［愛情甜故前傳--無糖純愛］曾經嘅我地，都係兩條平行線⋯: 39. 落空

我瞬間移開了視線，同時將疊嘢塞咗入去簿櫃入面

唔知點解好似好尷尬咁…葉子朗將兩份功課放咗入簿櫃同時我都放好疊紙，順利成章地，我又可以同佢一齊走～

「你又會呢個時間先走嘅？」我想打開話題，但好似有啲明知故問咁，因為晏就喺課室大家都聽住，所以我好似想搵話題咁，但都已經問咗出口，死就死啦！

「Miss Yiu要我留堂。」葉子朗直接回答重點，一句廢話都冇

我覺得有啲尷尬，可能因為葉子朗嘅態度問題，所以我冇再講嘢，葉子朗亦冇再出聲，我同佢之間嘅距離依舊係相隔咗四分之一個身位



我同葉子朗冇再講過嘢，明明一齊行，但係氣氛卻異常尷尬

葉子朗突然望向我，我便抬頭望佢，見佢一副欲言又止嘅模樣…令我不禁有啲好奇佢係咪有咩想講，但葉子朗又冇出聲，我又唔太好意思問出口

我同葉子朗一齊行落樓梯，但我同佢係一人行一邊，佢行內側，我行外側，中間都唔止隔咗四分之一個身位，都可以企多一個人

我地兩人沿路都冇講嘢，一直行一直行，一直都冇講嘢，佢偶爾又望下我，但又冇講嘢

差唔多行到落去地下嘅時候，佢又望咗我一眼，但同樣地冇講任何嘢



我地一同踏出學校門口，我地都係冇講嘢，佢又默默望咗我一眼，但佢依然都冇講嘢

我同佢一齊行，我地之間嘅距離又變番做相隔四分之一個身位，我同葉子朗一句說話都冇再講過，只係默默咁樣一齊行

天色已經開始昏暗起嚟…唔知係咪因為今日係星期一啦，所以明明先6點幾，但街上面嘅人都唔太多咁

「喂方芷諾。」

行到去外面嘅巴士站嘅時候，葉子朗突然開口講嘢，佢叫我個名



聽到佢叫我個名嘅一刻，我嘅心藏即刻跳得好快，我望向佢，但我卻見到佢一臉嚴肅咁，而且身上散發着一股令人感到不安嘅冷漠

「做咩？」我帶着一點疑惑問道

「你係咪中意我？」葉子朗單刀直入，完全冇婉轉問我嘅意思

我比葉子朗突如其來嘅問題嚇咗一跳，心臟亦隨着佢嘅提問而嚇得停咗兩秒，我嘅表情瞬間僵硬起嚟…我唔識比反應，亦唔知要比啲咩反應佢先啱

我不禁吞咗一啖口水，但係我卻無法平伏我嘅心，我仍然直視着葉子朗，但卻無法吐出任何一個字

「方芷諾，你呆咩呀？答佢唔係啦！」我喺心中同自己講道，但我成個人就好似凍住咗一樣

「你冇否認嘅必要，因為我知道你係。」葉子朗嘅語氣好平淡，佢完全唔覺得驚訝一樣

葉子朗望向我嘅眼神，令我嘅呼吸都不禁加重咗，每一個呼吸，每一下心跳都變得好沉重



「我親耳聽到，就喺上星期五，你同李靜愉嘅對話我聽到晒，就喺放學嘅時候。」葉子朗異常地冷靜，佢嘅目光係如此冷漠

「你…點解會聽到…」我嘅聲量比平日細，喺葉子朗嘅面前，我果然無法鼓起勇氣

我嘅心跳快到好似就嚟要心臟病發一樣，心中夾雜着不安、擔心、緊張…

「放學嗰陣打完波之後，咁啱醒起漏咗嘢喺課室，上到去嘅時候聽到。」葉子朗平靜地解釋着，但佢再平靜，佢嘅語氣喺我耳中聽嚟都係冷淡

「我…」我百口莫辯，亦冇辦法再講啲咩繞過去，因為佢已經親耳聽到我親口講嘅嘢，「既然你知道，點解仲要問我…」

呢一刻嘅我，腦袋裏完全係空白一片；呢一刻嘅我，就好似一個做錯事嘅小朋友一樣，微微耷低頭唔敢望佢

「我係想話你知，你可以死心。」葉子朗冷漠嘅言詞直接打入我嘅心房，什至將我嘅心房刺穿



我企喺原地，冇講任何嘢…眼眶忽然濕潤起嚟，眼淚喺眼眶打轉着

「你冇中意我嘅必要，而且我亦唔會中意你。」葉子朗講道，「你中意我會令我覺得好困擾。」

點解…點解你可以講得出啲咁冷漠嘅說話？點解你可以咁冷淡…？我…！算啦…我算啲咩…？

葉子朗就企喺我面前，我嘅呼吸好沉重…佢嘅說話快要將我壓得窒息…！

「我地唔會係同路人，我亦唔會中意你，而且我想話你知…」葉子朗繼續講，我微微抬起頭望佢，佢見到我泛紅嘅雙眼時似乎有一絲愕然，但佢並冇心軟，「我一世都唔會中意你，所以你可以死心啦。」

我嘅心臟頓時受到重擊，好痛…我難受…難受到眼淚都就嚟忍唔住啦…






IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link