一個中五女學生的故事: 3

搭緊地鐵返學既途中
【Scarlett！早晨啊。】後面有把聲嗌我，我擰去側邊睇，原來係Figo。
【早晨。】我禮貌性地回左一句。
【你諗緊咩諗到入曬神啊？】Figo問我。
【無啊。】
【真係無？我頭先一直係隔離望住你，你發呆個樣都幾得意。】
【諗緊啲無聊野咋嘛，哈哈】我笑左笑。
【又見到你笑，有無人話過你笑幾好睇？】
【哈哈，係咩。】我徹頭徹尾係話題終結者。
【咁啱撞到不如一齊返學校啦。】Figo提出邀請。




【哦，可以啊。】都無理由可以拒絕啦，唔通同佢講【啊姐想自己行，你碌開。】咁咩。
【你記得今日晏就約左我食lunch架可？】Figo提醒我今日lunch係約左佢食飯。
【記得啊。】都記得既，應承左唔會唔記得既基本上。
【咁我想約埋你放學溫書得唔得？ 】Figo再提出邀請。
【哦，可以啊。】
我地一路講已經返到學校，呢個鐘數係最多人返黎既時間，所以有好多人都望住我同Figo。大概係望緊Figo點解會同我一齊行返黎。

上到課室。Celine即刻走黎問我。
【喂Scarlett，做咩同Figo一齊返學既，你對佢有興趣啊？】
【唔係，咁啱撞到姐，人地籃球隊隊長wor，我邊高攀得起啊Celine姐。】我當然否認。




【唔係咁講啊Scarlett，你啲仔唔會少得過我，你都係好有market的，記住有咩進展話我知wor，等你好消息。】Celine好興奮咁講。
【係喇係喇】我敷衍佢。

自從琴日之後，Vincent就再無wts過我，大概都知機，唔再搵我。都好既，該斷既時候斷，我都唔係咁想再見到佢。

Lunch既時候。

【Scarlett行咯。】Figo行埋黎我位叫我。
【嗯，等間食咩？】我問Figo。
【你話事，我陪你食。】Figo都係咁講。




【三哥？】我問。
【好啊，我都好耐無食。】
同Figo一路行去商場，一路傾下頭先上堂發生左啲咩事，好快就到商場間三哥既門口問啲姨姨攞籌等位。
周圍好多其他學校既學生，好多女仔都望住Figo，人地靚仔又高，身形又唔錯啊嘛，望多兩眼好正常姐。
甚至我聽到有人講：【嘩，你睇下呢個男仔，好靚仔囉。】【係囉，點解我地學校無呢啲靚仔架，仲要好高囉。好似係籃球隊黎，之前係學界見過。
但佢隔離個個女仔就普普通通喇。】
【Sorry啊，叫你同我食飯搞到你俾人講。】Figo似乎係聽到呢啲說話而同我道歉。
【唔緊要】閒言閒語都唔係第一次聽，所以我都無咩所謂，何況我宜家都唔太在意人地點睇我。
【六實三號兩位】三哥啲姨姨嗌緊我地個號碼。
【到我地喇】我同Figo講，然後姨姨就帶位。我地坐低之後，Figo就俾個Menu我。
【唔洗啦，我諗好食咩。】我同Figo講。
【咁快，今次唔洗睇Menu咁勁？】Figo有啲驚訝。
【黎親三哥我都係嗌同一樣野架喇。】我答佢。
【嗌咩？佳肉勿演麻喇實小喇？凍撚死少冰？】Figo講完自己都忍唔住笑左出黎。
【咩料啊。我食雞肉麻辣三小走韭菜少米。凍檸蜜少冰少甜。】我一路笑一路講。




【哦~原來你係咁嗌既，我幫你嗌埋啦咁。唔該！】Figo揮手叫啲姨姨過黎。
【要個雞肉麻辣三小走韭菜走腐皮少米，凍檸蜜少冰少甜。同埋要個過橋米線小辣。凍檸茶。】Figo好順口咁講得出我要咩，犀利。姨姨落完單覆一次單之後就行開左。
【你記得今日放學約左我溫書加可？】Figo再提我。
「記得啊，但點解你會叫埋我一齊溫書既？」呢個問題我都有d好奇。
「我想約你嘛，呢個講法接唔接受？哈哈。」Figo答我。
「籃球隊隊長約我wor，點會唔俾面啊。」岩啊，籃球隊隊長約點敢唔俾面啊，唔驚俾佢d女fans打啊？
「雞肉三小走韭菜走腐皮少米，過橋米線小辣。凍檸蜜少冰少甜，凍檸茶。」野食同野飲陸續黎到。
「係呢，你想放學去邊到溫書？」我問Figo。
「你想呢？Starbucks？自修室？」佢又問返我。
「um。。。Starbucks啦，我唔係咁中意去自修室做野。」我覺得自修室既氣氛有d嚴肅，Starbucks casual啲，唔洗咁拘謹，又可以買下野飲。
「好啊，我都唔太中意自修室，因為無得食野飲野，又好靜，我係太靜既地方做唔到野。」Figo呢樣野同我一樣。

成餐飯就係Figo不停問我問題，帶起話題同我傾計。

「先生多謝你97蚊。」Figo遞左張一百蚊俾個auntie。




「喂，俾返錢你先啦。」我叫停Figo。
「唔洗啦，我請你。」有老細請唔係唔好，不過我又唔係俾唔起。
「下。。唔好啦，俾返你啦，我又唔係無錢食飯。」我堅持俾返錢佢。
「咁我想請你食飯得唔得先？」你講到咁，我仲有咩理由唔俾先。。
「er。。。唔係唔得。」我可以講咩？
「咁咪得囉。返學校啦，仲有十幾分鐘就夠鐘。」Figo講完就推住我膊頭示意叫我快d行。


「喂，個個咪籃球隊隊長Figo，點解會同個姣婆一齊架。」
「咪就係囉，明明Figo係男神黎架嘛。」
一路行就一直聽到背後有人對我指指點點，sorry我真係咩都無做。
「你地可唔可以唔好咁樣話人，Scarlett聽到會唔開心，希望你地識得尊重人。」Figo出言制止後面既人道我長短。

「你無野啊嘛，sorry啊又搞到你俾人話。。。」Figo再道歉。
「你講左好多次sorry喇，無野wor，又唔係第一次俾人話，況且我嬲咪令佢地更開心。行啦。」我一路微笑一路講。事實上，你問我係咪真係咁無所謂，




得閑咪在意下。當你成日俾人批評既時候，就算一開始在意，到後來你會在意到好攰，然後就唔想再繼續，慢慢就會睇淡。

到學校。

「陣間調位wor，你有無話想同邊個坐？」Figo問我。
「係wor，你唔講我都唔記得今日會調位添。我無所謂。」我都無朋友，又點會有所謂，又點會有想一齊坐既對象。
「我想同你坐其實，因為你成績好過我，我想你幫下我啊。」Figo作為籃球隊隊長但偏偏係四肢發達頭腦簡單既人類，佢用一個少少可憐既語氣黎同我講，
就好似有少少撒嬌既感覺。
「哈哈，咁睇下你可唔可以得嘗所願啦。」唔會咁岩掛。。。


班主任節。
「呢個就係你地黎緊既座位，可能會再有調動，邊個睇唔到黑板就出聲啦。」班主任你唔撚係認真啊嘛，有無咁岩啊。。。
「喂，真係俾我恨到同你坐，你真係要教我啊Scarlett。」唔L係掛。。。我無野講。
「好啦好啦，我盡量幫你啦。」Fine




「Yeah～～～」佢就好似個小朋友咁樣，好興奮。呢一刻我覺得佢幾可愛。
Figo快快手就執埋座位、櫃桶既野同書包就坐左係佢既新位，仲幫我執埋野搬過去佢隔離張枱，好似好迫不及待咁樣。
「陣間中文堂啊，我訓著左你要叫醒我啊Scarlett。」Figo提我叫醒佢。
「嗯。」我隨口回應。




「喂，起身啦唔好訓啦。」我細細醒嗌又拍FIgo。
「哎呀我好眼訓啊，俾我訓啦。」Figo唔願起身。
「你唔起身聽書我點幫你 點同你一齊溫書都無用啦。咁我放學就返屋企架啦。」我語帶要脅咁同FIgo講。佢即刻彈起身。
「唔好啊，你要陪我溫書，你要教我，我唔訓啦，我唔訓啦，我聽書啦。」佢又好似有少少撒嬌咁同我講，估唔到呢招係work架wor。
「咁咪好孩子囉。」我讚佢。


放學。

「終於捱完最尾三堂，今日happy Friday，我地去休息下好無？」Figo提出。
「下，你唔係話放學溫書咩。」我疑惑。
「咁吊頸都要透氣架嘛，休息陣先啦。」佢又好楚楚可憐咁講。
「好啦好啦，如果你唔溫書，下次你再叫我一齊溫就唔鬼睬你。」我妥協。
「嗯嗯，一定會溫架！」佢好肯定咁回應。

去到starbucks，突然間諗起上次Vincent係到同我表白，心入面打左個冷陣。
「飲咩啊？」Figo問我。
「Amaricano啊唔該，grande。」
「ok。」Figo走左去買咖啡，我就禁下手機，睇下ig、sc個d。

「你既Amaricano。」Figo將我杯野飲放係枱。
「Thank you。頭先你請左我食三哥，依家我請返你飲咖啡啦。」禮貌上都要禮尚往來既。
「唔緊要啦，咪當我叫你教我交既學費囉。」Figo拒絕。
「就算唔俾我請你飲都俾我俾返自己個杯既錢你啦。」我語帶堅持。
「好啦好啦。怕左你。但點解飲Amaricano既？唔怕苦咩？」佢買我怕，然後提出疑問。
「因為我唔飲得有奶既野飲，會肚柯。」琴日就係飲左有奶既咖啡就柯到七彩。
「咁你可以嗌抹茶忌廉個啲架嘛。」Figo再問。
「依家飲唔到太甜既野，會好辛苦，飲得多甜野都唔好啦何況忌廉都係類似奶之類，都會肚柯。」啲人話係乳糖不耐症？
「可能係乳糖不耐症吧，好多亞洲人都有。」
「聽日星期六喇終於，你有無咩做啊？」Figo問我。
「無啊，都係諗住留係屋企hea下咋嘛。」我回應。
「咁我約你聽日出街得唔得啊？」Figo再次提出邀請。佢咁樣算唔算係咁約我？
「都好啊，反正留係屋企係hea，出街都好既。」我都好耐無試過出街唔係為搞野，不過佢會唔會我就唔知喇。
「好野～～咁聽日十一點係旺角站等啦。我地一齊食lunch，你有無想去邊？」Figo好雀躍咁講。
「um。。。可能都係行下旺中掛，或者可以睇下衫既。」我都唔知可以去邊到行，太耐無行街。
「好啦，咁我地聽日食lunch先再諗去邊啦。」Figo好似好開心咁。
「喂你又話溫書既，都唔見你拎野出黎。」我質疑。
「溫啊溫啊，你教下我中文啊，我中文好唔掂啊。」Figo又用可憐攻勢。
「咁你拎出黎先啦，邊課唔識啊？」
傾下計教下佢中文，就係咁樣過左三個鐘。



「都七點喇wor，不如走囉。」我提出。
「係wor，咁我送你返屋企先喇。」佢提出送我返屋企。
「唔洗啦，我好近咋嘛，唔洗送啦。」日日都係自己返屋企，有無人送其實都無咩所謂。
「近就更加無所謂啦。你住邊？」我地一路執野一路講。佢堅持想送我返屋企。
「將軍澳。」我又真係話佢知，雖然將軍澳話大唔大話細唔細。
「咁好近姐，我住油塘咋嘛。咁不如聽日係油塘地鐵站等啦。」佢轉左約見既地方。
「哦，好啊，都無所謂。」我地執完野就行。
「點解唔係搭地鐵既？」Figo問。
「哦，我返學先會搭車，放學會行返屋企。其實都算近。」我回答。
「好啦，你想行返屋企我都照送你啦。」就係咁，佢就送我到屋企附近，我當然唔會俾佢知道我住邊棟，淨係係屋苑附近就叫佢唔洗再送。


「我到喇，唔洗再送喇。」我制止佢繼續行前。
「好啦，咁你搭lift上去都小心喇。」Figo叮囑我小心。
「你沿住呢條路直行就到地鐵站架啦，係咁啦byebye」我指示佢可以點行去地鐵站兼同佢道別。
「好啦，咁聽日見啦。」Figo目送我走。

返到屋企就沖涼再落街買下野食。今日同平時算係有啲唔同既，有人係課後既時間陪左我一陣。雖然平時覺得即使有人陪，個個人點都會走，
但有時候都幾想有一個人陪下自己，即使知道會走都想要陪伴，有時都幾沈醉呢種感覺。但往往你沈醉於想要陪伴呢種感覺，就越危險，因為你永遠唔知道，
呢個人究竟係出於簡單想陪你，抑或係有意圖地接近你。可能你會覺得我陰謀論、疑心重，但呢個係事實，所謂防人之心不可無，陷入左就好難反身，
或者需要長時間先抽到身。但久而久之，我都唔想再諗呢個人究竟係咪呃我，因為猜度其實係攰。唔係叫你唔防，而係有啲位想你睇化，唔好太在意。
因爲就算在意完，你都未必有能力力挽狂瀾。