「喂西成,LUNCH呀喂。」午息時間,我過去A班搵西成。

冇錯,依家西成讀A班,同阿敏一樣。

「OK,OK。」西成行出班房,同我一齊行落去CANTEEN。

「點?新班咩感覺?」我好奇咁問西成。

「正呀。有得同阿敏同班。事前我都唔知阿敏會揀A班,估唔到我同阿敏會咁心靈相通一齊入A班,睇黎真係上天安排啦。」西成笑嘻嘻咁,鬼咁HAPPY。



「你上次單野,冇嚇親人咩。」

「佢好似對我都有啲避忌,但唔緊要,相信我嘅熱誠可以打動到阿敏。」

「見到你對佢咁好我就開心哂。」我呼一口氣。

「係喎,你之前話阿敏鐘意你,點知原來係假象。」西成,「果日你無端端喺CANTEEN跑走左,仲以為你真係鐘意阿敏,搵佢表白添。」

「冇啦,過左咁耐,依家咩野都冇喇。我諗當時我諗多左姐。」我淺淺一笑。



「唔使咁頹喎兄弟,聽人講你同阿敏個FRIEND依家行得好埋,仲走去夾BAND添喎。」西成對住我奸笑,「做咩呀,你鐘意左人呀?」

「屌你都痴撚線,我都費撚事同你講。」

「唔使咁激動喎,問下姐。嘻嘻。」

「你唔好亂咁周圍傳添呀,費事大家誤會,見到面阻阻咋。」

「得喇得喇。」西成拍我膊頭,「但係你真係鐘意人嘅,一定要及早表白呀,過左就冇得返轉頭架喇。」



「呢個話題完左佢啦。」我無心再傾呢個話題。

究竟我係咪鐘意慧?

其實,應該係。

但係,我應唔應該表白呢?定係維持依家呢個關係呢?

若果我真係表白,表白完之後我地嘅關係又會變成點呢?

太多問號。

與其話慧唔想我離開隊BAND,不如話我唔想離開慧。

我唔想諗咁多野。反正,我依家過得好開心。



暫時黎講,都係維持原狀啦。

---------------------------------------------

食完LUNCH之後,我就同慧上5B搵立暉。

「喂立暉,你星期六得唔得閒?我地想喺果日練歌。」我叫左立暉出班房。

「星期六應該OK嘅,但係盡量早啲啦,晏晝我要去補習。」

「估唔到你都要補習喎。」以我所知,立暉成績好似唔錯。

「依家個個都要補習架啦,我讀埋呢年就考CE架啦。我唔想放棄入大學呢個機會。」立暉托一托眼鏡,「夾BAND係我嘅嗜好,但都要同時兼顧學業。」立暉睇落個樣好認真。



「好啦,咁你公開試加油啦。但至少,我地聖誕聯歡會都要做個GOOD SHOW啦,好嘛。」我舉起拇指。

「當然啦。」立暉都舉起拇指。

「話時話立暉,我地今次表演嘅歌係蘇打綠嘅『小情歌』喎,你之前有冇聽過呀。」慧。

「蘇打綠?我好鐘意蘇打綠架喎。你搞到我愈黎愈期待演出添。」立暉微微一笑。

我望住立暉對住慧嘅笑容,我感到有啲異樣。

「喂咁唔講住喇,我地仲未通知阿齊同傑仔我地表演咩歌,我同慧落去先喇,掰掰。」我拉住慧走,因為我硬係凝住立暉對慧有啲野。

「做咩咁趕?」比我拉住嘅慧覺得奇怪。

「ehh。我驚搵唔到傑仔同阿齊丫嘛,午息得返四個字咋。」我求其講啲籍口,其實唔想慧同立暉傾咁耐。



落到四樓,我一次過叫哂傑仔同阿齊出黎。

「喂阿齊傑仔,我地諗到CHRISTMAS唱咩歌啦。係蘇打綠嘅『小情歌』。」我望住阿齊,「阿齊你可唔可以幫手搵下小情歌嘅譜?」

「OK呀,SODAGREEN I LIKE IT。我屋企應該有蘇打綠啲譜,我搵完聽日拎比你地睇啦,等我地星期六有多啲時間練習。」阿齊舉起OK手勢。

「我都OK呀。」傑仔。

「咁姐係大家都OK架喇喎。咁星期六我地就要練熟首歌喇。」我。

---------------------------------------------

星期六朝早十一點,學校音樂室。



Pentaship準備聖誕聯歡會嘅歌。

「話就話大家要喺Christmas表演,但係我地都要過左初賽先得,所以大家要認真啲呀。」阿齊拍一拍手鼓勵我地,「但係我地都要比啲信心自己,我地係有能力衝入決賽,甚至拎埋冠軍架。雖然呢個係我地第一個嘅show,但係我地要do our best呀。」

「ok隊長。」我微笑,因為我地已經同意左阿齊係我地嘅隊長。

「咁我地開始架喇喎。傑仔。」阿齊示意傑仔開始。

傑仔點一點頭,前奏響起。

http://www.youtube.com/watch?v=CbSypYLHlYI
.
.
.
「這是一首簡單的小情歌

唱著人們心腸的曲折

我想我很快樂 當有你的溫熱

腳邊的空氣轉了

這是一首簡單的小情歌

唱著我們心頭的白鴿

我想我很適合

當一個歌頌者

青春在風中飄著...」
.
.
.
慧輕柔嘅聲音,簡約咁,演繹出呢首「簡單的小情歌」。

但係,已足夠令人聽得如痴如醉。

「你嘅表現真係一次比一次精彩。」阿齊放低鼓棍,拍手讚賞慧。「好似Michelle你咁靚聲,唱LIVE又好嘅女歌手香港已經好少,希望你可以堅持自己嘅夢想,唔好咁易放棄呀。我睇好你架。」

「做咩突然咁讚我,搞到我有啲唔好意思。」慧腼腆咁笑起上黎。

「咁Michelle你又真係唱得幾好嘅。」立暉都讚揚慧。

「多謝大家比面,哈。」慧淺淺一笑,輕輕鞠一鞠躬。

「大家表現咁好,keep住呢個表現,相信我地過初賽唔難,但要攞冠軍,就要更加努力練習。雖然慧你岩岩整體表現唔錯,但喺某個位都有少少瑕疵。你睇下呢度...」阿齊拎起份歌詞,對住慧講慧有待改善嘅地方。

「阿齊,今次sing con有高手參加?你好似好緊張咁喎。」傑仔問。

「記住我地唔好咁大意,可以入決賽嘅band嘅名額只係得兩個,基本上有一個已經定左,我地一定要爭取剩低個名額,唔好掉以輕心。」阿齊睇落好認真。

「有一個名額已經定左?」立暉。

「立暉你讀左五年,應該記得最近兩年冠軍係邊個啦。」阿齊。

「好似都係一隊band,叫..」立暉摸一摸下巴。

「KAGAYAKE,4個男仔組成嘅BAND,佢地全部來自5E。」阿齊拎返枝鼓棍,「佢地走嘅風格同LINKIN PARK、ONE OK ROCK好類似,都係好搖滾。佢地除左校內表演外,亦都參加過唔少校外比賽,都過唔少獎。」

「KAGAYAKE..?個名咁怪嘅。」傑仔。

「KAGAYAKE係日文(輝け),大約係係閃耀、輝煌咁解。」慧解釋。

「我前年同上年CHRISTMAS都有聽佢地唱歌,佢地LIVE真係唔錯。」我都慢慢記得返上兩年SING CON冠軍隊BAND嘅表演。「話時話,你話佢地全部5E,姐係上年同你同班?」

「係呀,所以我都幾清楚佢地嘅實力。」阿齊點點頭。「如果我地嬴到冠軍,我去美國都算無憾啦。」

「去美國?你要去美國?」傑仔同立暉都顯得幾驚訝,我先醒起我冇同佢地講過阿齊即將去美國留學嘅消息。

「原來你地唔知,咁你地更加要加倍努力喇。」阿齊拍一拍手,「黎啦我地練多次。」

我望一望知道左阿齊即將要走嘅事實嘅傑仔同立暉,佢地嘅眼神好似比起岩岩第一次果次練習唔同左。

變得更加認真。

「我地一定要嬴呀,我地PENTASHIP得架。」我鼓勵大家。

「WE MUST SHOW OUR SPIRITS!」阿齊輕輕敲一敲銅鈸。

「我開始喇。」傑仔開始彈起前奏。

我握緊粒PICK。我望一望我嘅隊友。

佢地嘅眼神都好堅定。

睇黎佢地都同我心諗同一句說話。

「一定要嬴冠軍返黎!」
已有 0 人追稿