[無糖故]我既女神係樂隊既主音: 第十五章
十一月二十三日星期五，終於到左初賽嘅日子。
我地PENTASHIP嘅第一次演出。
我地學校嘅初賽設喺禮堂舉行，雖然己經放左學，但都有六十幾人喺禮堂睇初賽。
經過抽籤之後，我地PENTASHIP同我地嘅假想對手KAGAYAKE表演位置係喺最尾同尾二。
「我諗呢度大部份人都係等KAGAYAKE嘅演出。」坐我隔離嘅阿齊笑一笑，「當佢地表演完之後，相信啲觀眾會走左七成以上。」
「咁姐係會睇我地嘅人只係得果幾個？」慧好似有啲失落。
「唔緊要，評分嘅係老師，觀眾多少唔會影響賽果，當我地過到初賽，去到決賽咪全校睇住我地表演囉。總之，加油啦，我地實得架。」阿齊鼓勵我地。
經過個半鐘之後，終於到KAGAYAKE演出，我望一望禮堂，已經聚集左近一百個學生，圍觀佢地嘅演出。佢地上台嘅時候，甚至有人歡呼。
「HELLO大家好呀，又係我地KAGAYAKE，今年係我地最後一年參賽，希望大家多多支持。」睇落係主音嘅男仔拎住枝電結他，「今年我地參加初賽嘅歌曲係Linkin Park嘅Numb。希望大家可以堅持住走自己嘅路，唔好受到他人嘅束縛，多謝。」
http://www.youtube.com/watch?v=kXYiU_JCYtU
.
.
.
「I'm tired of being what you want me to be
Feeling so faithless
Lost under the surface,
Don't know what you're expecting of me
Put under the pressure
Of walking in your shoes
(Caught in the undertow
Just caught in the undertow)
Every step that I take is another mistake to you
(Caught in the undertow
Just caught in the undertow)
I've become so numb
I can't feel you there
I've become so tired
So much more aware
I'm becoming this
All I want to do
Is be more like me
And be less like you...」
.
.
.
果位主音的確實力非凡，佢果種接近嘶吼嘅聲線就好似困喺鐵籠入面嘅獅子一樣，能夠喚醒每個人心入面嘅靈魂。主音嘅聲線就好似呼喚緊在場嘅每一個人咁樣，可以話係震撼人心。
除左聲線之外，佢手電結他都係一流，就算佢一邊彈奏一邊演唱，都冇影響到佢甩BEAT，顯示出佢嘅功架。
仲有，即使係佢嘅隊友，都好完美咁擔當佢地嘅職位。貝斯、鼓手、鍵盤...
我地可以嬴到咁嘅對手嗎？
即將演出嘅我開始感到一絲緊張。
「唔好動搖，」突然，阿齊好似察覺到我有啲唔妥，對住我講左幾句，「我地雖然同佢地一樣係玩BAND SOUND，但係風格完全唔同，唔好受佢地影響，做好自己。」
「依家觀眾都好亢奮，我地就用我地嘅音樂，一瞬間將佢地由灼熱嘅火山拉返去柔和嘅草原啦。」阿齊微笑，慢慢行上台。
聽到阿齊嘅說話之後，我冷靜返落黎。
「做好自己。」我微微一笑，握緊拳頭。
－－－－－－－－－－－－－－－－－－－－－－－－－－－－－－－－－－－－－－－－－－－－－
「最後一個參賽者，PENTASHIP。」台下嘅老師攞咪宣佈，意味著我地第一次嘅演出開始。
我望一望台下，雖然人數少左，但完全冇影響我嘅情緒。
「大家好，我地係PENTASHIP，今次係我地第一次參賽，希望大家多多支持。」我望一望身旁向台下講野嘅慧，慧睇落好似好開心。「今日我地要唱嘅歌係蘇打綠嘅『小情歌』，多謝。」
我閉上雙眼，靜待傑仔彈奏嘅前奏。
「...」
「...」
「...」
演奏嘅期間，我幾乎一直閉上眼睛，除左已經記熟位置之外，仲不斷回想起認識慧到依家嘅片段。
同佢坐嘅第一日，慧同阿敏畫花我張枱、第二朝早喺音樂室聽慧彈奏、果日慧畫花我本英文書，但之後幫我做英文練習、慧同我講佢嘅夢想係BAND嘅主音、之後嘅星期六慧同我出去旺角買結他、然後為左慧嘅我自學結他、之後仲自彈自唱令到佢感動到喊、我亦都宣言唔會離開慧...
上面咁多件事只係喺短短嘅一年內發生，我同慧已經好似經歷左好多野咁。
我打開雙眼，望一望身旁演唱緊嘅慧，佢清澈嘅歌聲喺我心入面迴響。
喺呢一刻，竟然輪到我有啲感動到想喊。
我強忍淚水，彈奏到最後一刻。
「...」
「...」
「...」
「多謝大家。」演出完畢，我地全部人鞠一鞠躬。
抬返起頭嘅望一望台下，估唔到台下嘅評判老師入面其中之一係楊仔。楊仔偷偷地咁舉起手指公，示意我今次表演唔錯。
我微笑住輕輕點頭。
落到台下，我地坐返埋位，等待決賽名單。
經過一輪商討，評判老師代表楊仔上台，宣佈名單。
「大家好，經過我地評判老師商議之後呢，結果如下。」楊仔拎住張紙，「首先係個人組別..」
一路嘅宣佈，我都望住我地嘅隊員，佢地嘅眼神都顯示出佢地好緊張。
其實我都係，畢竟呢個係我地第一次嘅演出，亦有可能係最後一次。
但係至少，我對我地PENTASHIP有信心。
「最後，係團隊名單，入圍嘅係...」我吞一吞口水，「第一隊係KAGAYAKE，希望你地可以蟬聯冠軍啦，」聽到入圍嘅KAGAYAKE，亦都互相擁抱慶祝。「最後一隊呢，就係...」本來無神論嘅我，呢一刻心入面竟然喺度祈禱，祈求我地入圍。
「...唱『小情歌』嘅，PENTASHIP。」
宣佈入圍嘅一刻，我地開心到彈起身攬埋一齊。
「都話我地得架啦！決賽喇！」阿齊歡呼，我地五個人都開心到不得了。
「都話架啦慧，我地一定得架。但係我地唔只要入決賽，仲要攞埋冠軍！」我望實慧，佢堅定咁點一點頭，眼眶又好似紅紅地。
「唔好喊呀傻妹，等我地攞左冠軍先喊啦。」我輕輕擁抱慧，佢挨喺我嘅膊頭度，感動到講唔出說話。
雖然我都好感動。
「雖然入到決賽係好開心，但我地都係時候要諗決賽唱咩歌喇。」歡呼過後，阿齊提醒我地。
「吓，原來決賽要唱第二首歌架。」呢樣野我都係第一次聽。
「我地決賽唱返初賽嘅歌都得，但係我想我地大家比多啲挑戰自己，至少唔好局限住自己先。」阿齊望一望慧。「我地嘅主音小姐同唔同意？」
「嗯。..」慧輕輕點頭，索一索鼻水，「我都覺得我地要試多啲野。」
「最緊要我地要相信自己，信自己真係好緊要。ANYWAY，今日大家都GOOD SHOW！」阿齊舉起佢嘅手指公。
我地４個都隨之舉起手指公。
「記住，我地最終嘅目標係冠軍。」阿齊對住我地講，「至少，喺我去美國之前留一個GOOD MEMORY。」
「我地唔會令你失望。」我笑一笑。
PENTASHIP，入圍決賽。