喺第一個小息之後就係數學堂,我琴晚做咗幾個鐘頭數之後,我宜家見到數學真係有啲厭惡…

「The exam is coming, so we’re going to have a revision this week and next week.」Mr. Li講道,因為嚟緊就考試,所以Mr. Li決定用呢個星期溫書,佢仲話簡單同難嘅數學題都會做

太好啦,佢終於唔係淨係諗住做啲難到打晒星嘅題目

「Turn to page 42 and finish question no. 28. 」Mr. Li講道,我掀到去42頁,第28題已經係乙部嘅題目,我諗我應該都可以做到嘅

我拎起鉛芯筆,望一望題目,然後喺堂課簿上面寫低咗條式,再計一計答案,然後又掀起後面嘅答案頁對一對答案,但我計出嚟嘅答案同書寫嘅正確答案唔太一樣



我即刻就望向堂課簿,唔…邊度計錯咗?我即刻就計多一次,會唔會係中間嘅步驟計錯咗呢?我小心咁樣將中間嘅步驟重新再計一次,第二次再計嘅時候,我用番本來計到嘅無盡小數去計番個答案,今次就計啱咗

我喺數學書寫低咗要用本來嘅數去計,去提醒自己唔好再犯同樣嘅錯,如果考試嗰陣錯呢啲大意嘢嘅話就真係超唔抵,如果今個學期考得好啲就好,我好似突然間好勤奮向學咁

今次Mr. Li唔係叫我出去,叫咗第二個出去做,不過其實我都唔太想行出去…

數學堂之後就係中史堂,我淨係覺得上中史堂好悶,但宜家我又決定咗要發奮讀書,但係由中史堂嗰個Miss Cheung一行入嚟嗰一下開始,我已經覺得有啲攰…可能係因為我本來就唔太中意中史科啦

我琴晚將考試嘅時間表貼咗喺書枱方便我溫書,琴晚溫咗數學,今晚要溫咩?



中史堂對我嚟講係一種折磨嚟…因為我對中史真係冇咩興趣,History會好啲,但對中史真係講都唔洗講,悶到好似催眠曲咁

我托住頭聽住書,手拎住筆,我好努力咁去集中精神聽書,但係我真係覺得有啲眼瞓,Miss Cheung有印中史嘅Notes比我地,等我地溫書嘅時候方便啲,所以溫中史嘅話溫Notes就得

我托住頭,目光不自覺地就落喺方芷諾身上,佢手上拎住淺黃色嘅螢光筆,喺Miss Cheung派嘅筆記上間完又間,或者呢個就係我同佢嘅差別,係努力讀書同唔努力讀書嘅差別

我喺筆袋中拎出螢光筆,我筆袋入面一定會有,但係都冇咩點用過咁

「間重點係咪真係有用…?」我有啲猶疑咁開咗螢光筆嘅蓋,帶着半信半疑嘅感覺間落去中史筆記上面,感覺上嗰句嘢好似突然好突出咁,成張白紙上面突然間有一句嘢變咗黃底黑字



我都試着用螢光筆去間重點,個個老師都會話咁樣係會易啲溫書,我就冇試過啦…不過宜家試下,既然好似真係好有效咁

去到放Lunch嘅時候,我照樣又係坐喺位一邊食飯一邊睇手機,仲要用筆袋放喺枱面遮一遮,雖然學校都唔係話唔比帶唔比用,不過咁光明正大都係唔太好

午膳之後係地理堂,地理堂之後就係孖堂中文堂,中文堂之後就放學,我喺度諗緊,今日放學之後應該留喺學校打波定係番屋企溫書好

我望向後面嘅壁佈板,有同學喺上面釘咗考試嘅時間表,我望到喺考中史之前嘅一科係Science,我對呢科都幾有信心,所以都唔洗咁早溫,我再向前一枱望,尾三考嘅科係History

咁今日唯有帶History番去溫啦…既然決定咗要努力,咁樣就要堅持到底,唔可以再半途而廢

「其實點解我唔留喺學校溫書呢?」喺某一個瞬間我諗到呢一個問題,我下意識望向方芷諾,佢正托住頭睇手機,口中咬住飲管,連拎起包嘢飲都覺得麻煩

唔知由幾時開始,望向方芷諾呢個動作已經變得好似習慣一樣平常,一抬頭一抬眼,視線好自然就朝佢移去…亦唔知由幾時開始,我望佢嘅眼神好似愈嚟愈鬼祟,只可以喺大家都望向佢嘅時候又或者行喺佢身後嘅時候先可以光明正大咁望向佢…

我都唔知呢個改變係由變時開始,好似突然間有一日開始,目光就好難再喺佢身上移開,佢嘅一顰一笑都成為吸引我嘅目光嘅理由,點解嗰陣我會察覺唔到佢嘅笑容係咁好睇?



有啲後悔拒絕咗佢其實,如果當初我一早發現到佢嘅吸引點,冇拒絕佢…成件事係咪會變得唔同好多?我諗至少我宜家可以光明正大咁望向佢、同佢對望,可以自然咁行喺佢隔離同佢講嘢

但可我望向佢嘅目光,總有一日會收回…可能有一日我都唔會再中意佢,雖然唔知道呢一日係幾時

原來已經差唔多打鐘上堂啦,我仲未去Locker度拎番本中史書

我企起身行向寫住我學號嘅Locker,拆咗個鎖然後蹲低喺凌亂無比嘅Locker入面拎番本中文書出嚟

「叮噹叮噹,叮噹叮噹…」

弊啦今次…Miss Chan入到嚟啦,佢最憎人地打咗鐘先去開Locker㗎…今次真係弊上加弊






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link