又妒忌又羨慕，希望自己都可以同一般人一樣若無其事咁接近佢、行到佢嘅身邊

只可惜，由佢喺你眼中變得不一樣，你嘅心會為佢而跳動嗰一刻開始，你就已經冇辦法同普通人一樣行到佢身邊，每次走向佢，你都懷着「喜歡」嘅心行過去，帶住心動行到佢身邊

如果葉子朗中意洛天恩嘅話…其實我喺遊戲一開始嘅時候已經輸咗…

雖然我始終唔希望會有呢一日，有時感覺自己有啲壞心眼，特別係嗰種「我得唔到其他人都唔可以得到」嘅感覺

偶然突然間…就變得壞心眼…我得唔到，其他人都唔可以得到；我得到係我有本事，但我得唔到，其他人都休想…

「方芷諾你點可以咁諗㗎？」我雙手捧住臉頰，有啲沮喪同時有啲嫌棄咁樣嘅自己，「你咁樣真係好衰呀…」

對於咁樣嘅自己明明好嫌棄，但我卻冇辦法唔咁樣諗





喺戀愛中，所有人都係自私，就算本來再大方都好，一踏入咗戀愛嘅狀態，就會出於本能地變得自私

「係喎…聽日有默書喎…喺班group提大家先…」我突然記起聽日有英文默書

我即刻拎起手機喺班group入面提大家：「聽日有英文默書」

呢個係我嘅習慣嚟，平日有默書測驗嗰陣，我都會早一日喺班group提大家，可能就係因為咁所以形象比較好啦～




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link