［愛情甜故前傳--無糖純愛］曾經嘅我地，都係兩條平行線⋯: 52. 交集

「呵～欠…」我一邊行一邊打喊露，琴晚有啲夜瞓，搞到唔夠瞓

今日起身嘅時候覺得有啲肚餓，所以早咗小小出門口打算去麵包店買個麵包先再番學校，如果唔係就要等上完頭兩堂先可以食嘢

我急步行去平日去開嘅間麵包店買咗個麵包就番學校，我今日同平日一樣食吞拿魚包

一講起吞拿魚包，腦海裏忽然閃出方芷諾用麵包夾夾住我個麵包夾，佢緩緩抬起頭望向我，而我嘅視線亦慢慢地移到佢嘅身上

我地都想夾同一個麵包，點知我比佢更快先夾，佢呆呆地望住我，好似想問我點解要同佢爭個麵包一樣



宜家諗番起佢嗰個樣真係覺得有啲好笑，本來仲扁住嘴，但抬頭見到係我嘅時候又不禁瞪大了眼

行多兩步嘅時候，突然發現方芷諾就行喺我前面，佢一邊耷低頭睇手機一邊慢慢行

我望到佢嘅身影同時，心中覺得有啲奇怪，我啱啱點解會突然間諗起佢嘅？

喺佢隔離有一個似係三、四年班嘅小妹妹跑過，嗰個女仔跑過咗佢隔離嘅時候，然後一個向前跌，街上面有好多學生，亦有大人，但係卻冇人行過去將個小妹妹扶起

但呢個時候，我卻見到方芷諾頓時收起手機放入裙袋，然後扶起咗嗰個小妹妹，喺個妹妹低咗起身次後，方芷諾又耷低頭望下佢膝頭睇下佢有冇受傷，然後又微微彎腰，低頭同個女仔講咗兩句之後，方芷諾微微一笑，個女仔都笑咗一笑，點一點頭，然後就行咗去



喺嗰一刻我突然覺得，其實呢個女仔其實都係一個幾好嘅女仔嚟，我對佢嘅認識又好似加深咗少許…

方芷諾比我早一步踏入課室門口，啱啱我一直都係行喺佢後面，宜家佢都已經好少望向我，同之前好唔一樣

「芷諾！」佢一入課室門口，班女仔就即刻叫住佢

「一大清早圍晒喺我張枱度做咩呀？」方芷諾笑住咁行番埋位問道

「等緊你番嚟呀！」李靜愉等方芷諾一除咗個書包就即刻捉住佢，「 你今日又會咁遲先番到嚟嘅？」



「今日遲咗出門口嘛～」方芷諾笑咗一笑，「都冇遲到～」

班女仔突然間緩緩地望向我，然後一臉訝異咁你眼望我眼咁，我便默默移開了視線

我幾時望咗過去？好似我都唔知我自己由幾時開始就望向嗰邊…

「我地嚟緊一齊溫書呀！」一聽就知道係張雯茵把聲

「好呀好呀！」李靜愉即刻就回答道，「芷諾你都會一齊㗎可？」

我聽到李靜愉叫方芷諾個名時怔了一怔，我有啲好奇佢會點答，佢平時都係自己一個溫書做功課，應該唔會同佢地一齊溫書掛

「好呀～」豈料方芷諾卻笑住回答

我本來以為方芷諾平日成日自己一個溫書做功課，一定係因為佢唔中意同其他人一齊溫書，但原來佢一個人溫書嘅原因可能並唔係因為佢中意自己一個人溫書



明明有朋友可以一齊去挽一齊做功課，但點解佢偏偏中意自己一個？明明有朋友，點解又要搞到好似冇朋友同佢一齊咁？

「芷諾你想喺邊度溫書呀？」游悠問道

「唔…都冇咩所謂…」方芷諾諗咗一陣，然後又笑了笑，「其實我冇咩所謂，去邊度溫書都可以，唔好太靜就得啦～」

我本來以為方芷諾會中意去自修室、圖書館呢啲好靜嘅地方溫書，但原來佢唔中意呢啲咁靜嘅地方，唔通因為咁，所以先中意喺學校仲要喺小食部溫書？

我望一望鐘，都差唔多要落去集隊啦喎，佢地唔落去嘅？我坐好起嚟，然後企起身離開座位，行前梯落去集隊上早會

「差唔多要夠鐘落去集隊啦！晏就先傾啦！」喺行到出課室門口嘅時候聽到李詩雅咁講，佢一咁樣講完之後，佢地幾個即刻起行出嚟

上完早會之後，我地番到上課室上班主任時段，都係比大家收下功課講下班務咁



「前日嘅通告今日deadline啦。」Miss Yiu舉起一疊通告，然後遞向方芷諾，「交過去比Venus。」

方芷諾又真係行出去拎，話時話，我好似都未交…我喺書包拎咗嗰張通告出嚟，然後行過去交

「你未搣開張通告。」方芷諾望到我手上拎住嘅通告時抬頭望我，然後喺筆袋入面搵張把間尺遞比我

我用間尺將張通告搣開然後再遞出方芷諾，我轉身行番埋位

「呃…葉子朗！」喺我正要邁步嘅時候佢叫住咗我，我擰番轉頭望佢，「你未寫名。」

方芷諾將張通告遞比我，我行到佢嘅枱邊，拎起佢放喺枱上面嘅筆，喺通告上面寫下自己個名






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link