《如果你見到呢段字，救我！》: Day 13-Part 1

Day 13

「嘿，你幾好嗎？」一位唔太熟悉嘅同事叫醒咗我。

「吓？呃，我Ok啊。」我疑惑佢點解會咁問，之後先察覺到原來自己訓咗係地下成日，佢應該懷疑我暈咗先好心叫我。

回想翻尋日嘅事，仍然係驚心動魄，好彩最後無事，精神好翻好多，不過而加仲係覺得好肚餓同想去廁所。

啊⋯⋯咦？





點解塊地突然有水嘅？頭先訓都無㗎，
條褲仲好似暖暖地嘅？等等，點解我啲尿意無咗，我明明好想去廁所㗎，唔通......唔通嗰啲水就係我嘅......

無可能！

一定唔會，我我我失禁？我喎！

呢個情境好似似曾相識......係邊度見過呢？

係啦！之前都有個朋友大叫要去廁所，無幾耐就有攤水係地下，原來嗰啲唔係普通嘅水，係佢嘅尿！





我仲以為係普通水咁用布抹完就算，而加諗翻起都想嘔......

「哇，點解地下有攤水嘅，有人倒瀉水？」其他同學開始望向我個位置。

「係我唔小心倒瀉水！一陣會拖翻乾淨，啊同埋，我有啲頭痛，想請日假。」我心虛回答。

「睇你個樣真係有啲唔妥，你翻去好好休息啦。」

拖好地之後，我去咗附近小店食咗早餐醫肚，然後就坐車翻去屋企，失禁件事實在太震驚，我仲未接受到。





翻屋企途中，我如常會望一望德利明屋企，點知，現正招租嘅標示無咗，而入面亦都好似有個人影！

腦海突然冒出一個大膽假設，唔通呢個人就係殺死德利明嘅真正兇手？

雖則德利明講過自己好快就會死，但佢嘅死亡方式未免太巧合掛？時間準確到一個局咁。

如果屬實嘅話，咁呢個兇手應該知道德利明好多秘密，為咗唔比佢洩漏事件，所以殺人滅口而不擇手段。

咁點解佢又會搬入德利明屋企？唔通佢知道我亦係知情人士？於是將計就計，扮成我嘅鄰居博取同情，再借機會殺我一了百了。

我應該點做好呢？貿然去佢屋企又會好突兀，甚至比佢估到我計劃......

「叮噹——」戛然，有人按下門鐘。





我帶住緊張嘅心情開門，深怕會有人追殺我，估唔到，映入眼簾嘅，竟然係憎我打機嘅John。

「Su Su！我係你嘅新鄰居，我今晚會開個入伙Party，你要唔要嚟？」我完全無諗過會係阿John，係喎，佢亦係德利明嘅Party出現過，同樣為可疑人士之一。

好，既然佢主動出擊，我都唔會坐以待斃。

「我嚟啊，預埋我。」

係Party開始之前，我計劃定下一步。

首要條件係親近同接近John，嘗試搏取佢信任。

其次係搜證下屋企嘅物品，佢新搬入伙，應該未咁快拆箱，或者入面會有不可告人嘅秘密。

如果佢真係殺死德利明嘅兇手，我一定唔會輕易放過佢。





說時遲那時快，Party夠鐘開始。

「叮噹——」

「叮噹——」

「叮噹——」

入面啲音樂嘈到我企出面都聽到，即使我連續㩒咗幾次鐘，不過都係無反應，無人開門比我。

我唔甘心放棄，堅持一直㩒，㩒到佢肯開門為止。

無耐，終於有人開門比我，但開門比我嘅唔係John，而係我個女。





「點解你會係度？」我同佢異口同聲地說。

「阿John邀請我嚟。」我哋講出同樣答案。

「無可能，佢尋日邀請我嗰時你都唔係屋企，你點會知佢開Party？」我質問。

「呢個世界有樣嘢叫手機。」佢𣊬間結束咗話題。

「咳，點都好，你唔好痴咁埋阿John，佢唔係好人。」我好心提醒佢。

而我換來嘅就只有反到後腦嘅白眼。