［愛情甜故前傳--無糖純愛］曾經嘅我地，都係兩條平行線⋯: 55. 她的聲音

呢種不明所以嘅觸電同心藏緊縮嘅感覺，以前從來都冇試過

方芷諾嘅視線由我身上而開，啱啱可能佢只係咁啱望過嚟呢邊，並唔係望緊我，我默默地收回望向佢嘅視線，但係心臟嘅緊縮並冇緩和嘅跡象…

我偷偷地再次抬眼望向方芷諾，心臟再一次傳嚟輕輕觸電嘅感覺，我再一次耷低頭，然後打開書掀

「你睇書咁快嘅？」坐我後面嘅男班長Wilson拍一拍我博頭，笑着問道

「咩呀？」我回頭望佢



「你不停咁掀掀掀掀掀，仲以為你睇得咁快添～」Wilson笑了笑

「哦…」我唔知忽咩反應同回答，只好笑一笑，然後望番去前面，我冇再掀書，書嘅頁數停留咗喺P.44

「我做咩係咁掀書…」我喺心中問自己，我自己都覺得好疑惑，突如其來嘅感覺太多，我都啲分唔清楚都底係咩一回事

我自己都冇留意到，我自己一直喺度掀書，感覺就好似…好想搵啲嘢掩飾一下一樣，不停掀書掀書掀書，我都冇做虧心事，做咩要急住掩飾呀？都係飲啖水平靜一下先…

我撇開臉唔望方芷諾嗰邊，特登望向另一邊先飲水，我到底發生咩事啦？飲啖水都要咁緊張咁…？



到咗放學嘅時候，我今日同平日一樣留低喺學校打波，我行到出籃球場放低咗個書包之後，就行去小食部買支水，碰巧見到方芷諾啱啱落到嚟小食部

見到佢落到嚟嘅時候，我突然間覺得心臟又緊縮咗一下，我頓時移開了視線，我好快咁買咗支水然後就移咗出籃球場

我一個人喺籃球場打波，偶爾回頭望向小食部，我都唔知點解我每一次行過去執完個籃球行番去原本個位度嘅時候，我都好自然咁會望過去小食部…

我到底係咪搵緊啲咩…？呢兩三日到底做咩呀？我好似成日都會遇上啲咩奇怪行為咁，我自己都唔知道到底做咩…

去到5點半嘅時候，我執好嘢走，踏出校門嘅時候，發現方芷諾行喺我前面



我望住佢嘅背影，唔知點解又有一種似觸電一樣嘅感覺流過心臟

「芷諾！」突然有人喺我隔離跑過，跑到去前面拍咗方芷諾嘅博頭一下

我認得呢個男仔，佢係方芷諾嘅前男友周樂恆，佢兩個唔係已經分咗手啦咩？點解周樂恆仲會跑上前拍佢嘅？

「你喺度嘅？」本來耷低頭嘅方芷諾聽到有人叫佢之後，瞬間抬起頭望向周樂恆，然後好似係下意識動作一樣往後望，「你又會突然喺度嘅？」

我覺得要同佢對上眼，我微微耷低頭兼且移開了視線，喺褲袋度拎出手機睇

突然有啲好奇，到底方芷諾中意周樂恆啲咩？方芷諾中意我嘅原因，會唔會同中意周樂恆嘅原因一樣？心裏突然間一下子多咗好多或者唔會有解答嘅疑問

我稍稍抬眼望向前方嘅方芷諾同周樂恆，心中嘅疑問好似又變多咗

我見到佢兩個一齊移有講有笑，就有啲想要逃離現場…我加快咗步伐，我喺方芷諾嘅身邊行過咗，我連番屋企嘅步伐都變得快起嚟



我嘅步伐冇再次變慢，直至我番到屋企門口，我企喺屋企嘅鐵閘前，手上拎住鎖匙

「葉子朗你突然間做咩呀…？」我喺心中不禁問自己，「你做咩做咁奇怪嘅…？」

方芷諾嘅事關我咩事…？我點解要去好奇佢同周樂恆之間嘅關係…？我點解由今朝早開始就會咁奇怪㗎…？我到底搞咩呀…？

我皺起眉頭，眉頭正繃緊着，心中覺得更加困擾，因為連我自己都唔知道自己點解有啲咁…反常嘅行為…

我拎起鎖匙開咗個鐵閘，然後推開門入屋

我行番入房，但我冇換衫，只係將書包掉喺書枱邊靠住衣櫃嘅趟門，我喺書包入面拎咗份功課出嚟做，我將筆袋掉喺枱面

我將我平時用開嗰枝原子筆拎出嚟，但拎出嚟嘅時候，有另一樣嘢喺筆袋入面跌咗出嚟，「噠」一聲跌咗喺地下



我彎腰去執起透明間尺，喺執起佢嘅時候，今日方芷諾借間尺比我搣通告嘅情境突然喺腦海中一閃而過

「葉子朗！」

「你未寫名。」

突然喺腦海中好似聽到佢今日叫我名叫我喺通告上面寫番名時嘅聲音

到底突然間做咩呀？我又會突然間諗起佢嘅？唔通係因為最近佢好似成日都喺我視線範圍之內…？




IG Link: https://www.instagra.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link