［愛情甜故前傳--無糖純愛］曾經嘅我地，都係兩條平行線⋯: 36. 回到原點

我好快咁揀咗一個雲尼拿味嘅甜筒，然後行去收銀處比錢，比完錢之後嘅我突然間產生咗一個念頭

喺度食埋先走！

因為呢間便利店喺側邊係有高枱高櫈可以坐，方便啲人喺度食嘢

啱啱我見到葉子朗坐喺嗰度食緊嘢，不過佢好專心咁睇緊手機，所以佢冇留意到我

我行到葉子朗嘅旁邊，伸手輕輕地拍一拍佢嘅博頭，葉子朗感覺到有人拍佢嘅博頭便回頭望，見到係我嘅時候愕一愕然，佢嘅表情總係如此不明顯



「嗨～」我微笑着講道，然後拎住個甜筒坐低喺葉子朗隔離嘅空位

「嗨。」葉子朗嘅回答依舊淡然，葉子朗望住我，眉心好似有小小皺着，我感覺到係…

我撕開甜筒嘅外圍紙，拎起最頂霧面嘅膠蓋，喺白色嘅雲尼拿雪糕上咬咗一口，除咗有好香嘅雲尼拿味之外，仲咬到凝固咗嘅朱古力薄片，仲有少量嘅花生粒

我望向外面，街道上嘅人已經變得好少，夜晚嘅街道上人煙稀少，只有小貓三四隻

我眼尾嘅餘光留意到葉子朗偷偷地瞄咗我一眼，但係我冇頓時望過去，我想感受一下比自己中意嘅人望嘅時候嘅感受



葉子朗好似有啲咩想同我講，因為我見到佢望我嘅眼神好似同平時唔太一樣，好似有啲距離感一樣…

「你又會喺度嘅？」我主動地打開話閘子問道

「落嚟食嘢。」葉子朗嘅回覆總係如此冷漠又簡潔，但我覺得，葉子朗好似比之前更冷淡，唔知道係咪我嘅錯覺

我感覺到葉子朗好似唔係好想講嘢，所以我都冇再開口同佢搭話，只係默默坐喺佢隔離，偶爾偷瞄佢一眼

葉子朗一直耷低頭睇手機，佢面前放咗一個已經食完嘅杯麵，筷子仲插咗喺杯麵中；佢嘅左手打橫平放喺枱上，右手拎住手機睇，尾指托住手機底，姆指上下動着滑動頁面



佢修長而且有骨感嘅手格外好睇，唔知係因為佢有打籃球呢？定係，男仔嘅手都係咁樣？

我食埋最後一啖，將佢放入口，然後用紙巾抹一抹嘴

「我走先啦，拜拜。」我離開咗張櫈，對葉子朗講道

「拜。」葉子朗仍舊有同回答我，但佢嘅語氣比平日更冷淡

我行出便利店，經過咗便利店之後我回頭望咗一眼，葉子朗仍然一動不動咁坐喺原位，郁緊嘅大概只有佢嘅手同眼

今日見到佢咁樣嘅態度，我心中覺得有啲奇怪，明明前兩日仲好地地㗎，感覺上已經對我少咗「戒心」，但宜家好似又打回原形，什至比之前「戒心」更強

食完雪糕嘅我慢慢散步行番屋，當係消化一下啦，成日食完飯就即刻坐好易肥，所以我都係慢慢行番屋企啦～

我提起手望一望手錶，呢個時候屋企應該仲未有人，所以我番到去應該都係一樣，我真係好似自己一個人住咁



我將鎖匙喺門孔中抽番出嚟，然後將木門閂上同時將波鞋除落嚟放番喺鞋櫃中

番到屋企嘅第一時間，就係行入房放低啲嘢，然後去沖涼

沖完涼之後成個人都舒服晒，換番做屋企衫之後真係成個人輕鬆晒，我番入房之後灘喺床上睇手機

…

明明上緊堂，我卻喺度放空着，心中諗起今日朝早嘅事

今朝早我番學嘅時候咁啱見到葉子朗，我心入面仲覺得係啲咩lucky嘅事，但係我冇行上前拍佢，因為我諗起琴晚佢好似好冷淡咁

我一直行喺佢後面，只係默默咁望住佢嘅背影，突然間佢回頭望向我呢邊，我就企喺佢嘅正後方



佢擰轉身見到我之後，我感覺到佢好似輕就皺咗一下眉頭，佢望向我嘅時候，我覺得佢好似有啲嘢想同我講，但係又冇講到出口一樣

我想問下佢係咪有嘢想同我講，但若然唔係嘅話，成件事就會變得好尷尬，好似係我自作多情一樣

「葉子朗會唔會係…討厭我？」

喺我嘅腦海中一直出現呢個問題，佢嘅反應好似真係對我有啲討厭咁…

「希望佢唔係討厭我就好啦…」我低頭望住筆記簿，喺心中喃喃自語道

「10 minutes break. 」Miss Yiu講道，「值日生出嚟擦一擦黑板。」

我聽到Miss Yiu咁講之後默默地企起身行出去，因為我係今日嘅值日生

我默默地拎起粉擦，將黑板擦乾淨，但我冇辦法專心咁擦黑板，葉子朗係咪討厭我呢個問題已經侵佔咗我成個思考嘅系統






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link