《如果你見到呢段字，救我！》: Day 12

Day 12

今日又係同死神打交道嘅日子，睇嚟而加每日都會遇上唔同嘅處境，等住我去死。

但我係唔會輕易棄權。

「叮叮叮叮———」美好嘅清晨，就喺比一個電話鈴聲破壞，亦係間接謀殺我嘅兇手。

「朝早打嚟嘈咩啊？」我破口大罵，比人嘈醒嘅感覺真係好討厭。





「我問你做咩就真！ 你已經好多日無翻工，係咪搏炒魷魚？」腦細把聲，大概係我呢生人聽過最難聽嘅聲音。

「係啊！我而加唔做啦！你自己做夠佢啦！」我霸氣回答。

儘管好想破口大罵，但事實係，我仲要靠份工揾食。雖然同屋企人嘅關係好疏遠，我都想儲多啲錢，萬一我不幸離世，佢哋都可以有錢過世。

「唔好意思，我而加馬上過嚟。」我即刻換上西裝，坐上跑車翻工。

好諷刺呢？表面光鮮、睇落好有錢，但其實我哋都係錢嘅奴隸。





就係咁，我重新開始工作，亦係惡夢開端。

每當我想休息或者想食下零食放鬆心情，喪屍人格就會控制我嘅行動，迫我繼續做嘢，連一刻嘅喘息都無。

以往我只會睇住佢控制自己，最多感受到少少感覺，但而加似乎唔同咗，就好似變咗扯線公仔一樣。

每當我病發，佢可以隨心咁控制我，就例如上次火燭咁，我可以感受得到被火燒嘅痛楚，即使喪屍人格同樣感覺到，但佢對呢啲都好麻目，唔會影響到行動，變相係只有我受苦。

至於奪回搶制權方面，而加我需要極度集中精神先可以勉強搶翻控制能力，唔似以前咁簡單，相對困難同辛苦咗。





直到午飯時間，身邊同事都去咗食午飯，不過喪屍人格完全無停手，仲越做越起勁，期間我經已不斷試圖搶翻控制權，然而我嘅精神狀態同身體都好唔舒服，所以一啲用都無。

幾經辛苦，終於挨到收工時間，喪屍人格肯停止工作，我感受到我個胃痛到蜷縮成一團、膀胱就嚟要爆炸、精神壓力非常大。

係完全無休息、隻眼無離開過電腦嘅情況下，基本上同通頂幾日幾夜無分別。

身心靈疲倦到有好強烈嘅死亡感覺，我最需要係訓覺，再唔訓的話，我一定會過勞死。

正當我準備合埋眼休息，喪屍人格即刻強迫我開眼！

「我要訓覺啊！」我大叫反抗，而佢當然無停嘅意思，於是我把心一橫，大大力咁撞自己個頭落牆壁。

只要我暈咗，佢就無得控制我，我亦可以訓覺回氣。