［愛情甜故前傳--無糖純愛］曾經嘅我地，都係兩條平行線⋯: 45. 第八天

喺葉子朗拒絕咗我之後嘅第八日，我對葉子朗嘅感覺好似又平淡咗啲

至少今日我已經可以直視葉子朗而且係只帶着少許心跳加速嘅感覺直視佢

「叩叩。」有人叩咗兩下門，班上嘅人頓時就比叩門聲吸引咗視線

「想搵一搵葉子朗。」係教我地班地理科嘅老師許sir

葉子朗聽到之後就行咗出去，佢同許sir企喺走廊講咗兩句，許sir又打開門，開咗一條門縫探頭望入嚟



「Miss Yiu，想搵多個學生。」許sir同Miss Yiu講道，Miss Yiu點一點頭，「方芷諾，出一出嚟。」

我聽到之後愕一愕然，然後放低咗手上嘅嘢，雙手㩒住枱邊借力企起身朝門口行過去

「又會突然叫我出去嘅？」我喺心中喃喃自語 ，「我應該交齊晒地理功課㗎…」

我第一件事諗到同許sir叫我出去有關嘅事，就係我有冇交齊功課

我扭下課室嘅門柄將門拉開，同葉子朗一同企喺許sir面前



「今日放咗學之後想搵埋你一齊去地理室幫手，因為儲物室嗰度要清一清，嚟緊地理室會裝修，所以要執晒儲物室啲嘢走。」許sir講出叫我出嚟嘅原因，「因為除咗要執走啲嘢之外，仲要點算地理室入面嘅教具，怕得葉子朗一個人做唔晒，所以想搵你幫下佢手。」

「哦…好呀…」我點點頭

咁即係放學要見住葉子朗唔知見幾耐…唉，我應該Okay嘅…當係普通同學一樣就得㗎啦！

「咁4點鐘，你兩個喺地理室門口等我。」許sir講道

我同葉子朗都表示Okay之後，許sir講咗聲唔該然後就走咗，葉子朗行喺前面推開課室門，我跟喺佢身後行入去



講真呀，宜家嘅我的確唔太想同葉子朗有單獨相處嘅時間，因為咁樣會令成件事好尷尬…你諗下，你要同一個喺八日之前拒絕咗你嘅人一齊做嘢，你話尷唔尷尬？拒絕人嗰個冇咩嘅，但比人拒絕嗰個就難講啲啦…

我大概知道許sir搵葉子朗幫佢手嘅原因係咩，許sir不嬲都比較中意葉子朗，佢應該係唯一一個覺得葉子朗可以教得好嘅老師，所以我明白佢搵葉子朗嘅原因係咩，但佢點解要搵我…

唔通因為我係女仔，感覺上做嘢會小心啲唔會咁大意？我咩都唔，我淨係想今日放學之後快啲做完啲嘢然後走咋…

最後一堂落咗堂之後，我就執好啲嘢，將啲唔用嘅書放去Locker，我拉上書包拉鏈

「搞掂。」我喺心中講道，我將書包拎起然後孭到背上，再搭喺櫈背上嘅校褸拎起搭喺手上面

我望向葉子朗，睇嚟葉子朗都差唔多行得，我有一刻考慮等埋佢先行過去，不過最後我都係決定唔等佢，我過去地理室門先

當我行到去地理室嘅時候，許sir已經喺地理室入面，我推門入去，將校褸放喺其中一張木枱上，然後先要將書包除落嚟放喺櫈上

「得你一個人嘅？葉子朗呢？」許sir抬頭嘅時候見到只有我一個人便開口問道



「啱啱佢仲喺課室執緊嘢，可能過緊嚟。」我回答道

此時地理室嘅門「咔」一聲打開，葉子朗行入嚟，將書包放喺最近門口嗰張枱，即係我放嘢嗰張枱，不過佢將啲嘢放喺我對面

「呢度係儲物室嘅物品清單。」許sir將一份用clip board夾住嘅清單表遞比我，然後望向葉子朗，「陣間將啲嘢入落紙箱入面，咩要同咩一齊擺嗰啲呢張List上面寫晒㗎啦！啲紙箱放出嚟擺喺嗰邊嗰個角落頭就得㗎啦。」

許sir將一條鎖匙遞比我，睇嚟應該係地理室嘅鎖匙

「陣間你地整好晒之後，就幫我鎖番地理室嘅門，鎖匙擺番落執我簿櫃就得㗎啦！」許sir講完之後望一望手錶，「我要上去同高中同學補課啦，呢度就交比你地啦！」

許sir講完之後就行出咗地理室嘅門，葉子朗行過去打開咗儲物室嘅門，並且開咗儲物室嘅燈

葉子朗拎起放喺一旁嘅綿絲手套戴上，然後直接行過去不銹鋼儲物架，拎起喺最頂層嘅其中一個紙盒，佢將紙盒拎落嚟放喺地上，紙盒上佈滿了灰塵



「我地拎埋新嘅紙箱入嚟，然後點完就可以直接放入新嘅箱入面，咁樣會唔會好啲？」我拎住塊clip board，望住正打開紙箱嘅葉子朗

「哦，好呀…」葉子朗一講完，我就打開咗儲身室嘅門，喺儲物室外嘅枱上拎咗兩三個紙箱行番入去放喺地下

葉子朗將啲嘢放喺地下，我喺隔離點算每一個項目齊唔齊，然後喺清單上打一個剔




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link