［愛情甜故前傳--無糖純愛］曾經嘅我地，都係兩條平行線⋯: 53. 難以言喻

「唔該。」方芷諾微笑一笑接過張通告，我轉身行番埋位

我行到番埋位，見到方芷諾仍然點緊啲通告齊唔齊，佢用萬字夾夾住疊通告，然後連埋張點名紙放喺疊通告嘅面頭，方芷諾企起身拎住疊通告行出去，將疊通告交到去Miss Yiu手上

「仲有冇人未交通告？」Miss Yiu問道，然後再望一望班上嘅人，「交齊啦嘛，Okay。」

今日第一堂係Mr. Li嘅數學堂，我最怕就係佢又叫人出去答問題，因為佢出啲題目真係好難

Mr. Li似乎中意比多啲試煉大家，佢話有聽書就會識做，先唔係…我有聽書都唔識做…佢有冇考慮過係佢出得太難嘅問題



上咗半堂之後，Mr. Li終於要出題，不過佢話放過break比大家先，因為上孖堂，所以叫大家喺break完之後解答

「芷諾！」忽然聽到有人細聲咁樣叫咗方芷諾一聲，我稍微抬眼望過去，見到李靜愉捉住咗方芷諾嘅前臂，「呢度唔識拆…要點樣解落去？上堂冇聽書。」

「呢度…」方芷諾望咗兩望，然後輕輕一笑，「你冇聽書都仲咁自豪？等我睇下先。」

方芷諾靜咗一陣，然後拍一拍靜愉

「呢度用番本來cal機㩒出嚟嗰個數計…然後呢邊用…」方芷諾講到一半將本簿遞番比李靜愉，伸手去拎起自己本數學書，「呢條公式計。」



我望到方芷諾指住嗰條公式，同聽到佢講嘅嘢，我自然地check一check自己寫嘅答案有冇出錯，因為都係計到一半就計唔到

我再重新計一次，發現本來用四捨五入計出嚟嘅數同用番無盡小數計出嚟嘅數的確唔同

「難怪計唔到啦…」我喺心中默默講道，然後下半部分用啱啱方芷諾指嗰條公式計，果然計到答案，「計～完～」

「Vincent.」Mr. Li叫咗我一聲，敲一敲黑板，抬眼望一望我

我企咗起身，拎埋堂課簿行出去，一行到出去企喺黑板前面，我拎起粉筆就寫，對上一次寫得咁得心應手已經係好耐之前嘅事，直到寫上最後嘅答案，我先放低粉筆行番埋位



其他人見到我識做好似好驚訝咁，都係嘅～我平日，從來都唔會識做，都難怪大家咁嘅反應嘅

Mr. Li仔細咁睇一次我寫嘅答案，然後默默地喺黑板上用紅色粉筆打咗個剔

好彩啱啱聽到方芷諾同李靜愉講嘅嘢啫～如果唔係，我肯定又唔識做，啲人又要喺心入面默默地話我廢

我稍稍抬眼望向方芷諾嗰邊，方芷諾正耷低頭專心咁寫緊筆記，然後佢抬頭，伸手托住下巴望向黑板聽書，一副專心上堂嘅好學生嘅模樣

放Lunch嘅時候，佢地幾個女仔又圍埋一齊，今日我唔係好想落去，所以今日就留喺課室食飯

李靜愉將佢張枱拍過去方芷諾張枱隔離，佢地幾個圍埋一齊食飯

食飯食到一半，突然聽到佢地喺度討論男仔嘅話題，簡單嚟講，佢地講緊男仔

「我真心覺得我地級冇咩靚仔囉…」李詩雅講道，「不過叫好睇嘅都有啲嘅…」



「邊個呀邊個呀？」班女仔即刻就興趣大增，臉上都刻住「好奇」咁問道

「我覺得D班嗰個班長幾好睇就係啦。」李詩雅講道

「咁我地班呢？我地班有邊個？」游悠問道

「你喺呢度講我地班呀？」李靜愉望一望周圍，然後突然傾前，同佢地幾個細聲咁講咗啲嘢，「我覺得佢Okay嘅～」

「都係嘅都係嘅～」張雯茵同方芷諾對望，兩個人靜咗一陣又笑起嚟

「芷諾呢芷諾呢？芷諾覺得邊個好睇？」我突然聽到游悠咁樣問咗一句，我嘅好奇心因為佢咁樣問一句而大增，我忽然間都有啲想知道方芷諾覺得班上邊個男仔好睇

方芷諾冇大聲講，反而望一望四圍，當佢一向前傾，其他幾個女仔都一齊前傾身子



我偷偷地瞄向佢，因為真係有啲想知佢會講邊個，佢冇真係湊得好前，所以我呢個位要見到佢嘅口型都可以

「哦～」班女仔一聽到方芷諾一講出咗個名時，頓時反應熱烈

而我則默默地收回視線，將視線再次落番喺手機上面，心中種難以言喻嘅感覺，心情好似突然間有啲改變

剛才我見到佢口型，講出咗一個名…

「葉、子、朗」




IG Link: https://www.instagra.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link