［愛情甜故前傳--無糖純愛］曾經嘅我地，都係兩條平行線⋯: 50. 總是見到面

我用力地將個波一掉，瞬間就解決咗三個人，但最後一球掉失咗，個波落咗喺佢地手上

個籃球好快咁「咻」一聲喺我耳邊略過咗，去咗對方設嘅「鬼」嘅手上

兩邊勢均力敵，經過一輪交鋒之後，我地呢邊剩番5個人，對面剩番6個人，宜家嘅發球權又去番雙數組嘅手上

游悠將個波一下子掉到我地呢邊企喺場邊嘅「鬼」，企喺嗰個「鬼」前面嘅係方芷諾，佢似乎都察覺到佢就喺危險嘅地帶

方芷諾頓時就轉身向往退咗兩步，但係對方嘅動作比佢更快手，一下子就將籃球朝佢掉去，方芷諾嚟唔切避開，一下子就比籃球掉中咗上臂



方芷諾一臉輕鬆咁行過去雙數組嘅場邊，同另外幾個女仔有講有笑咁，但呢一刻嘅我冇分神，因為要想快啲作出勝負

對面宜家仲剩番2個人，我地呢邊仲有3個，睇嚟我地嘅勝算會比較大，希望完到場啦

對面兩個人瘋狂咁走位，一時又將個波掉番過嚟，一時掉到過嚟又比我接住咗，只要「解決」咗佢地嘅王牌游悠，呢場比賽就可以分出勝負啦！

「叮噹叮噹…叮噹叮噹～」

睇嚟完唔到場啦…我地執番好啲嘢然後剩去操場嗰邊等老師再點一次名然後就可以換衫番屋企



我當然唔會咁快就番屋企啦，我平日都慣咗留低打一陣波先走，反正咁早番到屋企都係一樣，屋企都冇人…

我只係喺更衣室入面拎番個書包出嚟，放喺籃球場

記得之前方芷諾有一次行過嚟同我講嘢，佢好似有問過我點解一個人打波之類嘅說話，其實我都慣咗一個人打波㗎啦，正確啲嚟講，應該話我習慣咗自己一個人，我唔太識得同人相處

所以好多時，我都習慣咗自己一個人，雖然我唔係冇朋友，畢竟男仔要搵朋友其實係一件好簡單嘅事，同女仔唔一樣，女仔搵朋友好似要做一份詳嘅調查咁，男仔搵朋友只要有話題，臭味相投就夠

我拍一拍籃球，籃球喺撞到落地面嘅時候反彈，我拍咗兩下之後，就瞄準籃框準備投球



正當我想要將籃球拋出去嘅時候，忽然聽到喺小食部嗰陣有一陣陣嘅嬉笑聲傳嚟，我下意識望過去，原來係我嗰班啲女仔，有方芷諾、李靜愉、游悠、張雯茵同李詩雅

佢地幾個正笑得開心，大家將個書包放低喺其中一張枱嘅膠櫈上，但佢地冇坐低，反而喺度講笑打鬧

「其實笑起嚟都幾好睇呀…」喺我腦海中忽然閃出咗咁樣嘅一句，而我嘅目光正落喺嗰個比我拒絕咗嘅女仔身上

呢一刻嘅佢笑得特別開朗，笑容亦特別燦爛，佢呢個樣格外甜美…總好過嗰一日雙眼紅紅嘅佢，不過佢都係因為我所以先會咁…佢會知道，我呢個人係幾唔值得佢中意

「我突然間諗咩呀喺度？」我不禁輕輕皺起眉頭，「點解我突然間會諗埋啲咁嘅嘢㗎？」

我趁佢地未留意到我嘅時候擰番轉面，我輕輕地將籃球瞄準籃框拋出去，籃球直接入網

籃球穿過咗籃網，我小跑到籃網下將籃球接住，喺轉身行番去本來企緊個位嘅時候，我不自覺地就抬頭望向小食部，我都唔知點解我會望過去小食部

方芷諾又再一次出現喺我嘅視線之中，點解佢成日都會喺我嘅視線範圍之內？我去到邊都見到佢



佢同班女仔一講唔知講緊咩，正笑得開心，李靜愉比埋動作講咗兩句之後，幾個女仔又哈哈大笑咁樣

「其實方芷諾笑起嚟都唔差…」喺我腦海中忽然又閃出一句，我頓時回過神來，我又會突然間諗埋啲咁嘅嘢…我搞咩呀？

不過其實睇真啲，方芷諾笑起嚟嘅時候，的確係幾好睇嘅，但…我又喺度亂諗啲咩呀？

我拍咗兩下籃球，然後又繼續一個人嘅打波時間，直到學校5點半嘅鐘聲響起，我將個籃球放喺籃球場旁邊嘅收集籃入面，然後孭袋走人番屋企

我孭起書包走嘅時候，小食部嗰班女仔都走，今日方芷諾冇做功課？可能因為同佢地一齊掛

平日好多時方芷諾都會喺小食部做功課，因為通常我留低打波嘅時候都會見到佢，之前有諗過佢係唔係因為我所以先留低，後來發現其實唔係，諗番起佢好似之前都一直有留低嘅習慣

佢成日都喺小食部做功課同溫書，明明可以番屋企做，點解就要留低喺學校？我就話番唔番屋企都一樣啫…佢明明有屋企番但又唔番，唔通真係咁愛學校？



一踏出校門，我就喺褲袋拎手機出嚟，耷低頭一邊睇手機，一邊行番屋企

班女仔行喺我前面，一字排開咁行，霸晒成條路…一班女仔嘅時候都係中意咁樣行？好多時都見到啲女仔會一字排開咁樣

我聽到佢地大聲咁喺度笑，我抬眼望向前面，見班女仔圍埋一齊細細聲咁講完嘢之後又大聲咁笑

方芷諾企喺右邊第二個，佢…又喺我視線範圍之內…最近果然行到去邊都見到佢…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link