［愛情甜故前傳--無糖純愛］曾經嘅我地，都係兩條平行線⋯: 25. 你有喜歡的人了？

我見到佢地嘅身影，不禁低頭莞薾一笑，但可惜嘅係以前畢竟係以前，唔可以回到過去重新嚟一次

記得嗰陣我同周樂恆啱啱分咗手，我嘅生活就好似突然變得空虛咗…每一日朝早冇人再同我一齊留學；每一晚冇人同我傾電話；唔開心嘅時候都冇人會再做好多好多嘢去氹我

喺我嘅生活中冇咗周樂恆嘅存在令我格外難受，但同親眼目睹佢出軌相比，根本就只係小事一樁

之後嘅兩個星期，係靜愉陪喺我身邊…一直安慰我、鼓勵我，同我講係周樂恆走寶，係佢嘅錯

靜愉一直喺我身邊待着，將我扶番起，我明白日子都係要過，就算冇咗佢都一樣



我嘗試慢慢、慢慢咁將諗起周樂恆嘅次數減少，嘗試唔再去諗過去嘅事，慢慢咁將佢喺我心中腦海中淡化

最終當佢回頭搵我嘅時候，我對待佢嘅心就同對待普通人一樣，我好努力咁放低咗佢

我聽到拍打籃球嘅聲音，我將視線轉移到外面嘅籃球場，望到葉子朗一人打波嘅身影

我坐緊嘅呢一個位可以望到籃球場，而佢仲係中意用對面嘅籃球架一人打着，我坐喺呢度就只可以望到佢嘅身影

以前我都會留低做功課，好多時都會見到葉子朗一人喺度打籃球，而佢幾乎每一次都係用對面嗰個籃球架，有時偶然望出去，會見到佢打籃球嘅背影



有時拍緊波，有時剛好舉起手做出投球嘅動作，有時已經投咗籃，籃球已經喺籃框邊緣轉着

不過我之前一直都冇特別留意過葉子朗嘅身影，冇留意到原來葉子朗嘅背影會令我睇得如此入神，原來喺佢嘅身上有吸引我目光嘅事…

我望到葉子朗嘅身影時，不自覺地微笑起嚟，我嘅心又不受控制地加快咗跳動嘅節奏

「佢總可以打亂我心跳嘅節奏…」我將視線放回我嘅功課上，心中默默地訴說着我嘅心聲

「芷諾？」我突然聽到有把熟悉嘅聲音喺我背後傳嚟，我心裏有啲不情願，唔想望過去，但出於禮貌，我都係望咗過去



「阿恆，係你呀？」我微微一笑

「我啱啱去完圖書館，諗住走㗎啦～」周樂恆忽然行到我對嘅嘅空位坐低，我有啲愕然，但我冇將我嘅愕然放到臉上

「哦…係呀…」我不失禮貌地微笑道

「你留到5點幾先走呀？」周樂恆望向放喺我而前嘅功課

「係呀，平時都係咁㗎啦～」我耷低頭做功課

「洗唔洗等埋你一齊走呀？」周樂恆一句，我嘅手不禁停咗落嚟，我緩緩抬頭望佢

佢望我嘅眼神，彷彿話我知佢想同我一齊走，樣，就好似以前一樣

但…無論我再睇得出嘅嘅想法都好，我都唔會答應佢



「其實我地分咗手，唔可以好似以前咁行得咁埋㗎啦…」我微笑道，我望一望佢嘅表情，佢明顯地有啲愕然，因為我嘅直接係佢意料之外，「而且…我都講過我地冇機會㗎啦。所以你唔洗再做咁多嘢，我地做番普通朋友係最好嘅事。」

「你有中意嘅人？」周樂恆望向籃球場嗰邊，佢呢個普通嘅舉動喺我眼中都變得有啲咩特別意思似的

我低頭微微一笑，然後同佢一樣將視線移到籃球場上，不過我望緊嘅人係葉子朗

「嗯…」我望向葉子朗時嘅目光，好似變得柔和起嚟

周樂恆聽到我嘅回答瞬間望向我，一臉難以置信的，或者因為佢見到我朝住籃球場嘅方向露出柔和嘅笑容而再次望向籃球場，尋找令我微笑嘅源頭

周樂恆望到葉子朗嘅身影，似乎已經明白我嘅答案係咩

佢望向我嘅同時，我亦望向佢，我微微一笑



我同周樂恆之間嘅默契就係咁樣…

唔需要刻意提問，唔需要刻意回答，靠一個眼神，一個笑容就可以知道彼此心中所想

「我明白啦…」周樂恆有啲失落咁笑，然後點一點頭，企咗起身，「我地聽日見啦～」

「嗯，拜拜。」我微笑着說，今次嘅微笑並非強顏歡笑，而係默為佢嘅明白而真心微笑

我又繼續耷低頭做功課，有時候就係需要咁樣，同你有默契嘅人未必係最適合你嘅人，默為兩人之間並非單靠默契而行

愛情真係一門高深嘅學問嚟，我仲係太年輕啦～

希望將來有人可以同我有一樣嘅默契，特別係在於喺對對方嘅愛同堅持上






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link