女仔嘅後頸,就好似「絕對領域」一樣係令人感到神聖且可以侵犯嘅位置,有着致命嘅吸引力

佢先比完錢離開麵包店,喺佢踏出麵包店門口時,店員啱啱好找完錢比我

我企喺麵包店嘅門口,行到出嚟嘅第一個反應係望向左邊,望到方芷諾嘅背影,佢嘅手腕上勾住咗裝牛油軟包嘅透明膠袋,我諗佢宜家應該會直接食個吞拿魚包

我不禁輕輕一笑,然後行同佢相反嘅方向番屋企,佢嘅舉動真係好易估

「呀…攰死啦…」一番到屋企嘅第一時間係去沖涼洗頭,我諗好多男仔麵同我一樣會有呢個習慣,每日一番到屋企嘅第一件事就係要沖涼洗頭,好似比起女仔更加有潔癖咁



不過男仔嘅習慣就係咁,覺得咁樣先夠乾淨,我將頭髮洗乾淨,雖然我唔算係好易出汗,頭髮亦唔係話好易黏膩油油的,但係我都係慣咗要每日洗頭先得,如果唔係真係渾身都唔自在

呼~沖完涼真係成個人都舒服晒,我喺旁邊嘅架上拎咗個風筒落嚟將頭髮吹乾,好隨便咁吹兩下撥一撥都已經乾咗七、八成

我平日都係自己一個人喺度,所以客廳好少會開燈,我唔太怕黑,細個嗰陣都會驚,但慢慢大個就覺得冇咩好怕

再加上我都唔係成日喺客廳,多數一番嚟就係喺梳化灘一陣,然後就去沖涼,沖完涼出嚟就入番房,喺客廳嘅時間真係少得可憐

我閂上風筒,將風筒放番喺架上面,我閂上廁所嘅燈同門,然後又拎埋放喺梳化上面嘅書包番房



我坐喺書枱前打開放喺木枱面上嘅手提電腦,唔知係咪因為今日聽到徐思迪佢地講嘅戀愛話題定點,我放喺鍵盤上嘅手突然間停咗落嚟,只係輕輕咁搭喺鍵盤上面,諗起佢地今日講嗰啲嘢

我最近好似又真係成日都不自覺咁就望向方芷諾咁,而且我最近好似真係一望向佢嘅時候,心跳好似真係快咗…

我唔係真係中意咗方芷諾呀…?但我嘅行為又真係幾似係真係中意一個人嘅表現

「唔會嘅唔會嘅!」我拍咗自己嘅臉頰兩下,「先唔會…」

我伏喺枱上,手拎住手機把玩着…其實我自己都有啲迷惘,我都唔知自己想點,正確嚟講應該係話,我都唔知道我自己點解會有呢啲舉動,我真係中意方芷諾咩?有可能咩?如果我真係中意佢嘅話,我同自打嘴巴有咩分別?



「唉唔知呀…!」我心中突然覺得有啲納悶同煩躁



「真係咩?我又要我又要!」一到咗Lunchtime班女仔就又聚集一齊傾計講笑

「下星期咪考試嘅~我地咪話一齊溫書嘅~去圖書館好唔好呀?」李詩雅講道,一聽就聽得出係佢把聲,因為佢把聲係佢地幾個入面最尖

「但芷諾唔中意去太靜嘅地方溫書…」游悠講道

「小食部囉~又唔會太靜,芷諾平時都係喺小食部做功課,小食部有大枱。」張雯茵講道

佢地幾個有講有笑咁,成日都會圍埋一齊傾計講笑,女仔嘅心思真係好難明白

我望向佢地嗰邊,但我嘅目光都聚焦喺方芷諾嘅身上…



方芷諾同佢地正傾計傾得開心,臉上都掛上咗甜美嘅笑容,笑得雙眼都微微眯起嚟,臉頰上帶着淡淡嘅紅霞…雖然佢嘅微容未去到「一笑傾人城,再笑傾人國」嘅地步,但佢嘅笑容的確好甜美,好似一個唔留神,就比會吸引咗目光一樣,移唔開視線

其實諗真啲,方芷諾都唔算係太差,點解我當初會拒絕佢嘅…?

「有人嚟搵你呀~」忽然聽到其中一個女仔咁講,方差諾望向門口,然後就企起身行出去,佢地幾個女仔命笑得好心,一臉好奇咁望向門口

我循住佢地嘅目光望向門口,見到一個男仔企喺門口等方差諾,佢就係方芷諾嘅前任—周樂恆

我嘅心中覺得有少許不是味兒似的,有啲唔太中意嘅感覺,方芷諾仲要微笑着咁行出去,分咗手之後真係可以做朋友㗎咩?

方芷諾喺門口同周樂恆講咗兩句之後就行後埋位,但係周樂恆冇走,我偷偷低頭抬眼望向方芷諾,佢蹲喺櫃桶前搵嘢,拎咗本數學書之後又企起身行出去,行到門口遞比周樂恆,周樂恆拎咗本嘢之後就行走咗

「嘩~人地嚟搵你喎~舊情復燃呀?」方芷諾行到番埋位,幾個女仔即刻對佢倜侃咗兩句



「講咩呀?」方芷諾一臉無奈咁笑起嚟,「佢問我借數學書咋!」

我伏低喺枱上冇再望向方芷諾,兩個星期前先同人講完話一世都唔會中意佢,轉個頭就默默留意人…成件事又矛盾又冇面,但我好似…真係中意咗方芷諾…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link