［愛情甜故前傳--無糖純愛］曾經嘅我地，都係兩條平行線⋯: 24. 想起了往事

我同葉子朗都係住同一區，所以放學其實都係同一條路行

「你再唔主動啲，就真係咩機會都冇啦～」靜愉拍咗的博頭兩下，「你都中意咗人地成個月有多啦～點可以咁樣一啲進展都冇㗎？」

「萬一佢察覺到我中意佢咁點算呀？」我問靜愉

「咁如果你唔認，佢都奈你唔何㗎…」靜愉講道，「你勇敢啲啦方芷諾！你咁細膽㗎咩？」

「咁點同啫？」我嘟起嘴，然後回頭望一望後面睇下有冇我地級嘅人，確認冇之後先捉住靜愉細聲咁講道，「宜家我暗戀人呀！你講到好似行過去就講到嘢咁…」



「機會係你自己把握㗎嘛！陣間萬一佢係同你…」靜愉講到一半突然冇講落去，側一側頭苦惱嘅樣，「嗰啲叫咩呀？命中注定？呀～係呀係呀，命中注定嘅話，你冇把握咁咪錯失良機？」

「講緊咩呀你…」我聽完靜愉講嘅嘢之後，覺得無奈又好笑，「今年先F.3咋！講咩一世唔一世呀？一世人流流長…最後都未必會係佢啦！」

「喂，命運嘅嘢好難講㗎～可能佢就係你命中注定嘅男～人！」靜愉七情上面咁講道，我只係一頭霧水咁望住佢輕皺起眉頭同時無奈咁笑，「真係㗎！」

「咩真係呀？我冇你咁好氣就真啦！」我笑住咁搖搖頭講道, 「宜家我地先得14歲咋，講到咁長遠？未來嘅時邊有人知㗎？」

「嗱！你都識講啦～未來嘅事，邊有人知？」靜愉捉住我講嘅其中一句說話，靜愉一咁講我先發現，我原來咁樣講咗但自己都唔覺，好順口就講咗出嚟



「嗱咩啫？你嗱嗱聲趕番啲進度好過啦！如果唔係，到時考試同你通宵溫書都似啦！」我借意轉移話題講其他嘢

「其實我發現有排都未考試囉…仲有成兩個月囉…」靜愉講道，我同靜愉一同踏入課室，「點解我之前會同你講好快就考試？」

「我點知你呀…你太想努力讀書掛～」我笑了笑講道，我將用嚟裝住運動衫嘅紙袋勾喺枱邊，「你想我幾時幫你追進度呀？我今日應該會留喺學校啦～」

「我今日唔得呀～不過我星期六得，你幫我追番數學嘅進度。」靜愉豪邁咁坐着

「今日先星期三，你想一次過追番一個星期呀？」我一臉愕然咁望住靜愉



「得啦～有你幫我嘛～」靜愉對我真係完全信任，「我信你可以㗎～」

「你真係睇得起我呀…」我無奈咁講道，然後擰開水樽飲咗啖水

喺抬頭嘅時候，唔知點解我嘅視線好自然就會移向葉子朗，就算我望唔到佢，我嘅雙眼都會自動地想尋找佢嘅身影，我仍然唔敢光明正大咁望向葉子朗，只係敢偷偷瞄佢一眼

如果有一個瞬間可以對上眼，我下意識會即刻假裝自然地撇開臉或者假裝唔係刻意望緊佢咁移開視線，但我心中會覺得好開心好興奮，可以同自己中意嘅人對上視線，係一件甜蜜又幸福嘅事

因為當下佢同你嘅視線對上了，縱使佢唔知道自己嘅心意，但係可以有一個咁樣嘅瞬間都會覺得心中充滿幸福嘅感覺

放學之後我一個人落咗小食部，我坐喺小食部做功課

反正咁早番到屋企，屋企都係冇人，所以與其番去對住四面牆，不如留喺學校做功課溫下書到5點半，呢度又有啲人聲，至少唔係得我一個人咁樣

葉子朗今日都有留低喺學校，不過佢經過咗小食部，行咗出去籃球場，佢今日又留低打波



但係！佢並唔係我留喺學校嘅原因！我真係純粹係因為想留喺學校做功課同溫下書所以先留低，而且我好多時都會留低喺學校

我喺筆袋拎筆嘅時候，留意到有兩男兩女行嚟小食部，睇嚟係中一中二嘅學生，因為佢地明顯唔似大過我，而且個樣仲係好稚嫩

「喂呀！」企前面左邊嘅嗰個女仔嗌咗一聲，然後擰轉面瞪向企佢後面嘅男仔，「你咩事呀？又扯我頭髮，小學雞！」

「咩呀～你有見到我扯你頭髮咩？」個男仔一臉調皮咁講道，嬉皮笑臉的，然後又順手扯多咗一下

「好煩呀你真係…」個女仔瞪咗佢一眼之後就拉住企佢隔離嘅女仔行快咗兩步

望住佢兩個嘅互動，就好似見到當年嘅自己一樣…嗰陣我同周樂恆都係成日打打鬧鬧，最後就莫名其妙咁有樂感，然後就一齊咗

見到佢地咁樣，就覺得好似以前嘅我同周樂恆…






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link