［愛情甜故前傳--無糖純愛］曾經嘅我地，都係兩條平行線⋯: 38. 期望

雖然可以得到Miss Yiu嘅信任我覺得好開心，可以幫到Miss Yiu我都覺得係我嘅榮幸嚟…但久而久之，我好似變咗佢秘書咁，班上要用嘅嘢Miss Yiu好多時都會叫我幫手，

「呀…」Miss Yiu一走咗，我就即係伏喺枱，「我今日真係唔洗旨意早走啦…明明唔係比人罰但點解都好似我比人懲罰咁嘅…？」

「呃…咁至少呢個懲罰可能都會為你帶嚟少少好處呀～」靜愉望住我笑咗一笑

「哼？」我挑起眉望向靜愉，靜愉只係笑而不語

過咗兩秒之後，我似乎大概知道佢想表嘅係咩，我嘅嘴角自動揚起嚟



「咁都算係獎勵嚟嘅…」我甜甜地笑起嚟，細聲咁講道

去到放學嘅時候，我同上次一樣執好嘢，然後就落執教員室外嘅簿櫃拎嘢上留課室整，今次又係同上次一樣要釘下嘢咁

記得上一次，我因為疊筆記紙又重又厚，所以都冇手扶住個釘書機，我行到課室門口嘅時候差啲撞上咗喺課室出嚟嘅葉子朗，佢見我冇手扶住個釘書機，即刻就伸手幫我

嗰次係我同葉子朗第一次講嘢，而且仲係佢主動問我借嘢

今日難得Miss Yiu罰葉子朗留堂同時又叫我幫佢手做嘢，我記得Miss Yiu好似罰葉子朗留堂留到6點，我可以借意到做嘢做到6點，然後去碰一碰運氣，睇下有冇機會撞到葉子朗可以同佢一齊走～



Oh My God！我真係好聰明呀！

我將手上嘅工作都放慢嚟做，偶爾抬頭望一望時間，我完全唔急住做嘢，反正我想等到6點，想假裝偶遇同葉子朗一齊走

等一邊將啲紙釘好，一邊幻想着陣間見到葉子朗嘅時候會點

我地會唔會又可以一齊傾計一齊行？我地之間嘅距離會唔會又拉近咗一啲？我地兩個人可唔可以再加深少少感情？我地可唔可以成為朋友？

就算只係一齊去麵包店買個麵包麵好，我都會覺得好開心…



但最近作對我嘅態度又好似打回原形一樣，我怕佢會討厭我，唔係，應該話…我怕佢其實係討厭我…！佢會唔會已經察覺到我對佢嘅好感？佢會唔會只係刻意唔講？佢會唔會喺察覺到我對佢有意嘅時候疏遠我？

我希望佢唔好討厭我； 我希望佢會慢慢睇到我嘅優點； 我希望佢會慢慢對我有好感； 我希望有一日佢會話我知佢知道我中意佢，而且佢都中意我…

當一個人得到愈多嘅時候，就會變得愈貪心…！得到對方嘅少少關注，就會希望對方更加關注自己；對方只係同自己講多兩句，就希望自己可以同對方做朋友；對方偶爾問起自己嘅事，就以為自己喺對方心中有啲唔一樣

無可否認嘅，係我的確好似變得更貪心，我同佢一齊踏出校門一次，就希望有第二次；有第二次，就希望有第三次

「搞掂～」我將已經釘好晒嘅紙張疊好，然後伸咗一個懶腰

我抬起頭望向掛喺課室黑板旁邊嘅時鐘，啱啱已經聽到5點半嘅鐘聲，都唔係過咗好耐，宜家係5點45分

「仲有15分鐘～」我喺心中默默高興，諗起陣間可以見到葉子朗，我就覺得好開心

我孭起書包，然後將釘好嘅紙張一次過抱起，踏出課室之前，我仲記得要閂上課室嘅燈



我用腳剔起用嚟勾住課室木剔嘅鐵勾，然後用博頭頂住課室嘅門，我小心翼翼地抱住疊紙行出課室，課室嘅門「呯」一聲閂上

我經後面嘅樓梯行落一樓嘅教員室，行樓梯嘅時候心中有啲急同時又要小心

落到一樓，我行番去Miss Yiu嘅簿櫃前，同上次一樣將疊嘢放入去Miss Yiu嘅簿櫃中，腦海中只係諗緊陣間會唔會見到葉子朗，會唔會錯過咗同葉子朗見面嘅機會

愈諗愈擔心嘅我不禁想抬起頭望向留堂室嗰邊，睇下葉子朗出嚟未，我唔想錯過任何一個見佢嘅機會！

忽然間我聽到有腳步聲行緊過嚟我呢邊，但係我冇抬頭望過去，因為我正努力咁將疊紙推入去Miss Yiu嘅簿櫃裹

嗰個腳步聲離我愈嚟愈近，佢行到去我後面，我身旁忽然多咗一隻手拎住兩份對摺咗嘅功課

我下意識想抬頭望向嗰個人，但喺我正要抬頭望住嗰個人之際，我望到望喺面頭嗰份功課寫住…



「Ip Tsz Long Vincent」

呢個名咪係葉子朗！？我猛然抬頭，果然係葉子朗企喺我隔離！

我同佢嘅視線…對上了…！




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link