算,女大女世界,揾阿John出嚟先係最重要,不過呢個Party嘅規模較大,出席人士比較多,一時三刻未見到John出現。

既然係咁,我唯有周圍觀察下,之後再接近佢。

屋內傢私大致上都同以往無分別,唯一唔同嘅係多咗音響同樂器,睇嚟阿John鐘意玩樂器為主,一陣可以趁呢個話題入手。

咦?

呢個時候,我發現一間疑似主人房嘅地方,不過閂埋咗房門,無辦法睇到入面嘅間隔。





加上Party人太多,我都無可能明目張膽咁入去捜查佢啲物品,唯有再等時機。

我坐係梳化上百無聊賴,開始回憶自己當初亦係坐同一個位置,等待德利明解答疑惑。

無諗過,而加角色掉翻轉,係由我為佢揾出死亡真相。

正當我陷入回憶之中,驀地,全場漆黑一片,

「Let’s dance!」黑暗中傳來John嘅聲音,五顏六色嘅昏暗燈光隨即亮起,全場氣氛高漲,所有人都係度跳舞助興,沉醉於Party之中。





簡直係天助我也,而燈光轉暗,所有人都專注於跳舞之中,我大可趁著呢個絕佳時機偷入阿John間房,反正無人會見到。

果然我不出所料,能夠成功偷偷摸摸咁進入阿John嘅主人房,房內正常普通,都係一張單人床同書枱,床邊仲有個電子吉他。

我行前睇下書枱嘅物品,枱頭只有一本簿同一部電腦。

我馬上揭開本簿,睇下會唔有佢殺害德利明嘅字句或者暗示,點知只係畫上音樂符號旋律,我諗本簿嘅用途應該淨係作曲咁簡單,無咩特別。

我將目標轉向電腦,希望裏面會有有用嘅資料可以證實我嘅諗法。





咩話?竟然要密碼?我又同佢唔熟,想試下生日日期嗰啲都唔得......

等等,佢咁鐘意音樂,會唔會關音樂事?

心動不如行動。

Ilovemusic,我嘗試輸入密碼。

密碼無效,你還有兩次機會。

得翻兩次機會......仲有咩可能性呢?

啲人成日話音樂同佢哋條命一樣咁重要,一於試下呢個先。

Musicismylife,我再次輸入。





密碼無效,你還有一次機會。

弊!淨係最後一次機會,我唔可以再失敗,一失敗就咩都無,唔會再揾到真相。

到底仲有咩可以搏下?

啊,佢咁自戀,會唔會係讚自己呢?

但又好似無咩可能,邊有人會設定咁嘅密碼?唉無得諗咁多,就賭一鋪!

Iamsohandsome,我小心翼翼按下確定按鈕。

求下你求下你,一定要成功,我不自覺地喃喃自語。





登入成功。

我得咗啦!居然撞得中密碼!

登入中嘅圓形符號不斷轉動,我猶如打開潘朵拉的盒子般,既期待又緊張,唔知會出現啲啲咩。

歡迎!

估唔到,單單係電腦桌面嘅Wallpaper都足夠衝擊我,John設定嘅桌面就係佢同我個女嘅親密照。

我將滑鼠移到命名為My girls嘅檔案中,除咗佢同我個女嘅合照,居然仲有唔同女人同佢一齊影嘅裸照!

賤人,竟然敢呃我個女!

唔怪得佢成日都唔痴家,原來係同呢個衰仔一齊。





我再翻查埋電腦其他資料,都只係得佢同朋友玩音樂、飲飲食食嘅合照。

即係話,John並唔係殺害德利明嘅犯人,但無可否認,佢係一個不折不扣嘅Play boy。

唔得,我要快啲同個女講清楚!

我隨即離開John間房,焦慮不安咁尋找女兒嘅身影。

無意中,我瞥見左手邊嘅角落位置用一塊黑布遮住,身邊嘅人依舊顧住跳舞,完全無為意呢一個毫不起眼,但非常引人懷疑嘅角落。

我大膽咁走上前查探,發現黑布遮住一道門,門口張貼「請勿進入」嘅大字。

到底應唔應該入呢?





越叫我唔好入,我就越想入去睇,或者佢收埋咗啲更加不可告人嘅秘密。

好,就開門睇下。

我伸手,慢慢扭開門把,門後居然唔係一間房,而係深不見底嘅樓梯。根據我推測,呢間極有可能係佢加建嘅地下密室。

行落去會唔會有危險?我嘗試探頭去望,但入面黑到乜都睇唔到。

入去睇下應該好快嘅姐,一眼,我望一眼就走翻出嚟,就咁決定。

正當我走前幾步,準備行落樓梯,

「嘭!」

我馬上轉身一望,對門已經被人閂咗!

我立即伸手去門把位置,打算開門推出去,

「噠!」

已經太遲,道門已經被人上鎖,我而加只係得翻一個選擇。

就係向下行。
已有 0 人追稿