［愛情甜故前傳--無糖純愛］曾經嘅我地，都係兩條平行線⋯: 78. 她是我努力的理由

「哦。」我敷衍咁點一點頭，因為我對其他女仔真係冇咩興趣

我嘅目光再一次落喺方芷諾嘅身上，每一次望向方芷諾，我都會諗起一個問題，喺同一個問題上徘徊，猶疑不決…

「其實我…係咪應該表白…？我係咪應該同方芷諾表白…？」

最近呢個想法出現嘅次數多咗，我都開始猶疑係咪真係應該同佢表白，每一次見到佢嘅笑容，我都會有種想將佢據為己有嘅衝動

我心底裏怕有人會比我搶先一步，方芷諾對我嘅感覺係點…？佢對我仲有冇好感之類嘅感覺…？如果佢對我仲有好感嘅話，咁我係咪即係有機會？我同佢表白嘅話，佢係咪有機會會接受我…？



「洛天恩係咪特登撞落你度㗎～」余嘉偉對我講嘅同時，我地點嘅餐嚟到

「佢做咩要特登撞我…」我嘅聲線中夾雜咗一絲嘅無奈

「你唔知咩？」一聽到余嘉偉用呢個疑問句做開頭，我就知道佢講嘅嘢肯定唔啲咩好嘢，「聽講洛天恩好似中意你，你唔知咩？」

余嘉偉你又喺度講咩呀？佢地幾個女仔，特別係方芷諾喺度你就唔好亂講嘢啦！

呢一刻我真係好想咁樣同佢講…但我當然冇咁講，只係佢呢句說話一出嚟，又再一次引起大家嘅興趣



「呢個我聽過喎～」張雯茵突然加巴口講道，點解你要加巴口入嚟講？

我冇出聲，我都唔知我可以答佢地啲咩，佢地一臉興奮，因為搵到一個八掛話題而覺得興奮…我真係唔知可以講啲咩，而且我比較在意嘅，係佢地喺方芷諾面前興奮咁講

睇嚟應該只有李靜愉知道我同方芷諾之間嘅事，因為啱啱余嘉偉講嗰個叫洛天恩嘅女仔中意我嘅時候，李靜愉望向坐佢隔離嘅方芷諾，然後又望咗我一眼，當大家都好興奮嘅時候，除咗我之外，就只有兩個人嘅心情置於事外：方芷諾同李靜愉

方芷諾一直耷低頭食嘢，佢亦都冇講嘢…佢或者唔知道，呢一刻嘅我嘅眼中…或者應該話由我留意到佢嘅嗰一刻時，我嘅眼中就愈嚟愈冇辦法睇清其他女仔，只有望到方芷諾嘅時候最清晰，行喺佢身邊嘅人我都冇多花心思去留意

我留意到方芷諾嘅表情變化，上一秒仍然同身邊嘅李靜愉同游悠開心咁講緊笑，臉上都掛上燦爛嘅笑容；喺洛天恩撞到我，方芷諾同其他人一樣抬起頭，當洛天恩同我講咗聲唔好意思然後同朋友走嘅時候，方芷諾臉上嘅笑容慢慢地消失…方芷諾望住洛天恩嘅背影，喺收回視線嘅時候稍微望咗我一眼，一副欲言又止嘅表情



佢嘅一舉一動，每一個微表情我都有睇喺眼中，我見到佢嘅表情時，我不禁有一絲希望，覺得佢對我或者仲有少少剩餘嘅好感

勇氣可以一下子聚起嚟，亦可以一下子就散去…當我望多方芷諾兩秒，我就唔想將我嘅心意講出口

宜家嘅我地仲可以有少許嘅交集，我唔想將一切歸零…

我放低叉喺碗中，因為我已經食完，我坐喺度睇手機同時等大家食完就走

食完飯之後我地大家又各有各番屋企，繼續做自己應該做嘅事，而我又同平日一樣番屋企溫書，每一日都係番學、考試、放學、食飯、番屋企溫書

呢種生活真係無趣到極致，不過番學可以見到方芷諾，我諗都算係一件好事嚟…我因為佢先會咁努力咁讀書，為咗就係下一年可以同佢分到同一班如果大家嘅成績差太遠嘅話，我地就冇可能喺同一班，所以我今次先會咁努力

幸福係自己爭取番嚟，所以我宜家就爭取緊我嘅幸福，下年只要同到方芷諾同班就得，我就得分班結果要去到暑假先會知，好似都要去到8月中先會公佈分班名單，而派科結果散學禮嗰日就會知

我番到屋企之後，第一件事就係換衫，然後又坐喺書枱前面準備溫書嘅人生，其實咁樣真係好悶



枱上面放滿中文科要溫嘅嘢，我喺我個File入面拎咗入筆記出嚟，係Miss Chan之前派，望到呢份嘢嘅時候我第一下就係諗起方芷諾

好彩係我唔小心拎咗佢嗰份啫，如果係徐思迪嗰啲拎咗，咁我就冇咗個可以同方芷諾講嘢嘅機會

我托住頭，掀開中文書開始溫，我諗都係背下筆記內容就考到，今日就係一個背書日，背晒所有教咗嘅嘢，聽日就去考中文

溫咗一陣就已經冇心機溫，所以我決定睇一陣手機叉一叉電先再努力溫書，睇嚟睇去唔係IG就係Facebook，好似都冇咩嘢睇咁，一打開IG覺得冇咩嘢睇嘅我好自然咁就search方芷諾個IG名，然後偷偷地stalk下佢IG

唔知方芷諾有冇stalk過我IG，我記得方芷諾有follow我，我都唔記得咗係幾時開始follow我，不過我IG都冇po嘢，佢應該都唔會特別去stalk我之類

「唉…都係溫書啦…」睇咗5分鐘左右，我都係放低咗手機，揀咗去乖乖溫書






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link