［愛情甜故前傳--無糖純愛］曾經嘅我地，都係兩條平行線⋯: 54. 她是方芷諾

「其實佢都Okay嘅，係cool咗小小囉～」游悠降低咗聲量講道

佢地幾個講嘢嘅聲量都細咗，其實都唔係細咗好多，所以我坐緊呢個位，真係好難聽唔到佢地講咩…除非佢地真係好細聲

「佢個樣又真係Okay唔差嘅，性格好啲就更好啦！」張雯茵講道

縱使佢地咁講，但我都係比較好奇方芷諾嘅睇法

「我覺得其實都Okay呀，都冇咩特別唔好…」方芷諾開口講道，「總好過每個人都一樣，好似copy and paste咁。」



我心裏不禁有啲驚訝，個個都會話我性格唔好、脾氣唔好、成日都冇表情，顯得我好cool，好多人都會因為我呢個性格而唔接近我，又或者第一感覺已經唔好，但方芷諾竟然會覺得咁樣冇咩唔好？

「咁你覺得佢同周樂恆，邊個靚仔啲？」李靜愉突然間開口好似搶答咁問道

「唔…認真答嘅話…」方芷諾陷入咗沉思嘅狀態，其他四個女仔都一臉期待咁望住佢，「我覺得佢靚仔過周好恆，真心。」

佢係真心覺得係咁，定係純粹講客套說話咋？但其實我都唔可以確定佢地真係講緊我，可能其實佢地講緊第二個

「其實葉子朗聽唔聽到我地咁講㗎…？」喺我仲諗緊佢地係唔係真係講緊我嘅時候，游悠突然間細聲咁講道



「佢應該聽唔到嘅。」李靜愉講道

其實我聽到，你地講啲嘢我都聽到，聽到晒添…只係你地唔知啫…

「我地又唔係講佢壞話。」方芷諾笑了笑，「唔緊要啦～」

嗯！又唔係講我壞話，怕咩啫？不過唔知點解心中總覺得有啲莫名其妙，聽到佢地幾個女仔講嘅時候都冇咩感覺，但聽到方芷諾咁樣一講之後，心入面好似有小小…開心？

我都唔知道呢種感覺係咩，唔知點用言詞去表達，我唔太識得表達…但總之成件事就係開心嘅



當我回神再次抬眼望過去嘅時候，我見到方芷諾耷低頭拎住筆袋搵緊嘢

「搵咩呀？」我聽到李靜愉問

「間尺…」我聽到方芷諾嘅聲音外，仲聽到清晰搵筆袋，筆與筆碰撞嘅聲音

「你係咪今日拎過出嚟呀？」游悠問道

「今朝早囉～」我聽到方芷諾咁講同時，下意識拉出筆袋一望，見到有兩把間尺放咗喺我筆袋入面

唔通今朝早佢遞把間尺比我搣通告嘅時候，我搣完就以為把間尺係自己然後順手拎走埋呀…

我宜家咁樣行過去還會唔會好尷尬…？不過再尷尬都係要還番把間尺比佢㗎…死就死啦

猶疑咗一陣之後，我都係拎住間尺企起身走向方芷諾，坐佢對面嘅游悠最快見到我行過嚟，佢抬頭望我，另外幾個女仔都跟佢一齊望過嚟，李靜愉拍咗方芷諾兩下，方芷諾先抬起頭



「今日唔小心拎咗你把間尺。」我遞把間尺比方芷諾

「唔該。」方芷諾接過把間尺，將佢放番入筆袋

我感覺到佢地幾個即刻就靜咗落嚟，靜咗幾秒都冇講嘢

為咗令自己嘅尷尬感降低，我冇番位，反而直接走出課室打算去個洗手間冷靜一下

我推開洗手間嘅門，行到去洗手盆面前，我做咩會有啲緊張咁…？只係還個間尺啫，緊張啲咩…？

洗手間嘅門一下子被推開，行入嚟嘅係隔離班嘅周樂恆，佢行到第三個洗手盆前面，同我企緊嘅位相隔咗一個洗手盆

聽人講，佢好似係方芷諾之前嘅男朋友，但唔知因為咩原因就分咗手，聽講佢到宜家好似都係中意方芷諾，但當初好似係佢同方芷諾講分手在先



我偷偷瞄向佢，佢個樣都唔太差、身高同我都不分上下啫，我都係168-170左右，不過我應該靚仔啲，方芷諾喺課室嘅時候都係咁樣講

傳聞周樂恆屋企係做生意，我諗佢都算係富二代掛，應該都算係有啲錢，不過都唔關我事，我淨係覺得企喺佢隔離會莫名其妙地有啲自我感覺良好

我離開廁所推門出去，行番去課室，感覺上尷尬感已經降低咗好多，呼～又要準備上堂啦！

喺我踏入課室門口嘅嗰一個瞬間，鐘聲啱啱好響起嚟，唔遲唔早，時間啱啱好～

我行到番埋位，留意到方芷諾同李靜愉喺度傾緊計，我望向方芷諾，佢同李靜愉講嘢有講有笑的

見到佢笑嘅瞬間，我忽然覺得心臟喺一瞬間緊縮咗一下

佢突然間望向我呢邊，我同佢嘅視線剛好對上，我突然感覺到有一股電流一樣嘅嘢快速閃過，就好似輕微地觸電一下一樣嘅感覺…






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link