［愛情甜故前傳--無糖純愛］曾經嘅我地，都係兩條平行線⋯: 73. 你喜歡誰？

佢嘅笑容，一直都係咁好睇，我想好好守護佢嘅笑容…咁樣講好似有啲肉麻，而且好似好情深咁，亦都唔似我嘅性格會講嘅嘢

方芷諾右手托住頭溫書，頭微微耷着望書，左手拎住原子筆；偶爾同坐喺佢隔離嘅游悠細聲講兩句，然後又細聲地笑了笑

我耷低頭溫書，但係佢嘅笑容卻喺腦海中揮之不去，我希望佢一直都會咁開心…佢嘅笑容好似已經刻咗喺我嘅腦海入面…

每次見到佢嘅笑容，總覺得內心好似逐漸被融化緊一樣，本楚諗住佢我已經冇辦法專心咁溫書，宜家佢就坐喺我對面，我更加冇可能集中精神

「後日就開考啦！你快啲同我集中精神溫書呀！」我喺腦海中對自己大聲咁嗌，我為咗想再集中精神，我瞬間就伏低喺枱面上，但我喺低喺枱上嘅瞬間，我感覺到嘅，係強烈嘅心跳



通往心臟嘅每一道神經線都突突咁跳動，有一絲絲嘅電流通過神經線去到心臟，心臟強烈嘅跳動，令我嘅臉頰有少少發熱嘅感覺，我感覺到連耳仔都有少少熱，心跳嘅聲音強烈得好似直接傳到我腦袋，我都可以聽到自己心跳嘅聲音

伏咗一陣之後我緩緩坐番起身，努力地刻制住自己唔好望向方芷諾，但係我都唔知方芷諾有咩咁吸引，佢好似吸引住我嘅視線一樣，我明明已經耷低頭睇書，但仍然會不由自主地偷偷抬眼望向方芷諾

當我嘅視線一旦落喺方芷諾身上，就好似…冇辦法再移開啦…

「喂葉子朗…」坐我隔離嘅余嘉偉突然叫咗我一聲，我望向余嘉偉，佢一副神神祕祕嘅表情，「你有冇秘密？」

「我冇咩秘密。」我無奈咁望咗佢一眼，諗都冇諗就回答佢，余嘉偉用一個懷疑嘅眼神望住我



「哼～」余嘉偉瞇起眼，嘴角微微揚起，「你有冇中意嘅人呀？」

佢點解要喺呢個時候，呢個組合嘅情況下問埋啲咁嘅嘢？佢想我答佢咩？我答有嘅話佢就會問係邊個，我話冇嘅話方芷諾咪會覺得我真係冇中意嘅人

「冇。」我下意識選擇咗隱瞞，一嚟係唔想講，二嚟係要避免不必要嘅麻煩

我偷偷地將視線再一次移向方芷諾，我諗宜家我有秘密啦…方芷諾就係我嘅秘密，我唯一嘅秘密

假如我可以中意佢一段好長好長嘅時間，假如我中意佢嘅時間長到佔咗成個寶貴嘅青春，假如有一日佢發現咗我早就為佢回頭為佢停留…佢會唔會覺得感動…？



佢會唔會因為我為佢停留而將我放番喺考慮嘅嗰一個List上面…？我希望佢會…既然我都會回頭，我都會發現到佢嘅好中意佢，咁佢應該都會喺某一日發現我嘅好，再一次中意我

每一次望向方芷諾，我都覺得自己其實有啲幸運，至少自己有比佢中意嘅資格，可能佢中意我只係一個曾經，但我諗當某一日佢見到佢嘅誠意嗰陣，佢會感動

「邊有人會冇秘密㗎？你真係冇中意嘅人？」余嘉偉唔信我，仲要再問，再三確定

「冇。」我平靜地回答佢，「冇中意嘅人…」

「真係？真係冇？」余嘉偉好認真咁望住我問道，我每一次答佢都要克制住自己嘅不安，要冷靜咁答佢嚟避免自己答錯嘢，答答下冇變咗答有

余嘉偉咁樣逼問法，搞到Wilson同徐思迪都望咗過嚟，重點都唔係佢兩個望過嚟，重點係連方芷諾佢地四個都望向我，余嘉偉…都係你做嘅好事…！搞到宜家咁嘅狀況

「你唔好再問啦～你有幾可會見到葉子朗中意人㗎？」Wilson出面笑住講道，「從來都冇見過佢同人傳緋聞，你就更加唔洗講佢有中意嘅人啦～」

我偷偷地瞄咗方芷諾一眼，其他女仔點睇我，我都唔太在意，我在意嘅只係方芷諾…我見到方芷諾抬眼望咗我一眼，然後好似若有所思咁微微耷低頭



曾經我有一刻諗過，方芷諾會唔會只係刻意咁克制住自己，其實內心對我其實都係仲有少許嘅好感…但我的確唔敢有一個肯定嘅答案，因為我同佢次前嘅距離其實好遠，佢之前好努力咁將我同佢嘅距離拉近，但係我好努力咁同佢拉遠距離，宜我嘅我…想再一次拉近同佢次間嘅距離…！

「不過就算Wilson你咁講，我都有啲好奇～」徐思迪望住Wilson笑咗笑之後望向我，「你真係冇中意嘅人呀？」

我一臉無奈咁望向徐思迪，我都唔知可以講咩，唔通真係答佢我有中意嘅人咩？

「冇…」我默默地回答，我下意識偷望咗方芷諾一眼，佢應該預咗我會比呢個答案啦…

我始終都係比咗呢一個回答，方芷諾，呢個名成為咗我心中最大嘅秘密




IG Link: https://www.instagra.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link