［愛情甜故前傳--無糖純愛］曾經嘅我地，都係兩條平行線⋯: 72. 她的笑容

我同周樂恆冇咩接觸，不過我就係唔中意佢，睇佢唔順眼

我望向方芷諾，我都唔知點解，就係唔中意周樂恆行近佢，因為周樂恆一定係抱住其他心思留喺方芷諾身邊，我就係睇佢唔順眼，但可惜我冇資格冇身份要佢離開方芷諾嘅身邊

如果我係方芷諾男朋友，我第一時間就會處理咗周樂恆呢個人，唔會比佢再接近方芷諾，嗯…如果我係佢男朋友嘅話…

「你地知唔知最神奇嘅係咩呀？」徐思迪突然又開口講道，又再一次打開嗯個話題

我望向徐思迪嘅同時，Wilson同余嘉偉都望向徐思迪，而周樂恆就行出咗我地課室



「最神奇嘅係，周樂恆明明係有錢仔，但係偏偏要自己搭車番學。」徐思迪露出一個意味深長嘅笑容

「可能會中意自己搭車多啲呢～」Wilson一臉不在意咁講道

「睇嚟就唔係啦～」余嘉偉講道，我都覺得一定唔會係因為佢自己中意搭車，邊個有錢仔會中意搭巴士搭地鐵番學？唔洗問都知點解會要揀自己搭車啦

我今次冇搭嘴講嘢，費是陣間講多錯多，比佢地發現我真係中意方芷諾…我唔講真係唔係因為我信唔過佢地，只係我唔想會有其他人知道我中意方芷諾

放學嘅時候，我今日都打算留低溫書，畢竟考試要嚟，我今日都溫埋中文



「今日一齊去圖書館溫書好唔好？」徐思迪行上嚟，一下就搭住咗我同余嘉偉嘅博頭，我望向佢打量一下，佢已經孭好書包

「做咩突然去圖書館溫書？」余嘉偉一臉疑惑咁問，Wilson企喺徐思迪身後，好似等緊我地嘅答覆咁，「Wilson你去呀？」

「Wilson去呀～一齊去啦！最多溫完書我地一齊食飯啦！」徐思迪一臉誠懇咁望住我地

「行囉咁…」余嘉偉瞬間答應，佢地三個望向我，我同佢地都算係熟㗎啦，因為大家坐得近

我見佢到三個人都定睛望住我，無可奈何地答應咗都係，算啦，反正我都要溫書，既然係咁咪一齊溫囉，反正我又冇咩所謂



四個人入面我行最後，佢地先拉開圖書館嘅門入去，一入到去見到四個女仔坐喺8人枱嗰度溫緊書，方芷諾、游悠、張雯茵、李詩雅

佢地三個冇講嘢然後就直接徑自行咗去大枱嘅方向，圖書館入面有兩張8人枱，方芷諾佢地坐喺前面嘅嗰一張；佢地三個男人一行過去，班女仔就抬起頭望，我跟喺佢地身後行過去

「一齊坐得唔得？」余嘉偉問道，我企喺李詩雅嘅身後，偷偷瞄咗坐喺佢對面嘅方芷諾一眼

「哦，坐囉。」游悠先開口，佢冇拒絕，我拉開李詩雅隔離張櫈坐低，徐思迪行到去方芷諾隔離坐

方芷諾見徐思迪拉開張櫈就默默咁將自啲嘢移開同疊番好，徐思迪同佢講咗聲唔該，方芷諾微微一笑講唔洗客氣，佢兩個咁樣嘅互動令我嘅心情有啲唔好

我將中文書放喺枱面，其實我都唔知要點樣溫中文，都冇咩特別嘅方法可以溫到中文，我托住頭嘗試專注咁溫書，但係我總係不自覺地就望向方芷諾

佢專注地望向中文書，纖細嘅手上拎住藍色嘅原子筆，佢將髮線繞到耳背，視線固定喺書上

我完全冇辦法專心溫書，視線冇辦法從佢身上移開，我唔敢好明顯咁抬頭望佢，只敢一直耷低頭扮睇緊書然後偷偷地抬眼望佢



方芷諾忽然微微將頭抬起，但又冇完全抬起，就好似佢感覺到有人望住佢，但又唔敢肯定係咪真係有人望住自己，唯有默默地抬起頭；我見到佢嘅舉動，心中一顫，頓時將視線移回書本上

過咗一陣，我感覺到佢好似已經耷低番頭，所以我又偷偷地稍稍抬頭望向方芷諾，就喺我抬頭望到佢佢嘅瞬間，佢剛好都望向我，我同佢嘅視線…對上了！

我同佢嘅視線久違地對上了，我有啲愕然同時，喺佢精緻嘅臉上都露出咗一絲嘅愕然，我地因為同對方嘅視線對上而同樣地感到愕然

方芷諾好快就收起咗愕然嘅表情，移開視線，露出淡淡嘅微笑耷低頭；我喺眨眼嘅時候將視線再一次收回，有啲唔自然咁伸手托住下巴

「啱啱佢係咪因為同我對望所以先微笑…」佢嘅笑容喺我腦海中浮現，縱使我已經耷低咗頭，但佢嘅笑容好似已經刻咗喺我腦海入面一樣

我一諗起佢啱啱好似有啲怕醜有啲腼腆嘅微笑，我就忍唔住笑意，我抿着唇忍住笑，偷偷用托住下巴嘅手移到嘴前

方芷諾嘅笑容，係令我最心動嘅事






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link