［愛情甜故前傳--無糖純愛］曾經嘅我地，都係兩條平行線⋯: 64. 罰站

「葉子朗、徐思迪！」Miss Chan叫我同徐思迪個名，「做咩唔一早開Locker？上堂先嚟開？」

今次比Miss Chan罰硬，平日佢都會隻眼開隻眼閉，但今次比佢斷正就真係冇嘢好講

「喺Locker前面企10分鐘先好番位坐！」Miss Chan講道，我同徐思迪都一臉無言咁企喺原位冇行番埋位

不過比起比Miss Chan罰我地企更弊嘅，係我企緊嗰個位喺正方芷諾個位隔離…你話我今堂頭10分鐘邊有可能可以專心？

心跳嘅速度又開始不斷上升加快，我已經好努力咁控制住自己唔好望向佢，淨係望住黑板就得，但始終我眼尾嘅餘光仍然係可以見到佢，不自覺地又想朝佢望去



「我地講埋上次未講密嗰度，打開第32頁。」Miss Chan講道，我聽到之後都默默將書掀到第32頁

方芷諾打開中文書，我望到佢本書嘅時候，有啲訝異，默為佢嘅中文書一啲都唔似我，我本書好乾淨，佢本書同我完全係相反…

我嘅意思唔係話佢本書好污糟，而係佢本書入面全部都寫滿咗密密麻麻嘅筆記，佢就咁將筆記寫喺每一段嘅隔離，課文嘅段落裏，句子都比佢用唔同顏色嘅原子筆同螢光筆寫低重點、解釋同埋間住

有啲直接圈住然後再畫咗個箭嘴指向空白位，然後又寫低咗解釋同嗰句嘅意思，佢真係好比心機讀書…佢一如既往好專心咁聽書，聽到重點之後又寫喺書上，書上有啲仲係用鉛芯筆寫嘅，佢好似已經幫佢地分好晒類別咁

我望向我本書，乾淨到一個點，感覺上同新書無異，除咗係個書角有少少皺起，書皮有少少污糟之外，內頁就好似我啱啱買呢本書番嚟嗰陣一樣乾淨



我望向課室嘅時鐘，原來已經企咗5分鐘…再企多5分鐘我就要番埋位，突然間覺得比人罰企原來都可以係好事嚟

「葉子朗、徐思迪，你兩個答啱咗問題就比你地早啲番埋位坐。」Miss Chan望住我地呢邊，「廉頗點解要向藺相如負荊請罪？」

啱啱我其實聽到Miss Chan講咗廉頗負荊請罪嘅原因，但我唔想番埋位住，想企埋嗰5分鐘

「你地邊個識答呀？」Miss Chan一問，全班嘅人都望向我同徐思迪，方芷諾抬頭望咗我一

我冇講嘢，徐思迪見我冇出聲就即刻搶答



「徐思迪你番埋位啦！」Miss Chan點一點頭，徐思迪即刻就喺我身邊行過番埋位

我偷偷地瞄咗方芷諾一眼，唔知我地仲有冇機會可以拉近我地之間嘅距離呢…我希望有，其實我好想搵個機會同佢講嘢，就算係問一句都好，我都會覺得開心，至少距離拉近咗啲啲

當初嘅方芷諾係唔係都係咁諗？對我係咪都有一樣嘅想法同心思？我宜家好似明白嗰種每一次都想同對方講到嘢嘅感覺，方芷諾有勇氣踏出一步同我拉近距離，但係我冇勇氣…

我冇勇氣走上前拍佢，佢應該會覺得我好奇怪…佢會討厭我…我想同佢做朋友…至少係朋友…

方芷諾曾經都係咁諗過？如果係嘅話，咁我同佢都一點相通嘅想法…

「葉子朗，番埋位坐啦！」Miss Chan對住我講道

我拎埋中文書行番埋位，原來已經夠10分鐘啦…心裏有少許失落，我都係冇同佢講到嘢，好想突然有一個機會可以同佢講到嘢…

人人都話…機會係要自己爭取番嚟，係留比有準備嘅人，但其實機會更加係留比願意鼓起勇氣踏出一步嘅人，如果連踏出一步嘅勇氣都冇，仲講咩要自己爭取同有準備？



我偏偏就係嗰個冇勇氣嘅人，如果我嘅成績好咗佢會唔會留意到我嘅改變？會唔會因為咁樣可以拉近我地之間嘅距離？就算係做朋友我都唔會介意，至少唔係純粹一個同班同學…

之前聽過方芷諾講話想讀理科，唔知佢係想讀邊科…我地學校比較特別，理科係有分中英文組，想大家易掌握啲

但我諗就算我地想讀嘅科一樣都好，我地最後都唔會係一齊讀，因為我覺得讀中文組比較啱我，而方芷諾應該都係讀英文組嘅人，我同佢嘅差距好似就係冇辦法拉近一樣…

但如果我地下年同班就好，因為上到高中之後，班別就唔會再變，三年都會係同一班，就算我地唔同科，同一班都唔錯呀

放學嘅鐘聲響起，所有人都喺度執嘢準備走，但我仍然有啲猶疑今日到底執打波好定係喺小食部溫書好

我將History書放入書包入面，喺落到G樓嘅時候我有啲猶疑，諗咗一陣之後我決定行出校門，我揀咗番屋企溫書，喺小食部溫書嘅話我一定集中唔到精神，所以我番屋企對住四面牆溫書比較好

今次應該係我久違地一放學就番屋企，我都已經唔記得咗對上一次一放學就番屋企嘅時候係幾時，已經係太耐之前嘅事






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link