［愛情甜故前傳--無糖純愛］曾經嘅我地，都係兩條平行線⋯: 58. 胡思亂想

我企喺洗手盆前面，開咗水龍頭，伸手濕一濕水然後洗一洗面

「如果我真係中意咗方芷諾…」腦海中浮出呢個問題，但我好快就否定咗自己呢個想法，「唔會，我唔會中意方芷諾…我對佢又點會心動…？」

我唔會中意方芷諾…！以後都唔會中意佢…！

去完廁所我行番去課室，見佢地三個仍然興高采烈咁討論緊同一個問題，我真係唔知可以講啲咩好…

身邊嘅人好似都對「戀愛」呢樣嘢好感興趣咁，但我就真係唔明白有咩咁吸引，亦都唔明白佢嘅意義係咩，係一時嘅快感？一時興起？定係只係一刻嘅衝動？



戀愛又唔會令人嘅生活變得好啲，呢種以情感為基礎嘅事只會令人嘅生活變得麻煩什至比本來更糟…佢只會令你嘅生活出現更多不明所以、無法解釋嘢事同情感，呢啲嘢都唔係生活中嘅必需品

「你地講到好似好簡單就可以中意到一個人咁。」我望向佢地講道

「只要一下觸動到，成件事就好簡單啦！」徐思迪笑咗一笑，聳聳肩講道，「可能只係某一刻一個對望，對方就已經吸引到你嘅注意，只係你自己唔知啫～」

「都係喎，通常你第一下好難察覺到幾時比佢吸引到，因為只係好簡單咁用一秒就得。 」余嘉偉豎起食指，「例如…喺某一刻你兩個對上眼，當下你未必會知道，不過你會喺嗰一日之後開始留意佢囉～」

「講到你地好似好有經驗咁…」我無奈一笑，「我就唔信真係會囉。」



「你冇中意過一個人啫！到你搵到中意嘅人就明㗎啦！」Wilson伸手搭喺我博頭上

我只係輕輕一笑，搖一搖頭，然後喺櫃桶拎咗本書出嚟，等鐘聲響起上堂

啱啱余嘉偉同徐思迪喺度講起喺某一刻對上眼嘅問題嗰陣，其實我腦海中閃出咗一個畫面…就係喺地理室嗰一日…

喺個紙箱要跌落嚟嘅時候，一見到嘅時候我諗都冇諗就大步衝到佢面前伸手扶住咗個紙箱…嗰一刻，我同方芷諾之間嘅距離好近，我地之間嘅距離近得我都可以聽到方芷諾又淺又急速嘅呼吸聲，或者佢係比我突如其來嘅舉動嚇親，當佢見到我鬆一口氣嘅時候先抬頭望，嗰下先發現原來個紙箱要跌落嚟

喺我伸手扶住個紙箱嘅時候，我稍微低頭望佢嘅瞬間，佢都剛好抬起頭望我…嗰一次係第一次我同佢喺一個咁近嘅距離對望着…



「我又喺度諗咩…」我輕輕皺起眉頭，喺心中問自己，我最近問自己問得最多嘅問題應該係呢個問題

我都唔知自己諗緊咩喺度…呢種難以言喻嘅感覺，令我覺得好麻煩

放學嘅時候，我同平日一樣落咗球場打波，但打咗一段時間我坐喺旁邊休息時，我就發現好似有啲唔自在，總覺得好似邊度怪怪地咁…

我講唔出有咩唔自在，就係覺得好似少咗啲咩咁，搞到打波嗰陣渾身唔自在，投籃幾次都唔中

忽然我摸一摸褲袋，我終於知道我漏咗啲咩，係最重要最重要嘅嘢…手機！

我望入去小食部，見到掛喺收銀枱隔離個鐘顯示宜家係5點正，我即刻孭起書包，然後上番課室拎

咩都可以留低唔記得帶走，就係手機唔可以！

我急步由G樓行上4樓，，希望唔好有人執到我部手機啦！由得我部手機放喺櫃桶就好啦！



我之所以咁肯定我一定係放咗喺櫃桶係因為我平日番到學校之後，我都會將較咗做靜音嘅手機放喺櫃桶，喺放學之前個小息先會放番入褲袋

但係我今日喺放學之前個小息嗰陣比人捉咗去講功課問題，一講就講到小息完，然後我就直接去咗音樂室上堂，放學嗰陣我就直接走咗，連手機都唔記得咗拎

我上到四樓，差唔多到課室嘅時候，我見到課室仲開住燈，我即刻加快咗腳步行過去，但當我差唔多行到嘅時候，課室嘅燈熄咗，我即刻又加快咗腳步

喺我到課室門口嘅時候，有人喺入面行出嚟，但因為我行得太快又趕唔切剎制，對方見到我嘅時候嚇咗一跳，不穩咁向後行咗兩步

佢手上抱住一疊厚厚嘅紙，紙上面放咗個釘書機，釘書機因為對方企得不穩所以向左邊滑，我一下子就伸手㩒住個釘書機，下意識伸手拉住咗佢嘅手肘

點解，呢個場景咁似層相識…？一樣嘅人一樣嘅事似的…好似喺唔知幾時都有發生過一 樣

我同佢嘅視線對上嗰一刻我先睇清楚佢係邊個…方芷諾…！



但我好似…唔係好敢同佢對望一樣，不禁吞咗一啖口水，然後就移開咗視線

「唔、唔該。」佢朝我微微一笑講道，「嚇親…」

「唔好意思。」我講咗一句之後，佢就行咗去右邊，喺我身旁行過離開咗課室




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link