［愛情甜故前傳--無糖純愛］曾經嘅我地，都係兩條平行線⋯: 43. 刻意

「其實我覺得，如果你真係想放低佢嘅話，你冇強逼自己嘅必要。」靜愉突然間講道

「做咩突然間咁講？」我有啲訝異地望向靜愉，

「我睇得出你全日都強逼緊自己唔好去在意佢。」靜愉伸手輕輕地摸一摸我頭，「係根據我對你嘅了解同觀察得出嚟嘅結論。」

我選擇咗沉默，因為靜愉講嘅係事實，我都唔知點樣回答佢先啱，我亦無從反駁

「與其強逼自己，不如順其自然。」靜愉講道 



我地行到學校外面，籃球場上嘅拍球聲仍然好明顯，拍球傳嚟嘅聲音喺我腦海中迴盪着

「點順其自然…？」我微微耷低頭

「就係同平時一樣就好，唔洗刻意避開佢。」靜愉聳聳肩，「既然你係想放低，咁你更加應該面對。」

若然我真係咁樣做，同平時一樣嘅話，我真係可以放低佢咩？

「你愈係逃避，愈代表你在意。」靜愉直接地講道，「放低的確需要時間，你自然咁去面對佢就得。唔好逼自己，順其自然。就當你自己係一個普通人就得啦～」



我番到屋企之後有好好沉思，反覆思考着靜愉講嘅嘢，同埋好好諗下我應該點做

…

我企喺黑板前拎住白色粉筆，喺墨綠色嘅黑板上寫下呢道數學題嘅答案

「Great.」Mr. Li望到我寫嘅答案滿意地點一點頭，我放低粉筆然後番埋位坐低

啱啱行番埋位嘅時候，我又好自然咁望咗葉子朗一眼，不過今次冇對上眼，我亦只係默默地望咗佢一眼就算



今日靜愉冇番，所以我只可以靠我自己啦～不過我諗我應該都Okay嘅，都可以應付到

我諗清楚之後，決定咗試下靜愉嘅方法，我諗靜愉應該唔會係挽我嘅，所以我決定咗用靜愉講嘅方法試一下

今日已經係葉子朗拒絕咗我之後嘅第三日，雖然暫時嚟講我都係未戒到望佢嘅習慣，不過我諗我再努力啲應該冇問題

「Pretty well.」Mr. Li喺我寫嘅解題上打咗個剔，「Okay～Let’s explain this question.」

下個月月尾就要考試啦，我都想快啲整理好心情去考試，我唔想比其他人影響到我嘅考試成績

宜家就開始溫書好似急咗啲，我平日都習慣咗喺考試之前兩個期先開始慢慢溫書，有逼切感嘅時候效果會比較好

「芷諾，呢度係點呀？」坐我前面嗰個女仔拎住堂課簿轉身過嚟問我，我見佢已經將我寫嘅嗰個解答方法抄低咗，「呢度點解係咁樣嘅？」

佢用筆尖指住咗佢唔明嗰度，我見佢唔明，頓時就細聲答佢，喺隔離再寫多一條算式去解答佢嘅疑問



「哦～」佢睇完我寫嘅算式再忍埋我嘅解答之後，佢恍然大悟咁哦咗一聲，「明白明白，唔該～」

佢好經常問我數學題，雖然我數理科真係冇文科咁好，但至少都唔算太差，我嘅成績喺班上都算係上游嘅～

「你真係好叻呀～」坐我前面嗰個女仔笑起嚟，豎起拇指稱讚道

「Okay啦～」我都笑了笑，比咗個Okay手勢

我偶然望向葉子朗嗰邊，其實都唔算係望葉子朗嘅，只不過咁啱Mr. Li又叫咗另一個人出去答題，而嗰個人咁啱係坐嗰邊

「我唔識！」嗰個人大嗌道，班上嘅人即刻就笑咗出嚟，「I don’t want to have a try！」

佢好似已經知道Mr. Li會講咩一樣，搶先講咗自己唔想試，所以我地又笑起嚟



有時上堂嘅氣氛好唔好，都會影響到班上啲人嘅學習氣氛，我就覺得我嗰班嘅學習氣氛唔錯啦～

喺快要落堂嘅時候，Mr. Li話要分發今日嘅功課，然後佢叫咗我出去幫佢派

「Vincent，come out.」喺我行到出去拎起要分發嘅功課簿時，Mr. Li叫咗葉子朗出嚟，大概係話上次份功課嘅改正又重錯，叫佢redo之類

啲功課要跟學號，所以派起上嚟嘅時候好麻煩，班上嘅人又唔係跟學號坐…搞到我要喺課室行嚟行去咁…

喺鐘聲響起嘅時候，又到咗食飯嘅時候，今日我冇咩胃口，亦唔太肚餓…今朝早番學之前，我媽煮咗早餐比我食

今日我嘅煮嘅早餐好豐富，有奄列、煎煙肉、煎腸仔，仲食咗一塊多士，食到飽一飽先出門口，宜家個肚都未餓啦，所以我今個Lunch就唔食嘢啦，落去買個嘢飲就算啦

我袋咗4個半喺裙袋，然後就起第離開座位打算落小食部，喺我行到去老師枱嘅時候，眼尾瞄到葉子朗突然間企起身然後離開座位行出嚟，可能都係去打波掛

我落到樓下飲品機嘅時候剛好有兩三個人排緊隊，我當然會乖乖排隊啦～



「呀…」企我後面嘅人忽然撞咗我一下，我回頭望過去

咦？等陣先…咦！？




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link