［愛情甜故前傳--無糖純愛］曾經嘅我地，都係兩條平行線⋯: 79. 無形的差距

維持咗大概個半星期嘅考試，隨住上星期五考完嘅最後一科中史而結束，今日開始係派卷日同試後活動日，呢兩個星期都會早放，除咗今日、聽日同後日，因為呢三日係對卷日，但過咗呢兩個星期之後就開始放暑假

今日番學心情有啲緊張，因為考試成績出爐，我第一次對於自己嘅成績咁好奇，有一種好緊張嘅感覺

因為係暑假前，所以呢三日嘅時間表同平時嘅時間表都會有啲出入，會重新編一個新嘅時間表，今日第一科派嘅卷係History

楊sir手上捧住一大疊考試卷行入嚟，我頓時覺得好緊張，除咗我之外，班房裏嘅空氣都好似凝固咗一樣，今日嘅課室格外安靜，大家都等緊睇成績

「我知大家都好心急想拎卷睇下自己考成點，不過喺派之前呢，我講兩句先～」楊sir將試卷放喺教師桌嘅枱面上，佢轉身拎起放喺黑板前嘅粉筆



「全班34人，合格人數…」楊sir一邊講，一邊喺黑板上寫，「全級最多，32人；滿分100, 我地班嘅平均分係62.5分。」

有兩個人唔合格？咁如果其中一個係我咪尷尬…拜託唔好係我…

「今年份卷呢我地再調整過，所以比起上年係難啲，不過大家考出嚟嘅成績都唔錯。」楊sir一邊講，一邊捧起放喺枱面嘅試卷，然後除咗條橡筋，「好，順學號出嚟拎卷啦！1號。」

大家已經都自動自覺咁行出去，大家唔係跟學號坐，所以出去嘅時候有啲混亂，我地都係跟番平日上歷史堂嘅位坐，即係方芷諾坐喺我後面

我見過多兩個就到我，我已經行定出去，我企喺楊sir前面等緊，楊sir見到我已經企咗喺度，佢將份卷稍微卷起然後遞比我，喺等緊嘅時候，我感覺到我緊張到手心都出晒汗，我第一次覺得咁緊張



喺我伸手接卷嘅時候，我感覺到我雙手都微微震緊，我真係太緊張啦今次

喺我接過卷嘅瞬間，我第一時間係睇下自己考到幾多分，合格定唔合格，因為我真係有啲擔心嗰兩個唔合格嘅人入面其中一個會係我

我戰戰兢兢咁打開試卷，心臟跳得好快，我感覺到自己係極緊張

「Yes！」我喺睇到分數嘅同時，喺心中興奮咁吶喊道，「我合格呀！」

嚇到我心臟都離一離，我嘅分數係68, 我唔止合格，仲高過全班嘅平均分，暫時嚟講歷史科合格，而且呢個分數對我嚟講亦都係好理想嘅分數



我番到埋位嘅時候，我嘅心情仍然未平復到，因為我真係從來都冇感受過好有成功感，覺得自己辛辛苦苦讀完之後拎到一個滿意嘅結果嘅感覺

我番到自己個位坐低，喺我心中一直將我壓住嘅大石好似稍微有鬆咗一啲

我聽到我身後有動靜，我抬起頭望一望出面，都差唔多到方芷諾出去拎卷

方芷諾從楊sir手中接過考試卷，佢見到分數之後露出淡淡嘅笑容，佢係咪都考到一個滿意嘅分數呢？唔知佢考到幾多分呢…

方芷諾拎住試卷喺我身旁經過，然後我聽到拉櫈嘅聲音，我冇擰去後面望，雖然心中真係有啲好奇佢幾多分

「芷諾你幾多分呀？」方芷諾先啱啱番到埋位，坐喺佢隔離嘅游悠就已經逼不及待咁問佢，我冇聽到方芷諾答佢，不過就聽到游悠嘅驚呼聲，「你又咁高分嘅！又考80幾分！」

方芷諾「又」考咁高分…我不禁耷低頭望一望自己份卷上面寫住嘅分數

「呢個係我同佢嘅差距…？」我喺心中不禁默默地反問道



明明成績唔係用嚟衡量兩個人之間嘅差距嘅方法，但我卻覺得我同佢之間嘅距離仍然好遠咁，我同佢好似一啲都唔相襯…

「咁有努力溫書嘛～」方芷諾講咗一句，「係溫書得番嚟嘅成果呀～你都唔係考得好差啫，都高高我地班嘅average呀！」

明明呢一句係方芷諾對住游悠講，但我卻覺得好似都係同緊我講一樣, 我心中都有一絲暖意，喺無形間好似鼓勵緊我一樣

我望住我份卷，望到呢個分數時，我知道…我同方芷諾之間係有無形嘅差距…成績反映咗我地兩句之間某一部分嘅差距，不過唔可以代表住全部嘅距離

聽到方芷諾講嘅嘢，我知道我應該要更努力去追上佢嘅步伐，或者喺某一個方面上要比佢更加出色

楊sir開始講解份卷，我收起咗筆袋，緩緩地抬頭望向外面嘅screen

宜家只係一科過咗，希望其他科都會過，其他科都可以有努力溫書嘅回報






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link