［愛情甜故前傳--無糖純愛］曾經嘅我地，都係兩條平行線⋯: 61. 矛盾又沒面子的事

我自己都可以察覺到呢件又矛盾又冇面嘅事，因為就喺啱啱見到佢笑，見到佢行出去周周樂恆講嘢嘅嗰一刻，我嘅心跳強烈到心臟都好似要跳出嚟一樣

我係妒忌？我都唔知，因為以前冇出現過呢種感受，我淨係覺得有啲唔好受…

明明已經分咗手，唔通佢地一齊番？但係又唔似，因為佢地問係咪舊情復燃嘅時候，方芷諾嘅答案明顯地表示咗佢唔係，如果係真係舊情復燃又點會一臉無奈？

唉…唔知呀…好麻煩呀！

就係我喺心中承認咗自己中意方芷諾嘅一刻，心中好似輕鬆咗啲同時有啲壓力，因為我中意咗一個性格好成績好樣好嘅女仔



我讀書成績咁差，如果啲人知道我中意佢，會唔會覺得我配唔起佢？我係咪應該要上進啲，努力啲讀書呢？嚟緊嘅考試應該就係最好嘅證明，話比佢知我有進步，佢會唔會注意到我？

不過要等到考試先發力，好似又太遲，下星期四就開考啦！我一定要好努力追番個成績番嚟先得

喺Lunchtime完咗之後嗰堂，我都覺得我比起平日更加用心聽書，比平日更加專心上堂，為咗可以考好啲，同佢嘅距離拉近一啲

放咗學之後我照舊喺籃球場打波，方芷諾、李靜愉、游悠、張雯茵同李詩雅五個人喺小食部溫書，今日佢地冇傾計講笑，大家都好認真咁溫書

籃球喺籃球架嘅軟墊前靠着，我坐喺一旁嘅長櫈上休息飲水，但拎起水樽咕嚕咕嚕咁飲起嚟



方芷諾坐嘅位買最近籃球場，佢坐緊位置亦冇人遮到佢，我呢個位可以望得好清楚

佢嘅右手托住頭，頭同馬尾都向右邊微微側着，耷低頭專心咁望住課本，彷彿除咗書中嘅字同喺心中默默背馬嘅課本內容重點外，冇嘢可以吸引到佢嘅注意一樣

佢偶然抬起頭，望向另一個籃球場，我循住佢嘅視線望去，嗰度空無一人，我再次將視線移向佢，佢已經收回視線仲伸一個懶腰

坐佢隔離嘅李靜愉望向佢笑住咁講咗兩句，方芷諾都笑起嚟，佢笑起嚟真係特別好睇

見到佢努力溫書嘅模樣，我都不禁想要努力讀書，想宜家就番屋企乖乖溫書，我將水樽放番入去書包入面，行到籃架前將籃球執起，後退咗兩步之後輕輕一躍



籃球再一次離開我嘅雙手比我拋出去，籃球圍住籃框嘅邊緣轉咗一圈，但今次冇入籃網，反而向外跌

我好少投失球，我將籃球一把接住，然後又默默地將視線望向小食部嗰邊，方芷諾已經再一次耷低頭溫書

我有啲想執嘢番執溫書，但係我又唔太想番去住…

直至5點半嘅鐘聲響起，我先執嘢番屋企，我一邊執嘢一邊偷偷抬眼望向小食部，留意住佢地走未

佢地企喺度傾咗兩句計，我見佢地未走就企喺度又拎出水樽飲兩啖，繼續用眼尾偷偷瞄着佢地嘅一舉一動，我忽然覺得自己有啲似變態…

見到佢地都孭起書包準備走嘅時候，我先至慢慢行，行喺佢地嘅身後，但我嘅視線中好似只係有方芷諾一個人一樣

我番到屋企之後第一件事係沖涼，然後就係拎書出嚟溫，好難得我竟然會真係發奮仲要主動拎書出嚟溫

我打開課本，感覺上入面就好似火星文一樣，明明上堂聽過，但點解宜家我再開書睇覺得同冇學過冇咩分別咁…下個星期四就考試，得番一個星期可以追番進度，但我邊度追得切？



中文就話可以上網搵下分析解讀；英文都係「三分天註定，七分靠打拼」，幸運嘅係得英文都唔差；數學可以做練習題，但係呢度有咁多課，要通宵幾多晚…仲有Geography、中史、History、Econ同Science

一個星期點樣溫八科？搵神仙救我都趕唔切啦！我最有信心嘅科係Science同Econ，但剩低嘅科都係要背書、靠天命先得，點樣用一個星期嘅時間溫晒咁多嘢？

最遲考嘅係中史，所以中史可以最遲先溫都冇問題；第一科要考嘅係英文，我都冇溫嘅打算，呢啲要靠天命嘅嘢就靠天命； 反而第二科要考嘅係數學，我要集中做數學題先得，要做番晒咁多課，雖然我唔肯定我係咪真係可以趕得切喺考試之前趕得上數學嘅進度，但係至少都要溫咗範圍包括最多嘅課題先

「好！宜家就溫！」我拎出數學書放喺書枱上，喺數學書上面放咗堂課簿

我由範圍最多嘅嗰一課開始，由頭開始再自學一次，然後再做每一部分嘅練習題，我一定要趕得切喺考試次前溫好，就算冇溫晒，都要每課識得最基本嘅嘢

「呢度要點㗎…」我望住其中一題乙部嘅練習題，甲部嘅我都做好做晒，亦都已經對過答案，所以應該都Okay，但一嚟到乙部我就覺得有啲難度

我又將書掀番去前面嘅頁數，然後望一望某一啲例題，早知就努力啲聽書啦…






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link