［愛情甜故前傳--無糖純愛］曾經嘅我地，都係兩條平行線⋯: 57. 誰沒面了？

「唔該阿姨。」我行到佢身後時佢剛好買完，喺阿姨手上接過咗一小袋燒賣

喺佢轉身準備走嘅一刻，佢望到身後嘅我，我頓時就移開視線，不過方芷諾冇特別望向我，佢直接喺我身邊走過

佢著住純白色嘅短袖裇衫，下身著住半截裙，裙長剛好到膝頭嘅一半，感覺上清爽又自然，帶點小清新嘅感覺

「細佬你係咪買嘢食呀？阿姨朝我叫道，對住我招咗兩下手

「哦，係…」我好似突然回神過嚟一樣望向阿姨，我行咗兩步走近咗收銀枱



我買咗個一小袋魚蛋同買咗盒嘢飲就番上去課室，喺課室食完嘢就落去早會

我行前梯落去操場上早會，咁啱方芷諾都係行前梯，佢行喺我前面，不過今日同平時唔同嘅係今日方芷諾係自己一個人，睇嚟李靜愉今日又唔番學

李靜愉好多時都唔番學，所以得方芷諾一個人，一個星期有一定有兩日得方芷諾一個人喺度

方芷諾行喺我前面，每落一格梯級，佢梳着嘅馬尾就擺一下，馬尾向左擺一下然後又甩向右邊，我行喺佢後面，淨係覺得佢嘅馬尾好似人地用嚟催眠嘅鐘擺一樣

完咗早會之後我地番上課室，同平日一樣收功課、聽Miss Yiu講班務，上完頭兩堂之後又去到小息，今日意外地Miss Yiu會準時落堂，平日Miss Yiu永遠都會遲5分鐘先落堂，所以佢會準時落堂應該係「學校十大奇蹟之一」



「聽講呢最近我地班個阿健搵到女朋友，隔離班思恩。」坐我右邊嘅余嘉偉細細聲咁朝我、Wilson同埋坐佢後面嘅徐思迪講道

「阿健搵到女朋友？講笑咋…？」徐思迪一臉訝異，明顯地唔太相信呢個係事實，然後又開玩笑道，「佢都搵到女，咁我都應該搵到啦！」

余嘉偉口中講嘅阿健，喺我地班上嚟講都算係宅男，佢份人好靜，同我嗰種靜唔太一樣，佢嗰種靜係內向嗰種靜；而我嗰種靜係唔想講嘢嗰種靜

「思恩都算係高質女嚟㗎喎～」Wilson都一臉驚訝，明顯地又係一個唔相信呢個係事實嘅人

其實我唔知邊個叫思恩，我淨係知最近日日都有個女仔同阿健一齊番學



「呢排的確係有個女仔同阿健一齊番嚟，但咁樣就代表佢兩個一齊㗎啦咩？」徐思迪講道

「如果唔係一齊就冇必要一齊番。」我開口講道，「如果前後腳番嚟咪仲怪。」

「咦～係咩？」余嘉偉聽到之後忽然揚起嘴角，露出一個玩味十足嘅笑容望向我，「喂你最近好似成日都同方芷諾前後腳番嚟課室咁，咁你兩個係咪有嘢呀？」

聽到余嘉偉呢番說話，我嘅心跳喺一刻間加快咗跳動嘅速度，雖然唔係好強烈嘅跳動，但我感覺到我嘅心跳明顯地比啱啱快咗

「你諗多咗。」我下意識就回答道，我嘅聲音比腦袋更快比出回答，「只係咁啱。」

「聽阿健講，佢一開始都唔知自己中意思恩。，佢都係後來先發現。」余嘉偉講道，「佢好似話佢上網搵過咩中意一個女仔嘅表現有咩之類。」

我對戀愛嘅事就真係冇咩興趣，所以我都冇特別留意佢地講嘅嘢，我一手托住頭耷低頭，另一隻手拎住手機放櫃桶睇

「我又真係幾好奇佢到底睇到啲咩。」我聽到徐思迪講道



「好似話咩佢自己成日留意住思恩嘛～」余嘉偉講道，「後來佢又有啲心動，每次一見到思恩就會覺得有心跳加速嘅感覺。」

我聽到佢地咁樣講嘅時候怔了一怔，點解有啲似我最近行為咁…？

我不禁吞咗一啖口水，偷偷地抬眼望向方芷諾，嗰種觸電般嘅感覺再一次傳嚟，心臟好似有少許像麻痺一樣嘅感覺，再一次緊縮咗一下

「聽佢講，一開始佢唔會覺得自己有特別留意思恩，但後來好似—」「咔啦！」

我覺得自己有啲唔自在，然後一下子就企起身，張櫈比我推後咗，喺我企起身嘅瞬間，櫈推後嘅聲音打斷咗佢地三個人嘅對話

「做、做咩呀突然…？」Wilson問我，我見到佢地三個人都望住我

「冇咩…」我講完之後就大步大步地走向課室嘅門口，行出課室朝廁所走去



我點會中意咗方芷諾？我「拒絕」咗佢嘅表白，證明我對佢冇興趣啦！咁我又點會中意佢…？佢地三個人講啲嘢可唔可信都唔知，而且網上講嘅嘢可以盡信㗎咩？因人而異㗎嘛…

我又點會咁冇面咁瘀…真係中意咗方芷諾呀…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link