［愛情甜故前傳--無糖純愛］曾經嘅我地，都係兩條平行線⋯: 44. 哪裏怪怪

點解葉子朗會企咗喺我後面㗎？佢都係落嚟買嘢飲？佢做咩突然撞我呀？

我望到喺佢後面企咗三個中一嘅男仔，佢地喺度推嚟推去，可能咁樣撞到葉子朗，然後葉子朗又撞到我啦

「呀…」喺我望番去前面嘅時候，突然又比人撞咗我背脊一下，但今次好似係重力一撞，好似葉子朗成個上身撞上我度咁

我頓時望去後面，葉子朗已經望咗去後面嗰三個男仔 

葉子朗咩都冇講，只係一副冷漠嘅樣子望向佢地，嗰三個男仔好似有啲驚，即刻就怯怯地道歉



「Sor。」我突然聽到葉子朗用低沉嘅聲線講咗一句

我回頭望向葉子朗，葉子朗正望住我，但我心跳嘅反應已經冇之前咁強，睇嚟靜愉嘅方法真係有啲用

「唔緊要。」我禮貌上微微一笑講道

我行上前買嘢飲，買完嘢飲就迅速逃離現場，因為啱啱真係太尷尬啦！尷尬到我差啲想連嘢飲都唔買然後即刻走，係得葉子朗先會冷靜到咁

我開始有啲懷疑，葉子朗到底係咪機械人嚟，點解可以咩反應都冇，仲可以咁冷靜？佢就好似一個冇情感嘅載體一樣



「唔知道，葉子朗將來中意嘅嗰個女仔會係一個點樣嘅人呢…」喺我腦海中突然浮現出一個咁樣嘅問題

我不禁有啲好奇，葉子朗會中意咩人呢…好優秀嘅人？好靚嘅人？葉子朗會中意點樣嘅女仔呢？如果將來葉子朗要結婚，佢嘅新娘會係點嘅人呢…？

「等陣先…佢中意咩人關我咩事呀？」我喺心中反問自己

係囉！關我咩事呀？佢中意邊個都好，同我都冇咩關係㗎！我點解要咁關心？

我行到上去四樓，行到番到課室嘅門口時，周樂恆咁啱又係行到我課室門口



「嗨～」周樂恆同我打招呼

「嗨～」我微微一笑，然後問道，「你喺度嘅？」

我行入課室時，佢又跟住我尾行入課室

「Mr. Li將我地班嘅數學簿放咗喺你地簿櫃，佢叫我過嚟拎番。」周樂恆大步走向簿櫃，然後蹲喺簿櫃前面望咗兩望，「果然喺度。」

佢伸手入簿櫃拎咗疊數學簿，又真係佢嗰班㗎喎…

「睇嚟Mr. Li將疊簿當咗係我地班嘅B簿咁拎上嚟…」我無奈咁笑道，「今日佢先派咗A簿比我地番去做功課。」

「可能佢冇睇清楚係咩班，見係A簿同B簿就拎上嚟。 」周樂恆朝課室嘅門口走去，我行番埋位坐低

我先啱啱坐低，就見到葉子朗行入嚟，睇嚟佢已經買完嘢飲上番嚟



葉子朗同周樂恆幾乎係擦肩而過，葉子朗入嚟嘅時候，周樂恆出去

葉子朗見到周樂恆嘅身影嘅時候望多咗佢兩眼，佢默默地行番埋自己個位，佢差唔多行到番埋位嘅時候，佢忽然望咗我一眼

突然間做咩…？我又冇講嘢…又冇做啲咩…而且我又冇得罪佢，啱啱係佢撞落我度，我都冇講嘢啦…

我將手機放喺枱上，我連拎住盒嘢飲都有啲懶，直接將盒嘢飲放喺抬面，我耷低頭飲

右手托頭，左手滑手機，耷低頭咬住飲管喺度飲嘢，我真係樂懶，而且呢個Lunchtime我覺得自己好頹廢咁，可能因為平日嘅Lunchtime我都會做下功課咁，但今日我咩都唔想做，所以睇下手機就算

我托住頭睇手機，睇睇下Facebook嘅時候忽然見到有條片係講一啲電影嘅，類似係嗰啲講電影內容，3分鐘幫你睇晒一套電影咁樣啦

我都幾中意睇呢啲，但其實我唔係特別中意睇電影嘅人嚟，只不過通常呢啲人做嘅電影都幾好睇



課室中只有三四個人，大家都冇講嘢，只係各自做緊自己嘅嘢，所以課室中格外安靜，安靜到淨係聽到風扇轉動嘅聲音

我特登幾手機嘅聲量較到最細，費時好嘈咁樣啦，嘈親其他人都唔係一件好事

唔知點解靜愉嗰個方法好似真係幾有效咁，明明只係實施咗兩日，但係每次再望向葉子朗嘅時候，感覺的確冇咁大啦已經，可能因為我記得佢拒絕我嘅時候嘅狠心，所以我先可以咁快就恢復正常

宜家已經月中啦，下個月月尾就考試啦…今年係最後一年初中，下年就係高中生啦，高中嘅班仲要係三年周班制，如果下年同葉子朗同班咪死？要見足佢三年

唔會嘅唔會嘅～我諗就算係點都好，同班都好，我諗到時我已經完完全全咁放低咗葉子朗啦！就算佢坐我隔離都好，我都唔會對佢有咩特別嘅想法




IG Link: https://www.instagra.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link