「你今日做咩成日都心不在焉咁樣㗎?」靜愉將飯盒拎比我,「唔舒服呀?」

「吓?」我回神過嚟嘅時候,靜愉已經坐低咗喺我隔離,佢嘅枱櫈都已經拍咗過嚟,「唔係呀~」

我頓時就搖搖頭,露出笑容

我唔係唔相信靜愉,我唔同靜愉講只不過係默為呢個只係我自己覺得係嘅事,尚未證實係唔係真,所以先唔同靜愉講,陣間佢又話我多心諗太多

「我都希望我係真係諗多咗…」我喺心中講道,同時拆餐具袋嘅包裝



「你有心事呀?你好少咁樣㗎啵~」靜愉打開飯盒蓋,「我幫你買咗個炒飯,啱啱問你嗰陣你又發緊呆,所以我就自把自為幫你買咗呢個。」

「啱啱你有問我咩?」我有啲愕然咁問道,我完全聽唔到靜愉問我嘢

「有呀,只係你呆咗咁,我問咗兩次你都冇反應,我咪落咗去買飯囉~」靜愉講道,「M到呀你?」

「唔係呀…可能咁啱諗緊嘢諗到入晒神啫。」我隨便編咗一個借口

「有嘢唔開心要講呀記得,你唔好一個人喺度死撐。」靜愉瞄咗我一眼



以我對靜愉嘅了解同埋靜愉對我嘅了解,就算我話冇事都好,靜愉都會睇得出我係有心事,只不過我同靜愉平日都係以「對方想講自然會講」為前提,所以唔會逼對方講

「知啦!」我知道靜愉係喺度關心我,「我有咩一定會話你知就係啦!食飯啦!」

我偷偷地望向葉子朗,心臟又開始加快跳動嘅速度…佢嘅側面令人感覺到佢嘅高冷,不過對我嚟講,佢正面側面都咁好睇

食完飯之後,我嘅心情都好番啲,至少都可以專心上堂啦,我都冇再諗葉子朗嘅事

雖然曾經冒出表白嘅念頭,但係我最後都係決定…唔表白 !因為比起表白,我更加想同佢做朋友,咁樣先可以一直留喺佢身邊,以朋友嘅身份留着



忽然我留意到有人行咗入嚟課室,我抬起頭望過去,見到著住黑色裙嘅Miss Yiu行入嚟

Miss Yiu似乎係嚟搵人,唔知佢搵邊個呢?是旦啦~總之唔係搵我就得啦~

「Miss Yiu呢個鐘數落得嚟,肯定冇好嘢發生…」靜愉望向門口,然後又望向我細細聲咁講,「肯定又係想唔知搵邊個幫佢手做嘢就係啦…」

「是旦啦,唔係搵我咪—」「葉子朗!」

Miss Yiu走向葉子朗,Miss Yiu嘅聲音大到吸引到課室中嘅所有人

我同靜愉本來傾緊計,講到一半嗰陣就比Miss Yiu嘅聲音打斷咗,我同靜愉幾乎係同時抬起頭望向Miss Yiu,班上嘅同學嘅視線都跟住Miss Yiu郁,除咗我之外…

我望向Miss Yiu,聽到佢嗌葉子朗嘅時候,我嘅視線移向葉子朗,只見葉子朗一臉無言兼唔耐煩咁抬頭望向Miss Yiu

「我叫咗你今日Lunchtime同我落去留堂室㗎嘛!你點解會喺課室㗎?」Miss Yiu又朝葉子朗發火



Miss Yiu對個個都唔會咁樣,但淨係對葉子朗會咁,明眼人都睇得出Miss Yiu針對葉子朗

「你有講咩?」葉子朗望住Miss Yiu一臉不在乎地講道

「我話咗你欠我功課嘅話就要留Lunch㗎嘛!」Miss Yiu嘅雙手盤着放喺胸前

「唔好話Miss Yiu你針對我。」葉子朗面無表情地講道,「我欠你功課就要留Lunch,咁點解其他人唔洗?」

「你欠功課仲可以咁樣大條道理㗎咩?」Miss Yiu因為比葉子朗反駁而更嬲,雙眼都快要噴火,「你今日放學同我留喺度,你留到6點,做番嗰兩份功課之後先好走呀!」

「留咪留囉。」葉子朗冇不服氣嘅意思,只係默默咁樣講咗一句

Miss Yiu轉身移咗兩步嘅時候突然停低咗然後望向我,我心中頓時有啲不詳嘅預感



「Venus,你今日放學得唔得閒呀?」Miss Yiu咁樣一問,我就知道,Miss Yiu又有嘢想我幫佢做

「得閒呀…」我點一點頭

「咁就太好啦!你可唔可以幫我手整嚟緊班會要用嘅嘢?」Miss Yiu嘅態度同剛才好似係兩個人一樣,宜家嘅Miss Yiu臉上帶着溫柔嘅微笑,變臉都變得幾快下…

「好呀…」我微微一笑,點一點頭,心想:「你開到口叫我唔通唔做咩…」

「你放學去我簿櫃拎就得㗎啦!最近我真係太忙啦!」Miss Yiu講道,然後一邊朝門口走去一邊同我講,「真係麻煩晒你啦!」

點解總覺得好似係罰緊我咁嘅?我係Miss Yiu嘅秘書咩?






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link