班上嘅人即刻就望過嚟呢邊,我都自然地循住聲音嘅來源望去後面

方芷諾隻手放咗喺枱邊,夾咗喺枱邊同我張櫈之間,佢隻手點解會突然喺呢個位㗎?

「葉子朗你仲唔行開!」坐喺方芷諾左邊嘅女仔游悠即刻望向我講道,「你見唔到你夾到芷諾㗎咩?」

我即刻行咗出去然後將我張櫈拉前咗,游悠即刻瞪咗我兩眼,方芷諾即刻抽番隻手出嚟,只係手指第三節紅咗

我出去拎卷番嚟,然後行番埋位



「對唔住呀,要你幫我執嘢搞到你夾到手…」坐喺我隔離嗰個女仔一臉抱歉咁望住方芷諾,「早知就唔叫你拎一拎起張枱啦…」

「唔緊要啦,我冇事。」方芷諾微微一笑講道

「葉子朗你唔洗道歉㗎?」游悠瞪住我

「唔洗啦悠悠,我冇事呀~」方芷諾即刻就同游悠講道

「我又唔係特登嘅。」我答咗一句,游悠即刻一副好似要「嬲到唔知講咩好」嘅樣咁望住我,「我點知佢隻手會放喺度。」



「你!」「算啦算啦!」

喺游悠想鬧我嘅時候,方芷諾即刻阻止咗佢,笑住咁搖頭話冇事

佢又唔似會係特登放隻手喺度比我夾引我注意,可能我諗太多,其實比櫈夾到手真係好痛,我係唔係應該關心下佢呢…?但如果我關心佢,佢會唔會以為我對佢有啲咩…?

唉…算啦…都係關心一下啦…畢竟係我夾到佢隻手

我有啲猶疑咁轉身望向佢,轉到過去嘅時候見到方芷諾仍然低頭望緊自己隻手,啱啱比我無情力咁夾咗一下,都紅晒啦…



「你隻手有冇事…」我望向佢,雖然有啲猶疑,但都係問咗出口

方芷諾聽到我嘅提問時抬起頭,有啲愕然咁望住我,但好快佢就收起咗佢嘅愕然,露出淡淡嘅微笑

「冇事。」方芷諾搖搖頭,「多謝關心…」

我問完之後我又轉番去前面,葉子朗你喺度做緊咩呀?你之前先拒絕咗人,你宜家又去關心人,人地會點諗你?

不過算啦,佢點諗我,我都唔太在意

喺放學之前嘅最後兩堂係PE堂,今日PE堂剩咗半個鐘,所以比我地自由活動

我同幾個男仔一齊去籃球場打籃球,男仔嘅活動嚟嚟去去都係嗰幾樣㗎啦,仲可以有啲咩?

「1 on 1?」企我隔離嘅男班長問道



「邊個先?出一樣嘅先。」其中一個男仔提議猜包剪揼,大家默默地伸晒手出嚟

「包…剪—」「喂喂!」

喺我地猜緊嘅時候,忽然有幾個女仔行近我地,我地幾個男仔即刻望過去,係我地班嘅女仔

我地學校PE堂係兩班兩班咁上,所以我地係同隔離A班一齊上堂

「做咩呀?想同我地一齊打籃球呀?」拎住籃球嘅男仔講道

「唔係呀…」女仔堆中企最前嗰個女仔講道,「想問你地一唔一齊挽閃避球呀!」

「點呀?」拎住籃球嘅男仔問我地,我地你眼望我眼咁,大家冇反對,於是佢又望向班女仔,「挽囉!」



我地幾乎全班都一齊挽,我地喺籃球場中心圍咗一個大圈

「報數。」我地班話開事嗰個女仔講道,「我先,1。」

「2。」「3。」「4!」

「單數雙數分組啦!」嗰個女仔講道,然後大家就分開咗單雙數兩邊,我係單數

我望一望我個組有咩人,我地呢邊都唔差…點解又有方芷諾?做咩最近成日去到邊到見到佢咁,單雙數分組都可以分到同佢一組…會唔會咁好彩呀…?

我地喺周圍放咗色碟,以中線嚟劃分兩邊,我地揀咗男班長Wilson去對面做「鬼」

「你地先。」我將個籃球拋過去比雙數組

大家一開始都幾輕鬆,因為人仲有好多,可以睇到大家行去邊一邊,方便避開「鬼」嘅攻擊



對面游悠一下子接住咗Wilson掉出嚟嘅波,我地呢邊啲人比游悠嘅反應嚇咗一嚇,然後慢慢後退,游悠一臉不屑咁望向我,然後用力地將個波掉向我,因為我企最前

「啪!」

好可惜,我一下子就接住咗個波,對面啲人即刻四散




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link